جاقىندا «ەكسپو-2017» كوميسسارى ءراپىل جوشىباەۆتىڭ وزبەكستان رەسپۋبليكاسىنا جۇمىس ساپارى بولدى.
ساپار اياسىندا ر.جوشىباەۆ وزبەكستان سىرتقى ەكونوميكالىق بايلانىستار, ينۆەستيتسيا جانە ساۋدا ءمينيسترى ەليور گانيەۆپەن جانە «وزەكسپوورتالىق» اق باسقارما توراعاسى – وزبەكستان ۇلتتىق سەكتسياسىنىڭ كوميسسارى يبروحيم ەرگاشەۆپەن كەزدەسۋ وتكىزدى.
ەكسپو-2017 كوميسسارىنىڭ وزبەكستان سىرتقى ەكونوميكالىق بايلانىستار, ينۆەستيتسيا جانە ساۋدا ءمينيسترى ە.گانيەۆپەن كەزدەسۋىندە تاراپتار ەكىجاقتى ءوزارا ىقپالداستىق ماسەلەلەرىن جانە ونىڭ الداعى دامۋ بولاشاعىن تالقىلادى. ر.جوشىباەۆ ءوز كەزەگىندە قازاقستان پرەزيدەنتى نۇرسۇلتان نازارباەۆتىڭ الەمدىك قوعامداستىقتان قولداۋ تاپقان الەمدىك باستامالارى تۋرالى جانە سوڭعى كەزدەرى مەملەكەت باسشىسى تاراپىنان كۇن تارتىبىنە شىعارىلعان ىشكى رەفورمالار جايىندا اڭگىمەلەدى. سونداي-اق, ەكسپو-2017 كوميسسارى ەلوردانىڭ الەمدىك اۋقىمداعى اسا ماڭىزدى شارالاردى وتكىزەتىن ساياسي ورتالىققا اينالعانىن اتاپ ءوتتى.
وزبەكستان سىرتقى ەكونوميكالىق بايلانىستار, ينۆەستيتسيا جانە ساۋدا ءمينيسترى كەزدەسۋ بارىسىندا الەمدە كومىرسۋتەك شيكىزاتىنىڭ قورى ازايىپ كەلە جاتقانىن, سوندىقتان جاھاننىڭ ورنىقتى دامۋى ءۇشىن بالامالى ەنەرگيا كوزىن تاۋىپ, ونى پايدالانۋدا باسەكەلەستىكتى ارتتىرۋدىڭ وزەكتىلىگىن ءسوز ەتتى. سونداي-اق, ول استانادا وتەتىن ەكسپو-2017 كورمەسىندە ءوز ەلىندە شىعارىلاتىن كۇن پانەلدەرى, شاعىن گيدروەنەرگوقۇرىلعىلار سالاسىنداعى وزبەكستاندىق مامانداردىڭ جۇمىستارى كورسەتىلەتىنىن جانە سامارقاند وبلىسىندا تۇرعىزىلىپ جاتقان كۇن ەلەكتر ستانساسىنىڭ ماكەتى ۇسىنىلاتىنىن جەتكىزدى.
كەزدەسۋ قورىتىندىسىندا, ەكسپو-2017 كوميسسارى ر.جوشىباەۆ پەن «وزەكسپوورتالىق» اق باسقارما توراعاسى – وزبەكستان ۇلتتىق سەكتسياسىنىڭ كوميسسارى ي.ەرگاشەۆ ەكسپو-2017 حالىقارالىق كورمەسىنە وزبەكستاندىق جاعىنىڭ قاتىسۋى تۋرالى شارتقا قول قويدى.
دايىنداعان
جولدىباي بازار, «ەگەمەن قازاقستان»