سونىمەن, كوپتەن كۇتكەن پرەزيدەنتتىك سايلاۋ دا ءوز مارەسىنە جەتتى. رەسپۋبليكا جۇرتشىلىعى سەكىلدى سولتۇستىك قازاقستان وبلىسىنىڭ تۇرعىندارى دا كەزەكتەن تىس ساياسي ناۋقاندا ايقىن باسىمدىلىقپەن ۇزاپ شىققان ەلباسى ن. نازارباەۆتىڭ ساياسي جەڭىسىنە قولداۋ كورسەتۋ ماقساتىمەن پەتروپاۆل قالاسىنداعى ورتالىق الاڭعا جينالدى. الاڭعا كەلگەندەردىڭ قاي-قايسىسى بولسىن ۇلت كوشباسشىسى ءۇشىن داۋىس بەرگەنىن مارتەبە تۇتاتىندارىن جاسىرمادى.
ميتينگتە ءبىرىنشى بولىپ ءسوز العان ايماق باسشىسى, «نۇر وتان» حدپ وبلىستىق فيليالىنىڭ توراعاسى سەرىك ءبىلالوۆ سولتۇستىكقازاقستاندىقتاردىڭ تاڭداۋدان قاتەلەسپەگەنىن, ويتكەنى ءتاۋەلسىزدىك العاننان بەرگى 20 جىلدى پرەزيدەنتسىز كوزگە ەلەستەتۋ مۇمكىن ەمەستىگىن العا تارتا كەلىپ, الەم مويىنداعان تۇلعالى ساياساتكەر بۇدان بىلايعى كۇش-جىگەرىن, قارىم-قابىلەتىن قازاقستان حالقىنا ارناي بەرەتىنىن اتاپ كورسەتتى. بۇگىنگىدەي ايرىقشا تاريحي ءسات ارقايسىمىزعا ۇلكەن جاۋاپكەرشىلىك پەن مىندەت جۇكتەيتىنىن ۇمىتپايىق, دەدى سەرىك سۇلتانعازى ۇلى.
ودان كەيىنگى ءسوز سولتۇستىك قازاقستان وبلىسىنىڭ قۇرمەتتى ازاماتى اناتولي سپيتسىنعا بەرىلدى. ماسكەۋلىك قوناق شيرەك عاسىرعا جۋىق قىزىلجار وڭىرىندە باسشىلىق قىزمەتتەر اتقارعان. ەلىمىزدىڭ باسشىسىمەن دە ىستەس بولعان. ول رەسەي تاراپىنان بايقاۋشى بولىپ قاتىسقانىن, ەلباسىنىڭ بەدەل-قۇرمەتىنە دەگەن رياسىز سەزىمىن جاسىرا المادى. ن. نازارباەۆ حالىقتىڭ ءال-اۋقاتىن, تۇرمىسىن جاقسارتۋدا ىرگەلى رەفورمالىق قادامدار جاساعانىن, الدا دا وسى باعىتتا كوپ ءىس شارالار تىندىرىلاتىنىنا سەنەتىنىن اتاپ ءوتتى. وبلىستىق سايلاۋ كوميسسياسى توراعاسىنىڭ ورىنباسارى گريگوري كۋحار جولداۋدان تۋىندايتىن تالاپتاردى ورىنداۋداعى سولتۇستىكقازاقستاندىقتاردىڭ ۇلكەن بەلسەندىلىگىنە توقتالسا, قالالىق ءماسليحاتتىڭ دەپۋتاتى جانكەلدى ءتاجين وسى سايلاۋدا ۇلتتار مەن ۇلىستاردىڭ ءبىراۋىزدىلىعى, بىرلىگى مەن ىنتىماعى سالتانات قۇرعانىن جەتكىزدى. وبلىستىق كاسىپوداقتار كەڭەسىنىڭ ءتورايىمى جامال احمەتوۆا, «لەونتەۆ» جشس-ءنىڭ ديرەكتورى, وبلىستىق ءماسليحاتتىڭ دەپۋتاتى سەرگەي لەونتەۆ, كارديولوگيالىق ورتالىق ديرەكتورىنىڭ ورىنباسارى بەيبىت مۇستافينا, اكادەميك م. قوزىباەۆ اتىنداعى سقمۋ-ءدىڭ ستۋدەنتى ەلەنا كوسەنكوۆا ءوز سوزدەرىندە بولاشاققا دەگەن سەنىمدەرىن وسى سايلاۋ ودان ءارى جىگەرلەندىرە تۇسەتىندەرىن ءمالىمدەدى.
ميتينگ سوڭى جەرگىلىكتى كوركەمونەرپازداردىڭ كونتسەرتىنە, ءان-دۋمانعا ۇلاستى.
قازىردىڭ وزىندە سولتۇستىك قازاقستان وبلىسى بويىنشا داۋىس بەرۋدىڭ الدىن-الا قورىتىندىلارى بەلگىلى بولدى. سايلاۋشىلاردىڭ 92,3 پايىزى سايلاۋ ۋچاسكەلەرىنە كەلىپ, «نۇر وتان» حدپ اتىنان پرەزيدەنتتىككە ءۇمىتكەر رەتىندە ۇسىنىلعان نۇرسۇلتان ءابىش ۇلى نازارباەۆتىڭ كانديداتۋراسى ۇلكەن قولداۋعا يە بولدى.
ءومىر ەسقالي,
سولتۇستىك قازاقستان وبلىسى.