«بۇل تاڭداۋ قازاقستان حالقىنىڭ سىزگە جانە ءسىزدىڭ ساياساتىڭىزعا دەگەن وراسان سەنىمىنىڭ ايعاعى»
«باعا دەگەن سالىستىرمالى نارسە. باعانىڭ باعاسى ول باعانى كىمنىڭ بەرۋىنە بايلانىستى» – «ەگەمەن قازاقستاننىڭ» ەلىمىزدەگى كەزەكتەن تىس پرەزيدەنتتىك سايلاۋعا ورايلاستىرعان ارناۋلى شىعارىلىمىنداعى «ءبىزدىڭ ەل وسىنداي! ءبىزدىڭ ەر وسىنداي!» دەگەن ماقالاداعى بۇل سوزدەر نۇرسۇلتان نازارباەۆتىڭ جارقىن جەڭىسىنە الەمنىڭ جەتەكشى ەلدەرىنىڭ باسشىلارىنان كەلىپ ءتۇسىپ جاتقان قۇتتىقتاۋلاردى وقىعاندا ويعا قايتا ورالادى. ەلباسىمىزعا بۇل كۇندەرى جولدانىپ جاتقان سونداي اسا سالماقتى قۇتتىقتاۋدىڭ ءبىرى الەمدەگى ايرىقشا بەدەلدى ۇيىمنىڭ – ەۋروپاداعى قاۋىپسىزدىك پەن ىنتىماقتاستىق ۇيىمىنىڭ باس حاتشىسى, حالىقارالىق قوعامداستىقتا ءسوزى بولەكشە قادىرلى باسشى مارك پەررەن دە بريشامبونىڭ قۇتتىقتاۋى. جوعارى مارتەبەلى, مەن ءسىزدى قازاقستان رەسپۋبليكاسىنىڭ پرەزيدەنتى قىزمەتىنە قايتا سايلانۋىڭىزبەن شىن جۇرەكتەن قۇتتىقتايمىن جانە بۇل تاڭداۋ قازاقستان حالقىنىڭ سىزگە جانە ءسىزدىڭ ساياساتىڭىزعا دەگەن وراسان سەنىمىنىڭ ايعاعى دەپ سانايمىن, دەپ باستالادى ەقىۇ باس حاتشىسىنىڭ قۇتتىقتاۋى. «ءسىزدىڭ ۇدەمەلى ەكونوميكالىق دامىپ كەلە جاتقان جاس مەملەكەتتىڭ قالىپتاسۋىنداعى جەكە ۇلەسىڭىز جانە جوعارى حالىقارالىق بەدەلىڭىز حالقىڭىزدان لايىقتى باعاسىن الدى, ال قازاقستاندى ودان ءارى دامىتۋ جولىنداعى كوزقاراسىڭىز قولداۋعا يە بولدى. ءسىزدىڭ باسشىلىعىڭىزبەن ساياسي جانە الەۋمەتتىك-ەكونوميكالىق دامۋعا ۇمتىلىسى جولىندا قازاقستانعا كەلەشەكتە تابىستارعا جەتۋىنە تىلەكتەستىك بىلدىرەمىن, قازاقستان مەن ەقىۇ اراسىنداعى جەمىستى ىنتىماقتاستىق جالعاساتىنىنا سەنەمىن. ءبىز قازاقستان تارابىنىڭ ەقىۇ-عا قولداۋىن جوعارى باعالايمىز. وعان ءسىزدىڭ ەلدىڭ وتكەن جىلى ەقىۇ-نىڭ توراعاسى رەتىندەگى وتە تابىستى ليدەرلىگى دالەل بولىپ تابىلادى. قازاقستان ءبىزدىڭ ۇيىمنىڭ ومىرىنە جاڭاشا دەم جانە ونىڭ جۇمىسىنا تىڭ سەرپىن بەردى. مەن قازاقستان الدا دا ەقىۇ-دا بەلسەندى ءرول اتقاراتىنىنا سەنىمدىمىن», دەپ اق تىلەگىن اقتارعان ەقىۇ باس حاتشىسىنىڭ بۇل باعاسى حالىقارالىق قوعامداستىقتا سايلاۋلار وتكىزۋ جونىندە نەگىزگى بەدەلدى ۇيىم بولىپ سانالاتىن ەۋروپاداعى قاۋىپسىزدىك پەن ىنتىماقتاستىق ۇيىمىنىڭ قازاقستانداعى دەموكراتيالىق جاڭارۋلارعا تيىسىنشە قولداۋ كورسەتىپ وتىرعانىن بىلدىرەدى. باس حاتشىنىڭ قۇتتىقتاۋىنداعى ءبىزدىڭ ەلىمىزدىڭ «ەقىۇ-نىڭ توراعاسى رەتىندەگى وتە تابىستى ليدەرلىگى» جايىندا اتاپ ايتقانى, «قازاقستان ءبىزدىڭ ۇيىمنىڭ ومىرىنە جاڭاشا دەم جانە ونىڭ جۇمىسىنا تىڭ سەرپىن بەردى» دەپ قاداپ كورسەتۋى ءبارىمىزدىڭ مەرەيىمىزدى تاسىتادى.
•
07 ءساۋىر, 2011
«بۇل تاڭداۋ قازاقستان حالقىنىڭ سىزگە جانە ءسىزدىڭ ساياساتىڭىزعا دەگەن وراسان سەنىمىنىڭ ايعاعى»
400 رەت
كورسەتىلدى