قازاقستان مەن پولشا اراسىندا تىكەلەي اۋە باعىتى اشىلادى. ۆارشاۆادان استاناعا ءبىرىنشى ساپار 8 مامىرعا جوسپارلانعان. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا پولشانىڭ LOT اۋە كومپانياسىنىڭ پرەزيدەنتى رافال ميلچارسكي مالىمدەدى.
ول ەكى ەل اراسىندا اۋە قاتىناسىن ورناتۋ تۋرالى شەشىمگە قازاقستان پرەزيدەنتىنىڭ بىلتىرعى پولشاعا جاساعان ساپارى اياسىندا قول جەتكىزىلگەنىن اتاپ ءوتتى.
«پولشا مەن قازاقستان اراسىنداعى تىكەلەي اۋە باعىتتارىن ىسكە قوسۋ ەكى ەل اراسىنداعى ىنتىماقتاستىقتىڭ 25-جىلدىعىمەن سايكەس كەلۋى كەزدەيسوق ەمەس. ءبىز قازاقستاننان پولشاعا باراتىن جولاۋشىلار اعىنىنىڭ جانە سايكەسىنشە قازاقستاننىڭ قانداي ەكەنىن كورگىسى كەلەتىن پولياكتار سانىنىڭ ارتۋىنا ىقپال ەتەمىز, – دەدى ر.ميلچارسكي. – اۋە قاتىناستارى ەكى ەل اراسىنداعى ەكونوميكالىق, مادەني بايلانىستاردى ارتتىرۋعا, سونداي-اق ءبىلىم بەرۋ سالاسىنداعى ارىپتەستىكتى كۇشەيتۋگە باعىتتالعان».
كومپانيا پرەزيدەنتىنىڭ ايتۋىنشا, قازاقستان جولاۋشىلارى LOT-تىڭ ۇسىنىسى ارقىلى تەك ۆارشاۆاعا عانا ەمەس, سونداي-اق كراكوۆ, ۆروتسلاۆ, گدانسك نەمەسە پوزنان سەكىلدى پولشانىڭ وزگە دە قالالارىنا بارۋلارىنا بولادى. سونداي-اق بريۋسسەل, بۋداپەشت, بۋحارەست, گامبۋرگ, ميلان, ميۋنحەن, پراگا, ريگا, ستوكگولم جانە ۆيلنيۋس سياقتى قالالارعا دا اۋىسىپ وتىرۋ ارقىلى اۋە قاتىناسى جۇزەگە اسىرىلادى.
«ۆارشاۆادان استاناعا ءبىرىنشى ساپار 8 مامىرعا جوسپارلانعان. باعىت ءساۋىر ايىندا LOT اۋە كومناپياسى الاتىن Boeing 737NG ۇشاعىمەن جۇزەگە اسىرىلاتىن بولادى. پولشا تاسىمالداۋشىسى استاناعا اپتاسىنا 4 رەت ۇشادى. دۇيسەنبى, سارسەنبى, جۇما جانە سەنبى كۇندەرى ۇشاقتار ۆارشاۆادان 22:50-دە ۇشىپ, استاناعا تاڭعى 07:45-تە كەلەدى. كەرى ساپار سەيسەنبى, بەيسەنبى, سەنبى جانە جەكسەنبى كۇندەرى ساعات 13:00-دە جۇزەگە اسادى. ۆارشاۆا اۋەجايىنا ۇشىپ كەلۋ ۋاقىتى – جەرگىلىكتى ۋاقىت بويىنشا 14:15-تە», – دەپ اتاپ ءوتتى ر.ميلچارسكي.
ايدار ورىسباەۆ, "ەگەمەن قازاقستان".