ءبىز بۇعان دەيىن دە ۋنيۆەرسيادا سالتاناتىنا وراي الماتىداعى بارشا ساۋدا ورتالىقتارى تاۋارلارىن ارزانداتىپ, تۋريستەر تارتۋعا سەپتىگىن تيگىزەتىنى تۋرالى حابارلاعان ەدىك. جۇما, ياعني 20 قاڭتاردا باستالعان اۋقىمدى جەڭىلدىكتەر جارمەڭكەسىنە الماتىداعى 200-دەن استام ساۋدا ورتالىقتارى مەن دۇكەندەر جەلىسى قوسىلدى.
اپتانىڭ سوڭعى جۇمىس كۇنىندە قالا اكىمى باۋىرجان بايبەك باق وكىلدەرىمەن بىرگە جەڭىلدىكتەر فەستيۆالىنە قاتىساتىن بىرقاتار ساۋدا ورىندارىن ارالاپ شىقتى.
الداعى 10 اقپانعا دەيىن جالعاساتىن «Almaty Sales Festival – Winter-2017» فەستيۆالىنە الەمگە تانىمال 500-گە جۋىق برەندتى ۇسىناتىن ءارى «street retail» فورماتىندا جۇمىس ىستەيتىن 100 ساۋدا ورتالىعى, 100 دۇكەن قاتىسۋدا. الماتىلىقتار مەن قالا قوناقتارى كيىمدەردى 80 پايىزعا دەيىنگى جەڭىلدىكتەرمەن ساتىپ الا الادى. سونىمەن قاتار, كوسمەتيكانى 20 پايىزعا دەيىنگى, زەرگەرلىك بۇيىمداردى 40 پايىزعا دەيىنگى, تۇرمىستىق تەحنيكا مەن باسقا تاۋارلار دا ارزان باعامەن بوساتىلماق.
وتاندىق ساۋدا ماركالارى دا ۋنيۆەرسيادا – قالا مەن الماتىلىق كاسىپكەرلەر ءۇشىن ماڭىزدى جوبا ەكەنىن العا تارتىپ, جەڭىلدىكتەر فەستيۆالىنە قولداۋ كورسەتۋ ارقىلى ءوز ۇلەستەرىن قوسا الاتىندارىنا ماقتانادى.
تاۋارلاردىڭ ارزانداتىلعانىن ەستي سالا, مۇنداي مۇمكىندىكتى جىبەرىپ الماۋعا ۇمتىلعاندار اراسىندا تانىمال ونەر جۇلدىزدارى دا تابىلدى.
«ءبىز بارلىعىمىز ۋنيۆەرسيادانى اسىعا كۇتۋدەمىز. سپورتشىلارىمىزعا قولداۋ كورسەتۋ ءۇشىن مىندەتتى تۇردە جانكۇيەر بولامىز. جەڭىلدىكتەر فەستيۆالى تۋرالى ەستي سالا, ۇناتقان كيىمدەردى الۋدى ءجون كوردىك. ءبىز العان تاۋارلار قونىمدى, سپورت نىساندارىنىڭ ىشىندە كيىپ جۇرۋگە قولايلى», – دەيدى RIN’GO توبىنىڭ ءسوليسى دانيار وتەگەن جانە ءانشى ءمادينا سادۋاقاسوۆا.
سول سياقتى, ساۋدا ورتالىقتارىندا ءتۇرلى تاقىرىپتىق شارالار, قولونەرشىلەر ءجارمەڭكەسى, قازاقستاندىق ديزاينەرلەردىڭ كورمەسى, بالالار ءۇشىن شەبەرلىك سىنىپتارى, كونتسەرتتىك باعدارلامالار ۇيىمداستىرىلۋدا.
«ءبىز راديودان قالادا جەڭىلدىكتەر فەستيۆالىنىڭ باستالعانىن ەستي سالا قۇربىم ەكەۋمىز بىردەن دۇكەن ارالاۋعا شىقتىق. قىزىعىپ جۇرگەن تاۋاردى ارزان باعاعا ساتىپ الۋ دا قۋانىش», – دەدى ايسۇلۋ اتتى ستۋدەنت قىز.
«MEGA Alma-Ata» ساۋدا ورتالىعىندا بولعان قالا اكىمى ۋنيۆەرسياداعا بيلەت ساتاتىن كاسساعا دا باردى. ول جەردەگىلەر كونكيمەن مانەرلەپ سىرعاناۋعا, حوككەيگە قىزىعۋشىلىقتىڭ كوپ ەكەندىگىن, ال قازاقستاندىق حوككەيشىلەردىڭ ويىندارىنا بيلەتتەردىڭ تۇگەل ساتىلىپ كەتكەندىگىن, ورىننىڭ جوقتىعىن ايتتى. جالپى, بۇگىنگى كۇنگە دەيىن 200 مىڭ بيلەتتىڭ 86 مىڭى ساتىلعان.
الماتى