قازىرگى تاڭدا مەكتەپكە دەيىنگى مەكەمەلەردەگى ورىنداردىڭ بولىنۋىنە تۇرعىندار تاراپىنان ازداعان سەنىمسىزدىك تۋىنداۋدا. قۇقىق قورعاۋ جانە باقىلاۋ ورگاندارىنىڭ جۇرگىزىپ وتىرعان قاتاڭ قاداعالاۋىنا قاراماستان, حالىقتىڭ باسىم بولىگى بالاباقشاعا بالا قابىلداۋ كەزەگىنىڭ نە سەبەپتى العا جىلجىماي جاتقاندىعىن تۇسىنبەيدى. وسى ماسەلەگە بايلانىستى قاراعاندى وبلىسىندا بالاباقشاعا ەلەكتروندى كەزەككە تۇرۋ جوباسى ازىرلەنىپ جاتىر.
قاراعاندى وبلىسى ءبىلىم بەرۋ باسقارماسىنىڭ باسشىسى اسحات ايماعامبەتوۆ ايتىپ وتكەندەي, قازىرگى تاڭدا 1 جاستان 6 جاسقا دەيىنگى بالالاردىڭ 87,6 پايىزى جانە 3 پەن 6 جاس ارالىعىنداعى ءبۇلدىرشىندەردىڭ 98 پايىزى مەكتەپكە دەيىنگى ءبىلىم بەرۋ جۇيەسىمەن قامتىلعان. جوبا اياسىندا ەندى حقو ارقىلى مەكتەپكە دەيىنگى مەكەمەلەرگە بالالاردى اۆتوماتتى تۇردە كەزەككە تۇرعىزىپ قانا قويماي, بالاباقشالارداعى ورىنداردىڭ ءبولىنۋى دە جۇزەگە اسىرىلادى دەپ جوسپارلانۋدا. بۇل اتالعان قىزمەتتەرگە ادامداردىڭ تىكەلەي بايلانىسىنا شەكتەۋ قويادى. ايماق تۇرعىندارى تولىق اقپارات الۋى ءۇشىن بەلگىلى ءبىر مەكتەپكە دەيىنگى مەكەمەدەگى توپ قۇرامىنىڭ تولىقتىرىلۋى, بوساعان ورىندار تۋرالى ءمالىمەتتەر, كەزەكتىلىك پەن رەيتينگ جاعدايى ونلاين رەجىمدە كورسەتىلەتىن بولادى.
كەزەكتىلىك جاعدايى جايلى توقسان سايىنعى سمس-حابارلاما جولداۋدى دا قاراستىرىپ وتىر. سونىمەن قاتار, سمس-حابارلاما مەكتەپكە دەيىنگى ۇيىمدارعا ەسەپكە تۇرۋ جانە ودان ورىن الۋ كەزىندە دە جىبەرىلەتىن بولادى.
قاراعاندى وبلىسىندا بالاباقشاعا ەلەكتروندى كەزەككە تۇرۋ جوباسىن وسى جىلدىڭ اياعىنا دەيىن ءبىلىم بەرۋ بولىمدەرىنىڭ سايتىندا جاريالاۋ جوسپارلانعان.
ميراس اسان,
«ەگەمەن قازاقستان»
قاراعاندى