وقۋشىنىڭ تابەلى مەن ءتارتىبى – تەلەفونىڭىزدا

قازاق «قىزىم – ۇيدە, قىلىعى – تۇزدە» دەيدى. بۇرىن بالالاردىڭ مەكتەپتەگى ىلگەرىندى-كەيىندى وقۋ ۇلگەرىمىن كۇندەلىكتى باقىلاپ وتىرۋ مۇمكىن ەمەس ەدى. قازىر شە؟ جۋىردا قاراعاندىدا وتكەن جالپىوبلىستىق اتا-انالار جينالىسىندا وقۋشىلاردىڭ ساباق ۇلگەرىمىن قاداعالاپ وتىراتىن «Eduناۋk» موبيلدىك قوسىمشاسى تانىستىرىلدى. وبلىستا مۇعالىمدەر مەن اتا-انالارعا ىڭعايلى بولۋ ءۇشىن 10 مەكتەپتىڭ بازاسىندا سىنامادان تابىس­تى وتكەن «ەلەكتروندى سىنىپ جۋرنالى» جوباسى ىسكە قوسىلدى. قاراعاندى وبلىسى ءبىلىم باسقارماسىنىڭ باسشىسى اسحات ايماعامبەتوۆ اتاپ وتكەندەي, جاڭا وقۋ جىلىنان باستاپ «ەلەكتروندى سىنىپ جۋرنالى» جوباسىنا قاراعاندى, بالقاش, ساران, تەمىرتاۋ جانە شاحتينسك قالالارىنىڭ بارلىق مەكتەپتەرى كوشىرىلەتىن بولادى. جوبانىڭ ماقساتى – مۇعالىمدەردى قاعازباستىلىقتان قۇتقارۋ. باعالاۋ ءادىسىن جەڭىلدەتە وتىرىپ, اتا-انالارمەن كەرى بايلانىسقا شىعۋعا اتالمىش قوسىمشا تاپتىرمايتىن قۇرال بولماق. بۇل رەتتە اتا-انالار Android جانە iOS ۇيالى تەلەفوندارىنا «Eduناۋk» موبيلدىك قوسىمشاسىن جۇكتەۋ ارقىلى بالانىڭ وقۋ-ۇلگەرىمى مەن ساباققا قاتىسۋى, ساباق كەستەسى جايلى اقپارات الا الادى. سونىمەن قاتار, مۇعالىمدەرمەن بىرگە پروبلەمالى ماسەلەلەردى تالقىلايدى. موبيلدىك قوسىمشالاردىڭ كومەگىمەن اتا-انالار ءوز بالالارىنىڭ وقۋ ۇلگەرىمى مەن ساپاسىن ۇيدە وتىرىپ بىلە الادى. ءاربىر اتا-انا ۇيالى تەلەفونىنا ورناتقان تەگىن موبيلدىك قوسىمشاعا سىنىپ جەتەكشىسى بەرگەن قۇپيا كىلتپەن قوسىلۋى كەرەك. ميراس اسان, «ەگەمەن قازاقستان» قاراعاندى