جۇما كۇنى استانا ۋاقىتىمەن 11:48-دە برەنت ماركالى مۇناي قۇنى 56,15 دوللارعا تەڭ بولدى. ال KASE-ءنىڭ تاڭعى سەسسياسىندا ءبىر اقش دوللارى 328,76 تەڭگەگە تەڭەستى.
جالپى, اپتانى “پليۋسپەن” باستاعان شيكىزات نارىعى, ۇلتتىق ۆاليۋتا ءۇشىن دە جايلى جاعداي قالىپتاستىردى.
اپتا باسىندا قور نارىعىندا ترامپتىڭ ۇلتتىق ەكونوميكالىق ساياساتقا قاتىستى ايتقان مالىمدەمەسىنەن كەيىن دوللاردىڭ وزىندىك قۇنى ءبىر پايىزعا دەيىن ارزانداپ كەتكەن ەدى. ناتيجەسىندە تەڭگەنىڭ باعامى وتكەن اپتاداعى 334 تەڭگەدەن 331-گە دەيىن تومەندەگەن.
اپتانىڭ ەكىنشى جارتىسىنان كەيىن اقش ۆاليۋتاسى قايتا قالپىنا كەلە باستادى. دەگەنمەن, بۇل كەزدە مۇنايدىڭ 55 دوللاردان اسۋى سەبەپتى تەڭگە ءوز قۇنىن جوعالتپادى. وسىلايشا اپتانى 330 اينالاسىندا باستاعان ۇلتتىق ۆاليۋتا بۇل اپتانى وڭ ناتيجەمەن اياقتاپ وتىر.
دوللاردىڭ كوتەرىلۋىنە ازيا نارىعىنداعى باسەڭدەۋشىلىك تيە اسەر ەتتى. ناقتىراق ايتار بولساق, قىتايداعى جاڭا جىل مەرەكەسىندە ازيا نارىعى جۇمىسىن ازايتىپ, بۇل ءوز كەزەگىندە يۋاننىڭ تومەندەۋىنە الىپ سوقتى. بۇل دا اقش ۆاليۋتاسى ءۇشىن ءتيىمدى بولعانى انىق.