الماتىداعى ۋنيۆەرسياداعا ەرىكتى رەتىندە 3 مىڭ ادام تارتىلاتىنىن, ونىڭ ىشىندە وتانداستارىمىزدان بولەك, اينالاداعى كورشىلەرىمىزدەن كومەكشى بولۋعا ىنتا ءبىلدىرگەندەردىڭ جەتكىلىكتى ەكەنىن بايانداعانبىز.
بۇل كۇندەرى ۆولونتەرلاردىڭ بارلىعى دەرلىك كەز كەلگەن اۋا رايىندا كيىپ جۇرۋگە ىڭعايلى كيىمدەر مەن كەرەك-جاراقتارعا يە بولدى. قازىردىڭ وزىندە ۇيىمداستىرۋ شارالارىنا قاتىسا باستاعان ەرىكتىلەر ءبىر-بىرىمەن تانىسىپ, ءبىر ماقسات جولىنا جۇمىلا كىرىسۋگە دايىن.
ۆولونتەرلارعا عانا ەمەس, ۋنيۆەرسيادا-2017 ۇيىمداستىرۋشىلارىنا, تەحنيكالىق ماماندار مەن تورەشىلەرىنە ارنايى كيىم-كەشەك تىگۋگە «التىن جۇلدىز Textile» فابريكاسى تاڭدالىنىپ الىنعان.
«التىن جۇلدىز Textile» فابريكاسىنىڭ ديزاينەرلەرى مەن تەحنولوگتارى قىسقى ۋنيۆەرسيادانىڭ ۇيىمداستىرۋ كوميتەتىمەن بىرلەسە وتىرىپ, بۇل كيىمدەردى اشىق ءارى ىڭعايلى ەتىپ تىگۋگە بارىن سالعان.
– ماسەلەن, ۆولونتەرلەر كۇرتەشەسى ۋنيۆەرسيادا قوناقتارى مەن قاتىسۋشىلارىنىڭ كوزىنە بىردەن شالىناتىنداي ەتىپ اشىق جاسىل ءتۇستى بولىپ تىگىلدى. اشىق تۇستەر قىسقى ۋنيۆەرسيادانى وتكىزىپ وتىرعان ەل – قازاقستاننىڭ جايدارلىلىق سياقتى قاسيەتتەرىن ايشىقتايدى. وعان قوسا, بۇل كيىم جاستارعا دا جاقسى جاراسادى, – دەيدى ديزاينەر زارينا ءىلياسوۆا.
ارناۋلى كيىم تەحنولوگى لۋيزا نۇرعاليەۆا جارىستار مەن ۇيىمداستىرۋ جۇمىستارى كوبىنەسە دالادا وتەتىندىكتەن, الماتىنىڭ كليماتتىق ەرەكشەلىگى ەسكەرىلگەنىن ايتادى.
وسىعان قوسا, ەرىكتىنىڭ ۋنيفورماسى قاجەتتى بارلىق كيىممەن قامتاماسىز ەتىلگەن, ونىڭ ىشىندە كۇرتە, كومبينەزون, كەڭجەيدە, قولعاپ, بوكەباي جانە تىماق بار. سونداي-اق, ەرىكتىگە ريۋكزاك دا بەرىلدى. كيىم جيىنتىعىنىڭ بارلىعىندا ۋنيۆەرسيادا-2017 جانە فيسۋ لوگوتيپتەرى, الماتى قالاسىنىڭ برەندى, ەكسپو لوگوتيپتەرى جانە ۋنيۆەرسيادا سەرىكتەسى – «سامۇرىق-قازىنا» اق لوگوتيپى بەينەلەنگەن.