«تەحنولوگيالىق دامۋ جونىندەگى ۇلتتىق اگەنتتىگى» اق-ى «ەكوپرومتەحنولودجي» جشس-عا كوكسوحيميا ءوندىرىسىنىڭ تەحنوگەندىك قوقىستارىن وڭدەۋ جونىندە قوندىرعىنىڭ ونەركاسىپتىك ۇلگىسىن جاساۋعا 24 ملن تەڭگە گرانت ۇسىندى.
اقپاراتقا سۇيەنسەك, تەحنولوگيانى مەتاللۋرگيا جانە قۇرىلىس وندىرىسىندە دە قولدانۋعا بولادى, دەپ جازادى «ينتەرفاكس-قازاقستان.
«قوقىس وڭدەۋدىڭ ازىرلەنگەن تەحنولوگياسى كوپجىلعى عىلىمي زەرتتەۋدىڭ ناتيجەسىندە سينتەزدەلگەن. جوبا الەۋمەتتىك سيپاتقا يە, ويتكەنى جوعارى بىلىكتى مامانداردىڭ جاڭا جۇمىس ورىندارىن اشۋعا باعىتتالعان. وڭدەلەتىن ءونىم تۇتاستاي ەكسپورتقا جونەلتىلەدى», – دەپ اتاپ ءوتتى «ەكوپرومتەحنولودجي» ديرەكتورى زاليفا گاراەۆا.
زاليفا گاراەۆانىڭ كەلتىرگەن دەرەگى بويىنشا, تەحنولوگيالىق شەشىمدى نەگىزىنەن ERG, «ارسەلورميتالل تەمىرتاۋ», «شۇباركول كومىر» كومپانيالارى قولدانباقشى.
«وڭدەلگەن قوقىستان پايدا بولعان ءونىمدى نەگىزگى تۇتىنۋشى اعىلشىننىڭ «BSSB» كومپانياسى. ول الدىن الا جاسالعان ىنتىماقتاستىق بويىنشا جىلىنا 40 مىڭ توننا ءونىم الۋعا دايىن وتىر», – دەيدى گاراەۆا.