ارقالى اقىندى ەسكە الۋ شىعارماشىلىق كەشى ءوتتى
اقىننىڭ وسكەن ورتاسى – اياۋلى ايىرتاۋ اتىرابى, سىرلى سىرىمبەت, ەركە ەسىل جاعاسى, سىمباتتى ساۋمالكول, جاۋھازداي جالعىزتاۋ, قاسيەتتى قوسكول, قامىساقتى بويى. جالعان دۇنيەگە شىر ەتىپ كەلىپ, كىندىگى كەسىلگەن تۋعان جەرى, ۇكىلى ىبىراي, ءبىرجان سال, اقان سەرى, سىرباز ساكەن سەكىلدى كومەيلەرىنەن جىر توگىلگەن تالانتتىلار شوعىرى ونىڭ قيالىن قاناتتاندىرىپ, جان سارايىن سۇلۋلىققا قۇشتار ەتتى. ءومىرى ولەڭمەن ءورىلىپ, اۋەنى انگە ۇلاسقان تۋما تالانت يەسى كەشەگى سال-سەرىلەردىڭ سۇرلەۋ جولىن جالعاپ, ەلىن, جەرىن جۇرەگىمەن جىرلاپ ءوتتى. جىرلارى مەن اندەرى ارتىنا وشپەس مۇرا رەتىندە قالىپ, حالىق جۇرەگىنە ۇيالادى. كوزى تىرىسىندە «قازاق پوەزياسىنىڭ جەزكيىگى» اتانعان كورنەكتى اقىن كاكىمبەك سالىقوۆتىڭ 85 جىلدىعى قاسيەتتى قىزىلجار وڭىرىندە كەڭىنەن اتاپ ءوتىلىپ, اقىندىق, قايراتكەرلىك, كومپوزيتورلىق تۇلعاسىنا جان-جاقتى باعا بەرىلدى.
ن.پوگودين اتىنداعى ورىس دراما تەاترىندا وتكەن «ۇلت ءۇشىن ۇلىتاۋداي ۇلى قازاق» اتتى شىعارماشىلىق كەشكە ەلىمىزدىڭ ءار تۇكپىرىنەن قادىرلى قوناقتار, قازاقستان جازۋشىلار وداعى توراعاسىنىڭ ورىنباسارى جاناربەك ءاشىمحان, مارقۇمنىڭ ۇلى ەرلان, نەمەرەسى دينارا, تۋعان-تۋىستارى ارنايى كەلدى. وبلىس اكىمىنىڭ ءبىرىنشى ورىنباسارى ايداربەك ساپاروۆ قازاقتىڭ اياۋلى پەرزەنتىنىڭ تاعىلىمعا تولى ءومىرى مەن قىزمەتىنە توقتالىپ, ءسولتۇستىكقازاقستاندىقتار ءۇشىن ورنى بولەك, ەرەكشە ەكەنىن, ەسىمى اركەز ماقتانىشپەن اتالاتىنىن, ەسكە الۋ كەشى داستۇرگە اينالاتىنىن جەتكىزدى. كەش اسەرلى اڭگىمەلەرگە, ەسكىرمەيتىن ەستەلىكتەرگە, سازدى اۋەندەرگە تولى بولدى. ايتىستىڭ اقتاڭگەرى امانجول التاەۆ «ارناۋىندا» كەستەلى جىر شۋماقتارىن توگىلدىردى.
ولگەنشە وزەگىنەن ولەڭ ءورىپ,
ومىرگە جىر قازانى قايناپ كەلدى.
قازاعىم كۇندە تۋماس كاكىمبەكتەي,
قانىشتىڭ ءىزىن باسقان قايراتكەردى,
دەپ سۋىرىپسالما ماشىعىمەن ونەرسۇيەر قاۋىمدى ءبىر سىلكىندىردى.
قازاقستاننىڭ ەڭبەك سىڭىرگەن ءارتىسى قاپاش ق ۇلىشەۆا ءوز سوزىندە «مەن قازاقتىڭ ءبىرتۋار پەرزەنتىمەن 1976 جىلى تانىستىم. ءان الەمىنە قۇمارتىپ ءجۇرگەنىمدى بايقاپ, ۇلكەن ساحنالاردان كورىنۋىمدى ۇنەمى قولداپ ءجۇردى. ونىڭ «ءبىر اۋىز ءسوز», «اڭساۋ», «سارىارقا», «اققۋ جەتكەن», تاعى باسقا ليريكالىق جىرلارى مەن اندەرىندە ادام مەن تابيعاتتىڭ ىشكى ۇندەستىگى كەرەمەت ۇيلەسىم تاپقان» دەي كەلىپ, «جەزكيىك», «قالدىرعان» اندەرىمەن جينالعانداردىڭ قۇلاق قۇرىشىن قاندىردى. كاكەڭنىڭ سارىارقانىڭ ءتوسىندە جەزكيىكتەي جۇيتكىگەن كۇمىس قانات جىرلارىنا كوپتەگەن كورنەكتى كومپوزيتورلار ءان جازعان. سولاردىڭ ءبىرى, جاعىپار ءالىمحانوۆ كاكەڭە ارناعان «ساعىنىش» كۇيىن كۇمبىرلەتە ورىنداپ بەردى. ونىڭ نەمەرەسى, حالىقارالىق «شابىت بايقاۋىنىڭ» لاۋرەاتى ساكەن ءالىمحانوۆ, قازاقستاننىڭ ەڭبەك سىڭىرگەن ءارتىسى سەرىك وسپانوۆ, جىر ءمۇشايراسىنىڭ «گران پري» جۇلدەسىنىڭ يەگەرلەرى, اقىندار ەرلان ءجۇنىس, باۋىرجان قاراعىزدىڭ ءان, جىر شاشۋلارىن جۇرتشىلىق رياسىز سەزىممەن قابىلدادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
سۋرەتتەردى تۇسىرگەن
تالعات تانىباەۆ