قازاق كۇرەسى بيىل اشحابادتا وتەتىن ازيا ويىندارىنىڭ باعدارلاماسىنا ەنگىزىلدى. بۇل تۋرالى بلوگەر عالىم بايتۇك Facebook-تەگى پاراقشاسىندا جازدى, دەپ حابارلايدى Baq.kz.
«ءسۇيىنشى, دوستار! ءبىزدىڭ ۇلتتىق كۇرەسىمىز – قازاق كۇرەسى اشحابادتا بيىل وتەتىن ازيا ويىندارىنىڭ باعدارلاماسىنا العاش رەت ەندى! تانىمال 22 سپورت تۇرىمەن قاتار 70 كەلى, 90 كەلى, +90 كەلى سالماق دارەجەلەرىندە قازاق كۇرەسىنەن بەلدەسۋلەر بولادى. ول ءۇشىن 2004 جىلدان باستاپ بۇگىنگە دەيىن سەرىك تۇكيەۆ باستاعان بۇكىلالەمدىك قازاق كۇرەسى فەدەراتسياسى قىرۋار جۇمىس اتقاردى», – دەپ جازدى عالىم بايتۇك.
ونىڭ ايتۋىنشا, 12 جىلدىڭ ىشىندە 50-گە تارتا ەلدەن سپورتشىلار قاتىسقان 6 الەم چەمپيوناتى, 11 ازيا چەمپيوناتى, 3 الەم كۋبوگى, 3 ەۋروپا مەن افريكا چەمپيوناتى وتكىزىلدى.
«2015 جىلى قازاق كۇرەسى UWW (United World Wrestling – بىرىككەن الەمدىك كۇرەس وداعى) قۇرامىنا كىرە وتىرىپ, ەرەكشە مارتەبە الدى. 19 قاڭتار كۇنى UWW پرەزيدەنتى نەناد لالوۆيچ پەن ازيا وليمپيادا كەڭەسىنىڭ پرەزيدەنتى شەيح احمەد ءال-فاحاد ءال-احمەت ءال ساباح اراسىندا 70 كەلى, 90 كەلى, +90 كەلى سالماق دارەجەلەرىندە قازاق كۇرەسىن 2017 جىلى ازيا ويىندارىنىڭ باعدارلاماسىنا ەنگىزۋ تۋرالى كەلىسىمگە قول قويىلدى», – دەپ تولىقتىردى بلوگەر.