«KEGOC» اق باق اراسىندا وتكەن شىعارماشىلىق بايقاۋدى قورىتىندىلادى

«KEGOC» اق جىل سايىنعى قازاقستاننىڭ ۇلتتىق ەلەكتر ەنەرگەتيكاسى جۇيەسىن دامىتۋ جانە «KEGOC» اق ينۆەستيتسيالىق جوبالارىنىڭ وزەكتى ماسەلەلەرىن جازعان ۇزدىك ماتەريالدارعا جاريالانعان رەسپۋبليكالىق جانە ايماقتىق باق اراسىنداعى شىعارماشىلىق بايقاۋدىڭ قورىتىندىسىن شىعاردى.

2016 جىلى بايقاۋ كوميسسياسىنىڭ قاراۋىنا بايقاۋ تاقىرىبىنا سايكەس قازاقستاندىق باق-تا (ينتەرنەت-باق قوسقاندا) جارىق كورگەن  96 جاريالانىم ۇسىنىلدى. ولاردىڭ ىشىنەن مازمۇنى جاعىنان بايقاۋدى وتكىزۋ تالاپتارىنا جاۋاپ بەرەتىن 42 ماتەريال تاڭداپ الىندى. بايانداۋ ەرەكشەلىگى مەن جانرلارىنا سايكەس, كاسىبي شەبەرلىكتەرىن, وزەكتىلىگىن, ماتەريالداردىڭ ماڭىزدىلىعىن ەسكەرە وتىرىپ, كوميسسيا بايقاۋدى وتكىزۋ تارتىبىنە سايكەس 9 (توعىز) اتالىمدى انىقتاپ, كەلەسى جۋرناليستەر مەن باسىلىمداردىڭ جۇمىسىن ۇزدىك دەپ تاپتى: 1) «جۇيەلىلىك جانە دەرەكتىلىك» اتالىمى بويىنشا – «ينتەرفاكس-قازاقستان» جاڭالىقتار پورتالىنىڭ رەداكتسياسى; 2) «وزەكتى جاريالانىم» اتالىمى بويىنشا – قىزعالداق ايتجانوۆا, «ورتالىق قازاقستان» قاراعاندى وبلىستىق گازەتىنىڭ ءتىلشىسى; 3) «بەلسەندى كوزقاراس» اتالىمى بويىنشا – «قازاقپارات» حالىقارالىق اقپارات اگەنتىگىنىڭ رەداكتسياسى; 4) «جەدەل اقپارات» اتالىمى بويىنشا – LS Aqparat اقپارات اگەنتىگىنىڭ رەداكتسياسى; 5) «ۇزدىك سالالىق تالداۋ» اتالىمى بويىنشا – «كۋرسيۆ» گازەتىنىڭ رەداكتسياسى; 6) «وزەكتىلىك» اتالىمى بويىنشا – ۆەنەرا گايفۋتدينوۆا, «Forbes.kz» ىسكەري جۋرنالىنىڭ ءتىلشىسى; 7) «ايماقتىق شولۋ» اتالىمى بويىنشا – يرينا ادىلقانوۆا, «ناشا جيزن» پاۆلودار وبلىستىق گازەتىنىڭ ءتىلشىسى; 8) «ۇزدىك جاريالانىم» اسەل مۇقانوۆا, «كازاحستانسكايا پراۆدا» رەسپۋبليكالىق گازەتىنىڭ ءتىلشىسى; 9) «اقپاراتتىق قولداۋ» اتالىمى بويىنشا – ايدار ورىسباەۆ, «ەگەمەن قازاقستان» رەسپۋبليكالىق گازەتىنىڭ ءتىلشىسى; بايقاۋ جەڭىمپازدارى باعالى سىيلىقتار مەن ەستەلىك ديپلومدارمەن ماراپاتتالدى.