تۇركيانىڭ سىرتقى ىستەر ءمينيسترى مەۆليۋت چاۆۋشوگلى وسىلاي دەپ مالىمدەدى, دەپ جازادى 24kz.
«استاناداعى القالى جيىندا قاتىسۋشى تاراپتار وق اتپاۋ تۋرالى ۋاعدالاستىقتى ودان ءارى نىقتاپ, بۇل ماڭىزدى كەلىسىمدى سيريانىڭ بارلىق ايماعىنا ەنگىزۋ جونىندە پىكىرلەرىمەن ءبولىستى. سونداي-اق ۇكىمەت پەن دالا كومانديرلەرىنەن تۇراتىن وپپوزيتسيالىق توپ وكىلدەرى سيريانىڭ الداعى كەلەشەگى مەن ساياسي ۇدەرىستەرى توڭىرەگىندەگى ۇستانىمدارىن ايقىندادى. ناتيجەسىندە سيريادا وق اتۋدى توقتاتىپ, ارانداتۋشىلىقتى بولدىرماۋ بويىنشا جۇيەنى قاداعالايتىن ۇشجاقتى مەحانيزم قۇرۋ تۋرالى كەلىسىمگە كەلدىك», - دەپ اتاپ ءوتتى تۇرىك سىرتقى ىستەر ۆەدومستۆوسىنىڭ باسشىسى.
ەكى كۇنگە سوزىلعان استاناداعى سيريا ماسەلەسىنە ارنالعان كەلىسسوزدى تۇرىك ساراپشىلارى دا ءجىتى باقىلادى.
احي ەۆران ۋنيۆەرسيتەتىنىڭ پروفەسسورى, ساياساتتانۋشى كۋرشاد زورلۋدىڭ ايتۋىنشا, استانا پروتسەسى 8 اقپاندا جوسپارلانعان جەنەۆاداعى جيىنعا جاڭاشا سەرپىن بەرمەك.
"استانا ارازداسقان ەلدەردى ەلدەستىرىپ, كۇن تارتىبىندەگى كۇرمەۋى شەشىلمەي تۇرعان كۇردەلى ماسەلەلەردى بەيبىت جولمەن رەتتەيتىن ديپلوماتيالىق الاڭعا اينالعالى قاشان؟! وسى جولى دا استانا بۇكىل الەمدى الاڭداتىپ وتىرعان سيرياداعى قانتوگىستى توقتاتىپ, ەلدە بەيبىتشىلىك پەن تۇراقتىلىقتىڭ ورناۋىنا تۇرتكى بولسا, وندا قازاقستاننىڭ جاھاندىق تۇراقتىلىق پەن ادامزات وركەنيەتىنە قوسقان كەزەكتى ۇلەسى بولاتىنى انىق. استانا پروتسەسى كەسكىلەسكەن قاقتىعىسقا قاتىسى بار تاراپتاردىڭ باسىن جيىپ, شيەلەنىستى ساياسي جولمەن شەشۋگە بارلىق مۇمكىندىكتى جاسادى. ەندى ونىڭ ناتيجەسى جەنەۆاداعى جيىندى تولىقتىرىپ, القالى وتىرىسقا جاڭاشا سەرپىن بەرەدى دەپ ويلايمىن", - احي ەۆران ۋنيۆەرسيتەتىنىڭ پروفەسسورى ساياساتتانۋشى: - كۋرشاد زورلۋ.