قازاقستان پرەزيدەنتىنىڭ بىتىمگەرشىلىك ءرولى جوعارى
رەسەي جانە تۇركيامەن ءارىپتەستىگى تۇرعىسىنان قازاقستان ايماقتاعى احۋالدىڭ بەيبىت شەشىم تاپقانىن قولدايدى. سوندىقتان, استانا سيريا ماسەلەسىندە انكارا مەن ماسكەۋدىڭ ورتاق مامىلەگە كەلگەنىنە مۇددەلى. بىلتىر رەسەي مەن تۇركيا قاتىناسىنىڭ الشاقتاعان كەزىندە رەجەپ ەردوعان مەن ۆلاديمير پۋتين اراسىندا ديپلوماتيالىق قاتىناستىڭ قالپىنا كەلۋىنە قازاقستان پرەزيدەنتىنىڭ قوسقان ۇلەسى وراسان. وسى تۇرعىدا قازاقستاننىڭ سيريا ماسەلەسىندە دە ارااعايىندىق تانىتۋ ماقساتىندا جاساعان العاشقى قادامدارى الداعى ۋاقىتتا ءوز جەمىسىن بەرۋى ءتيىس. وسىدان بىرەر جىل بۇرىن الماتىدا وتكەن يراننىڭ يادرولىق باعدارلاماسى بويىنشا رەسمي تەگەران مەن گەرمانيا باستاعان بەستىكتىڭ كەلىسسوزى دە كەيىننەن يرانعا قارسى سالىنعان باتىس سانكتسيالارىنىڭ الىنىپ تاستالۋىنا العىشارت جاساعانى بەلگىلى. ال بيىلدان باستاپ قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە ءوتۋى ەلدىڭ حالىقارالىق ارەنادا تورەلىك ايتۋىنا تولىقتاي قۇقىق بەرەدى. ميحاەل لاۋبش, نەمىستىڭ ورتالىق ازيا ەلدەرى بويىنشا ساياسي ساراپشىسىرەسمي استانا ايماقتاعى تۇراقتىلىققا مۇددەلى
قازاقستاننىڭ سيرياداعى ساياسي داعدارىستا ارااعايىندىق تانىتۋى, ەڭ الدىمەن, بۇل ەلدىڭ ايماقتاعى بەيبىتشىلىكتى قالايتىنىن بايقاتسا كەرەك. بۇل تۇرعىدا رەسمي استانا باشار اساد رەجىمى مەن وپپوزيتسيانىڭ ءبىرىنىڭ سويىلىن سوعىپ وتىرعان جوق, استانانىڭ ماقساتى – سيريادا بەيبىتشىلىكتىڭ قايتا ورناۋى. وڭىردەگى ەڭ دامۋشى ەلدەردىڭ ءبىرى رەتىندە قازاقستانعا ايماقتاعى رەسەي, تۇركيا مەن باتىس ەلدەرى ىقپالىنىڭ تەپە-تەڭدىگى ماڭىزدى. سىرتقى ساياساتتا كوپۆەكتورلى باعىتتى ۇستانعان رەسمي استانا جوعارىدا اتالعان ەلدەردىڭ ەشقايسىسىمەن ديپلوماتيالىق قاتىناسىن بۇزىپ الماۋعا ۇمتىلادى. ەكىنشى جاعىنان, سيرياداعى راديكالدى ءتۇرلى توپتاردىڭ ايماقتاعى قاۋىپسىزدىككە كەدەرگى كەلتىرمەۋى ءۇشىن قازاقستان سيرياداعى جاعدايدى رەسەي, تۇركيا مەن يراننىڭ باقىلاپ وتىرۋىنا مۇددەلى. «يسلام مەملەكەتىنىڭ» (قازاقستاندا تىيىم سالىنعان) ورتالىق ازياعا تونگەن ەڭ باستى قاۋىپ ەكەنىن ەسكەرسەك, قازاقستان سيرياداعى احۋالدىڭ تەزىرەك رەتتەلۋى ءۇشىن قولدان كەلگەنىن جاسايدى. دجەلالاددين ياۆۋز, تۇركيانىڭ وتستاۆكاداعى پولكوۆنيگى, اسكەري ساراپشى, بۇرىنعى سىرتقى ىستەر ءمينيسترىاستانانىڭ جولى – ديپلوماتيا
سيرياداعى ساياسي داعدارىستى توقتاتۋ ءۇشىن, ەڭ الدىمەن, سيريا حالقىنىڭ بىرلىگى, قازىرگى رەسمي بيلىك باشار اساد رەجىمىنىڭ حالىقتى ءبىر قول استىنا توپتاستىرۋى كەرەك. حالىقارالىق قوعامداستىقتىڭ بۇل تۇرعىدا ەلدەگى ءتۇرلى توپتاردى جەكە-جەكە قولداعانىنان گورى, شىنىمەن دە ايماقتاعى بەيبىتشىلىكتى قالايتىن بولسا, رەسمي بيلىكتىڭ نىعايۋىنا مۇرشا بەرگەنى ءجون. بۇل تۇرعىدا قازاقستاننىڭ ەڭبەگىن اتاپ ءوتۋ كەرەك. ەلدەگى قانداي دا ءبىر ساياسي توپتىڭ سويىلىن سوعۋدىڭ ورنىنا, بارشا سيريا حالقىنىڭ بىرلىگى ءۇشىن وڭىرلىك دەرجاۆالاردىڭ باسىن بىرىكتىرە وتىرىپ, ورتاق ۇنقاتىسۋ الاڭىن ۇسىنۋى استانانىڭ سيريا ماسەلەسىنىڭ شەشىم تابۋىنا ىقپال ەتۋگە ۇمتىلاتىنىن كورسەتەدى. قازاقستاننىڭ سىرتقى ساياساتتاعى بەيبىت ۇستانىمى تۇركيا مەن رەسەيدىڭ وسى ماسەلەدە ءوزارا ىمىراعا كەلۋىنە جاعداي جاسايدى. جالپى, وڭىردەگى ساياسي ماسەلەلەردىڭ وڭ شەشىم تابۋى ءۇشىن قازاقستان باتىس ەلدەرىمەن دە ىنتىماقتاستىقتى ۇزبەك ەمەس. وعان استاناداعى شاراعا اقش ەلشىلىگىنىڭ قاتىسۋى دالەل.