يۋحا تەنحۋنەن,
فينليانديا قۇراماسىنىڭ شاڭعىشىسى نەا لۋككونىڭ جاتتىقتىرۋشىسى:
– ۋنيۆەرسيادا اسپانىندا قالىقتاعان قوناقجاي پەيىلگە شىن ءتانتى بولدىم. ۇيىمداستىرۋشىلار, سپورتشىلار, جانكۇيەرلەر, ءبارى دە ءبىر-بىرىنە دەگەن سىي-قۇرمەتتەن جاڭىلعان جوق. ءوز باسىم كورگەن-بىلگەنىمنەن وتە زور اسەر الدىم.
ەليزاۆەتا تۋكتامىشەۆا,
رەسەي قۇراماسىنىڭ مانەرلەپ سىرعاناۋشىسى:
– زال تولى كورەرمەندەرگە مەنىڭ ونەرىم ۇنادى. سايكەسىنشە, «الماتى ارەناداعى» كوتەرىڭكى كوڭىل كۇي مەنى دە قاناتتاندىردى. جانكۇيەرلەر ءۇشىن ءبىز بارىنە دە دايىنبىز. ونەرىمىز ولارعا ۇمىتىلماس ساتتەر سىيلاپ جاتسا, ءبىز ءوزىمىزدى باقىتتى سانايمىز.
دجەرەمي فلەناگان,
اۆستراليا قۇراماسىنىڭ بياتلونشىسى:
– قازاقستان تۋرالى ەرەكشە پىكىردەمىن. بۇرىن مەن قازاقستان تۋرالى ەشتەڭە دە بىلمەيتىن ەدىم. ەندى, مەنىڭ كوزقاراسىم وزگەردى. مۇنداعى سپورتتىق نىساندار مەنى قاتتى تاڭ قالدىردى. الماتىداعى بياتلون ستاديونى مەن كورگەن ستاديونداردىڭ ىشىندەگى ەڭ جاقسىسى.
لاريسا لاۋدەن,
اقش ۆولونتەرى:
– اتلەتتەر اۋىلىندا تۇردىم. تۇرمىسىمىز جايلى بولدى, تاماعى دا وتە ءدامدى بولعانىن ايتۋ كەرەك. بولاشاقتا الماتىعا تاعى ءبىر كەلسەم دەيمىن. ويتكەنى, مەن بۇل قالاعا عاشىق بولىپ قالدىم. تابيعاتى تاماشا, ادامدارى دا اقپەيىل ەكەن.
ميلان گرۋني,
يتاليا قۇراماسىنىڭ شورت-ترەكشىسى:
– قازاقستاندا ءبىرىنشى رەت بولۋىم. كوپ ۋاقىتىم اتلەتتەر اۋىلىندا وتكەنىمەن, قول قالت ەتكەندە الماتىنى ارالاۋعا دا ۋاقىت تاپتىم. ماعان ءبارى دە ۇنادى. راس, اۋا رايى ازداپ سۋىق ەكەن. ەسەسىنە, ادامداردىڭ ىستىق ىقىلاسى, تامىلجىعان تابيعات جانىمىزدى جىلىتتى.
ستيۋارت موگگ,
ۇلىبريتانيا قۇراماسىنىڭ حوككەيشىسى:
– الماتى حالقىنىڭ ءبىزگە دەگەن ىقىلاسى كەرەمەت بولدى. ءبىزدى پاتشايىم وتباسىنىڭ مۇشەلەرىندەي قارسى الدى. سپورتتىق عيماراتتاردان العان اسەرىم ايتىپ جەتكىزگىسىز. مۇنداي مۇز ايدىندارىندا حوككەي ويناۋدىڭ ءوزى ءبىر عانيبەت!