الماتىدا ءوتىپ جاتقان قىسقى ۋنيۆەرسيادادا قىزدار اراسىندا حوككەيدەن قازاقستان قۇراماسى قىتاي كومانداسىمەن كەزدەسىپ, 1:4 ەسەبىمەن جەڭىلىپ قالدى.
ماتچ بالۋان شولاق اتىنداعى سپورت سارايىندا ءوتتى.
كەزدەسۋدەگى العاشقى شايبا العاشقى كەزەڭىنىڭ اياقتالۋىنا ساناۋلى سەكۋندتار قالعاندا سوعىلدى. ونى اسپاناستى ەلىنىڭ سپورتشىسى دەنگ دي ءوز ەنشىسىنە جازدى. ال 22-مينۋتتا جەنگ شابۋىلدى ناتيجەلى اياقتاپ, ەسەپتى ەسەلەي ءتۇستى.
جەرلەستەرىمىزدەن ماليكا الدابەرگەنوۆا 26-مينۋتتا كوماندانىڭ العاشقى ءارى جالعىز گولىن سوقتى. 36-مينۋتتا قىتاي حوككەيشىسى حە ەسەپتەگى باسىمدىقتى ارتتىرا تۇسسە, 48-مينۋتتا فەنگ تابلوداعى كورسەتكىشتى 4:1-گە جەتكىزدى.
ايتا كەتەيىك, وتانداستارىمىز ءبىرىنشى كەزدەسۋىندە ۇلىبريتانيانى 11:0 ەسەبىمەن جەڭگەن بولاتىن. ال توپتىق كەزەڭنىڭ سوڭعى ويىنىن 1 اقپان كۇنى كانادا قۇراماسىمەن وتكىزەدى. ماتچ استانا ۋاقىتىمەن ساعات 20:00-دە باستالادى.