بيىل ۇلتىمىزدىڭ ءبىرتۋار تۇلعالارى نەگىزىن سالعان, ءميللاتىنىڭ مۇددەسى ءۇشىن «تۇندە ۇيىقتاماي, كۇندىز وتىرماي», سول جولدا ءازيز جاندارىن قۇربان ەتسە دە, «الدا ءالى كۇندى كورەتىن ۇرپاق كەلەدى. سول كۇندى كورەتىن ۇرپاق سەندەردى ەسكە الاتىن بولادى. ءبىزدى ريزاشىلىقپەن, ۇلكەن قۇرمەتپەن ەسكە الاتىن بولادى!» دەپ بولاشاققا ۇمىتپەن كوز تىككەن «الاش» قوزعالىسى مەن الاش وردا اۆتونوميالى ۇكىمەتىنىڭ قۇرىلعانىنا 100 جىل تولادى. ەلىمىز ءۇشىن ماڭىزى ايرىقشا داتانى لايىقتى دەڭگەيدە اتاپ ءوتۋ ماقساتىندا شىعىس قازاقستاندا بىرقاتار رۋحاحي-مادەني ءىس-شارالار لەگى باستالىپ تا كەتتى. وسىنداي تاعىلىمى مول شارانىڭ ءبىرى رەتىندە وسكەمەندەگى پۋشكين اتىنداعى وبلىستىق كىتاپحانادا اشىلعان «الاش» قوزعالىسىنا – 100 جىل» اتتى كورمەنى ايتۋعا بولادى.
– بۇل كورمەگە ەكى اي بويى ازىرلەندىك. كىتاپحاناداعى الاش تاريحىنا قاتىستى دۇنيەلەردىڭ بارلىعىن سۇزگىدەن وتكىزدىك. ارنايى تاپسىرىس بەرىپ, الاش ارىستارىنىڭ پورترەتتەرىن جاساتتىق. مۇنىڭ ءبارى جۇرت الاش قايراتكەرلەرى تۋرالى ءبىلىپ جۇرسە, ەڭ بولماسا, سۋرەتتەرىن كورىپ, كوكەيلەرىنە تۇيسە دەگەن يگى ويدان تۋىنداعان ەدى, –دەيدى كىتاپحانانىڭ ولكەتانۋ سەكتورىنىڭ جەتەكشىسى زيزا مۇحتارحانوۆا.
ارنايى ستەندتەرگە توپتاستىرىلعان مۇراعاتتىق قۇجاتتاردى وسكەمەندەگى وبلىستىق مۇراعات ۇسىنىپتى. كىتاپحانا قىزمەتكەرلەرى بۇل كورمەنىڭ جىل سوڭىنا دەيىن جالعاساتىنىن ايتادى.
اسەم ومىربەكقىزى, ستۋدەنت:
– كورمەدەن ەرەكشە اسەر الدىم. الاش ارىستارى تۋرالى ءبىزدىڭ بىلمەيتىنىمىز كوپ ەكەن. قازاقتان شىققان تۇڭعىش ماگيستر جاقىپ اقپاەۆ جايىندا العاش رەت ەستىپ وتىرمىن. ول كىسىنىڭ سەمەيدى الاش وردانىڭ استاناسى رەتىندە ۇسىنعانىن جۇرتتىڭ كوبى بىلە بەرمەيدى دەپ ويلايمىن. «الاش» باعدارلاماسىن ازىرلەۋگە اتسالىسقان بارلىبەك سىرتانوۆ تۋرالى, ول كىسىگە ءاليحان بوكەيحانوۆتىڭ 1911 جىلى قازاقتاردىڭ كونستيتۋتسياسىن جازۋدى تاپسىرعانى سەكىلدى تىڭ دەرەكتەر كورمەدە مول ەكەن.
ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن اۆتور