زاڭ بەلگىلى ءبىر ەلدىڭ حالقىنا قىزمەت ەتىپ, الاڭسىز ءومىر ءسۇرۋى ءۇشىن جوعارى تۇرعان ورگانداردان بەكىتىلىپ شىعارىلادى. ول زاڭدى بۇلجىتپاي ورىنداۋ – ءاربىر ازامات پەن ازاماتشانىڭ بورىشى. بىراق سوڭعى بىرنەشە جىلدا پايدالانىلعان ەلەكتر قۋاتى مەن بايلانىس قۇنى تىم قىمباتتاپ كەتتى. ونى قىمباتتاتاتىنداردىڭ قانداي زاڭعا ارقا سۇيەيتىندەرى تاعى بەيمالىم.
ماسەلەن, اقسەڭگىر اۋىلىندا 100 تەلەفون نۇكتەسى مەن 750 وتباسى بار دەسەك, ونى پايدالانعانى ءۇشىن تولەم ءار اي سايىن 42 500-85 000 تەڭگە, جىلىنا 510 000-1 020 000 تەڭگە بولادى ەكەن. ال اۋدان, وبلىس, مەملەكەت كولەمىندە عارىشتىق سوما شىعاتىنى تاعى انىق. ۇستەمە تەڭگە الۋ ءتاسىلى بانككە اقشا سالساڭ دا قولدانىلادى. ال بانكتەن كرەديت الساڭ, ءوسىمنىڭ كوكەسىن كورەسىڭ. مەن ءبىر جىلدىق مەرزىممەن 500 000 تەڭگە الىپ ەدىم, ايىنا 54 600 تەڭگە تولەيمىن. سوندا ءبىر جىلدا 655 200 تەڭگە تولەيدى ەكەنمىن. قالتا قاعار وسىنداي مولشەرلەمە تاسىلدەرى ءادىل مە؟ قوعام ءىسىنىڭ ءبارى ادام ءۇشىن جاسالۋى ءتيىس ەمەس پە؟
ءاربىر وبلىس اكىمى, ءار مينيستر نەمەسە قولىندا بيلىگى بارلار قالتا قاعارلىق شەشىمدەر شىعارا بەرسە, «زاڭدا تارماق كوپ بولسا, پاراعا قارماق كوپ بولادى» دەگەندەي, جەمقورلىق ءتۇرى دە كوبەيەرى ايان.
بىراق مىنانىڭ ىزدەگەنى وسەك, ويلايتىنى ەسەپ ەكەن دەمەڭىزدەر! بۇل قالتالىعا كۇلكى بولسا دا, قالتاسىزداردىڭ مۇلكى بولارى حاق. «اقيقات ادامعا جاقپاعانمەن اللاعا جاعادى» دەگەندەي, ءتيىستى مەكەمەلەر مەن ۇيىمدار, بيلىك ورىندارى ادام مەن ونىڭ بولاشاعى ءۇشىن قىزمەت ەتسە ەكەن دەگەن تىلەك, ۇسىنىسىم بار.
وكەي ۇرىمحان ۇلى
الماتى وبلىسى,
جامبىل اۋدانى