جۇرگىزۋشىنىڭ كوپ جىل بويى ايىپپۇل تولەمەي كەلگەنى قايران قالدىرادى
وبلىستىق ىشكى ىستەر دەپارتامەنتى ءباسپاسوز قىزمەتىنىڭ وڭىرىمىزدە توعىز مىڭعا جۋىق تۇرعىننىڭ ايىپپۇل كولەمى 100 ميلليون تەڭگەدەن اسىپ كەتكەنى تۋرالى جاريالانىمى ءبىزدى ويلاندىرىپ تاستادى. ماقتاناتىن تسيفر دا, قىلىق تا ەمەس, ارينە. مەملەكەتتىك اۆتوينسپەكتسيا قىزمەتكەرلەرىن جەرگە قاراتاتىن دەرەك!
تاۋسىلا سويلەۋىمىزدىڭ سىرى مىنادا: جول ءتارتىبىن بۇزعان ءۇش تۇرعىن سوت شەشىمىمەن اكىمشىلىك قاماۋعا الىنعان. دۇرىس-اق. نە ءبۇلدىرىپ قويدى دەسەڭىز, تاڭدانىستان تالىپ ءتۇسۋىڭىز عاجاپ ەمەس. ماسەلەن, وبلىس ورتالىعىنىڭ ءبىر تۇرعىنى 2013 جىلدان بەرى جول قوزعالىسى ەرەجەسىن 14 رەت بۇزسا دا, جەلدەي جۇيتكىپ جۇرە بەرگەن. «ءاي» دەر اجەمىز, «قوي» دەر قوجامىزدىڭ» ورتاق ەرەجەنى قۇلاعىنا دا قىستىرمايتىن دوكەيىڭدى بۇگىنگە دەيىن زاڭ اياسىندا جازالاي الماعانى تاڭداندىرادى.
سوتقا دەيىنگى ىقپال ەتۋ, ماجبۇرلەۋ شارالارى تولىپ جاتىر ەمەس پە؟ 4 جىل بويى ەمىن-ەركىن ءجۇرۋىن جايشىلىقتا ساۋىسقانداي ساق ماي قايتىپ اڭعارماعان دەگەن ساۋال تۋادى. وۋ, جەردىڭ جارىعىنا ءتۇسىپ كەتپەگەن بولار؟ 200 مىڭ تۇرعىنى بار قالادان شومەلە ىشىندەگى ينەنى دە تاباتىن مەزگىل ەمەس پە؟ 70 مىڭ تەڭگە بەرەشەكتى تولەتتىرە الماي دىمى قۇرىعان ماي-دىڭ سوتقا قايىرىلۋى ءدارمەنسىزدىكتىڭ ءبىر بەلگىسى سياقتى.
«جەر استىنان جىك شىقتى, ەكى قۇلاعى تىك شىقتى» دەمەكشى, بۇدان دا سوراقى مىسالدى كەزىكتىرگەندە جۇرەگىمىز توقتاپ قالا جازدادى. تاعى ءبىر ازامات جول-كولىك ەرەجەسىن 29 رەت (!) بۇزىپ, قارىزى 400 مىڭ تەڭگەدەن اسىپ جىعىلعان. «اتىڭ شىقپاسا, جەر ورتە» دەگەن وسى! جازاتايىم گيننەستىڭ رەكوردتار كىتابىنا ەنىپ جاتسا, بۇل پاقىرىڭ الدىمەن اكىمشىلىك پوليتسيا قىزمەتكەرلەرىنە العىس ايتاتىن شىعار.
قۇقىق قورعاۋ ورگاندارىنىڭ ەسكەرتۋلەرىنە پىسقىرىپ قارامايتىن مۇنداي جاۋاپسىزداردىڭ جاۋىننان كەيىنگى ساڭىراۋقۇلاقتاي قاپتاپ كەتۋىن ءتارتىپ پەن تالاپتىڭ بوساڭسىعانىنان ىزدەگەن دۇرىس سەكىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى