قاي دەڭگەيدەگى جارىستا بولسىن, ەل قۇراماسىنىڭ قورجىنىنا العاشقى التىن جۇلدەنى سالعان سپورتشى كوپتىڭ ەسىندە ەرەكشە قالادى. ءويتكەنى, ونىڭ ءسۇيىنشى حابارى دا ەرەكشە عوي. جانە, ارينە, التىننىڭ اتى – التىن. تاۋەلسىز قازاقستاندا ءوتىپ جاتقان ۋنيۆەرسيادانىڭ العاشقى التىن جۇلدەسىنە وتاندىق سپورتشىلاردان العاش بولىپ بياتلونشى الينا رايكوۆا يە بولدى. سايىس سوڭىنان وتكەن ءباسپاسوز ءماسليحاتىندا جەڭىمپاز جەرلەسىمىزبەن از-كەم سۇحباتتاسۋدىڭ ءساتى ءتۇسىپ ەدى.
– الينا, جەڭىسىڭىز قۇتتى بولسىن! ءوزىڭىز الدىن الا سەنىمدى مە ەدىڭىز؟
– راحمەت. سەنىمدى بولعان جوقپىن. بيىل سىرقاتتانۋىما, تاعى ءبىر سەبەپتەرگە بايلانىستى ۋنيۆەرسياداعا ازىرلىگىم ايتارلىقتاي ەمەس ەدى. سوندىقتان مەنىڭ بۇل جولعى نەگىزگى ماقساتىم توپ جارىپ, ءبىرىنشى كەلۋ ەمەس, ءوز بويىمداعى وسالدىقتى جەڭۋ ەدى. بۇگىن سول كوزدەگەنىمە جەتكەنىمە قۋانىشتىمىن!
– جارىس كەزىندە قيىنشىلىقتار بولدى ما؟
– جارىس بارىسىندا 15 كم جولدى دۇرىس ءجۇرىپ ءوتۋ, ءدال كوزدەپ اتۋ وڭايعا سوققان جوق. فيزيكالىق تۇرعىدان ءتوزىمىم تاۋسىلىپ, قولىمدى ءبىر سىلتەگىم كەلگەن ءسات تە بولدى. بىراق, سانام, ناتيجەنى ويلاعان كوڭىلىم ولاي جاساتپادى, اقىل شىركىن ەموتسياعا بوي الدىرعان جوق!.. باستى مىندەتىم ءوز-ءوزىمدى جەڭۋ ەدى. الدىڭا ماقسات قويا بىلسەڭ, ارمانداي بىلسەڭ جانە سوعان ۇمتىلا بىلسەڭ, ءبارى دە مۇمكىن ەكەن. ياعني, اسقارالى ماقسات التىن مەجەگە جەتكىزەدى!
– سىزدەردىڭ جارىسقا اۋا رايىنىڭ, جەر جاعدايىنىڭ اسەرى بولدى ما؟
– بىزگە ءجۇرىپ ءوتۋ جۇكتەلگەن تراسسا الەمدىك بياتلوندا ەڭ قيىن سانالاتىن جولداردىڭ ءبىرى. ونىڭ ۇستىنە, وسى كۇنى كۇن رايى دا تىم قولايسىز بولدى. قار جاۋىپ, جەل دە بىرەسە وڭنان, بىرەسە سولدان سوعىپ, ءار ادىمدى قيىنداتىپ جىبەردى. كىدىرىسسىز جۇگىرىپ وتىرۋ ءۇشىن اسا اباي بولۋ قاجەت ەدى. ال جارىس مارەگە تاياعاندا اينالانى تۇمان باستى. ايتەۋىر نە كەرەك, جارىس ۇلكەن قيىندىقپەن ءوتتى. ونىڭ تاۋلى, قىراتتى جەردە وتكەنىن ەسكەرسەڭىز, قالاي قالجىراعانىمىزدى ءوزىڭىز باعامداي بەرىڭىز.
– بۇل ءسىزدىڭ سپورتتاعى ەڭ ۇلكەن جەڭىسىڭىز بە؟ ءوزىڭىزدىڭ بياتلونداعى مىقتى جانە وسال تۇستارىڭىزدى اتاي الاسىز با؟
– جوق. مەن 2015 جىلى وتكەن قىسقى ۋنيۆەرسيادادا دا التىن جۇلدەگەر بولدىم. 2014 جىلى قازاقستان قۇراماسىنىڭ ساپىندا سوچي وليمپياداسىنا قاتىستىم. بياتلوندا مەن كوزدەپ اتۋعا شەبەرمىن دەي الامىن. وسال جاعىم دەگەندە, شاڭعىمەن جۇگىرۋ جاعىن ءالى دە شىڭداۋىم كەرەك. سودان كەيىن ءوز-ءوزىمدى قايراپ, وزىمە دەگەن سەنىمىمدى ارتتىرا ءتۇسۋىم قاجەت دەپ ويلايمىن.
– قۇراماداعى ارىپتەسىڭىز گالينا ۆيشنەۆسكايا تۋرالى پىكىرىڭىز؟
– گالينا ۆيشنەۆسكايا سالعاننان توپ جارىپ, كوش باستاعانمەن, قاپىدا قۇلاپ قالىپ, سونىڭ وزىندە مارە سىزىعىن ەكىنشى بولىپ قيدى. ول ءالى تالاي بيىكتەردەن كورىنەرىنە كۇمانىم جوق.
– اڭگىمەڭىزگە راحمەت!
بولاتبەك قاۋىسوۆ