الماتىلىقتار ايتۋلى سپورت ءدۇبىرىنىڭ جاقىنداپ كەلە جاتقانىن انىق سەزىنۋدە. دۇيسەنبى كۇنى مەگاپوليستەگى «Dostyk Plaza» ساۋدا ويىن-ساۋىق ورتالىعىنىڭ الاڭىندا ستۋدەنتتىك جارىستاردىڭ ۆولونتەرلەرى اسەرلى فلەشموب وتكىزدى. جۇزدەگەن جاس لاتىننىڭ «U» ءارپى تۇرىندە ساپقا تۇرىپ, الدا كەلە جاتقان جارىستاردىڭ ۇراندارىن مانەرلەپ وقىپ شىقتى.
جۇرتتىڭ نازارىن ايتۋلى وقيعاعا بۇرۋدى كوزدەگەن قىزىقتى شاراعا ۆولونتەرلەردىڭ ەڭ بەلسەندى بولىگى تارتىلدى. ولاردىڭ باسىم بولىگى قازاقستاننىڭ جوعارى وقۋ ورىندارىنان, الايدا اراسىندا الىس جانە تاياۋ شەتەلدەن كەلگەن ازاماتتار دا بار.
«ءبىزدىڭ ۆولونتەرلار – ءبىرىنشى كەزەكتە ۋنيۆەرسيادانىڭ كوڭىل اۋانىن جاسايتىن جىگەرلى جاستار. ەندەشە, قىز-جىگىتتەرىمىزدىڭ قوناقتاردى قارسى الۋعا دايىن ەكەنىن كورسەتكىمىز كەلدى. فلەشموبتار كومەگىمەن ءبىزدەر ۇلكەن دودانى اتقارىپ سالۋعا كىرىسكەن مەملەكەتىمىزدىڭ مەرەيىن اسىرا تۇسكىمىز كەلەدى. سونداي-اق, مۇنداي ءىس-شارالار جاستاردى بىرىكتىرىپ, كوماندالىق رۋحتى كوتەرەدى», – دەدى «2017 جىلعى الماتىداعى XXVIII دۇنيەجۇزىلىك قىسقى ۋنيۆەرسياداعا دايىندالۋ جانە وتكىزۋ جونىندەگى ديرەكتسيا» مق ەرىكتىلەرمەن جۇمىس ءجۇرگىزۋ دەپارتامەنتىنىڭ باسشىسى ابىلاي قوندىباەۆ.