ەحرو-2017 حالىقارالىق مامانداندىرىلعان كورمەسى وتەتىن كەزدە ىشكى ىستەر ورگاندارىنىڭ قىزمەتكەرلەرى, ءىىم وقۋ ورىندارىنىڭ كۋرسانتتارى, قورعانىس مينيسترلىگىنىڭ اسكەري قىزمەتكەرلەرى جانە مەملەكەتتىك ەمەس كۇزەت قۇرىلىمدارىنىڭ قىزمەتكەرلەرى, بارلىعى 9 مىڭعا جۋىق ادام قوعامدىق ءتارتىپتى قاداعالاۋعا جانە قاۋىپسىزدىكتى ساقتاۋعا جۇمىلدىرىلادى. بۇل تۋرالى استانا اكىمدىگىنىڭ ءباسپاسوز قىزمەتى حابارلادى.
قازىرگى ۋاقىتتا كورمە كەشەنىنىڭ اۋماعىندا نىسانداردىڭ قۇرىلىسى جانە پايدالانۋعا تاپسىرۋ كەزەڭىندە ەلوردالىق ءىىد 100-دەن اسا قىزمەتكەرى, ۇلتتىق ۇلان جاۋىنگەرلەرى قاۋىپسىزدىكتى تاۋلىك بويعى رەجىمدە قامتاماسىز ەتۋدە, ولارعا باقىلاۋ-وتكىزۋ رەجىمىن ۇيىمداستىرۋ جانە جاياۋ پاترۋلدەۋ قىزمەتتەرى جۇكتەلگەن.
كورمە قالاشىعىندا ۋچاسكەلىك پوليتسيا بەكەتى جۇمىس ىستەيتىن بولادى, وندا 6 ۋچاسكەلىك پوليتسيا ينسپەكتورى قىزمەت اتقارادى.
سونىمەن قاتار, كورمەنىڭ لوگيستيكالىق ورتالىعى دا قولدانىسقا ەنگىزىلەدى, وندا اۆتوكولىكتەردى تەكسەرۋ ەكى ءموبيلدى ينسپەكتسيا-تەكسەرۋ كەشەنىمەن جۇرگىزىلەدى. 16 پوليتسيا قىزمەتكەرى كىرەتىن كەشەندەردىڭ پەرسونالى ارنايى وقىتىلدى, سونىڭ ىشىندە رادياتسيالىق قاۋىپسىزدىكتى قامتاماسىز ەتۋ بويىنشا دا دايىندىقتان ءوتتى.
استانادا وتەتىن ەحرو-2017 حالىقارالىق مامانداندىرىلعان كورمەسى 2017 جىلدىڭ 10 ماۋسىمىندا اشىلىپ 10 قىركۇيەككە دەيىن جالعاسادى. پاۆيلونداردى دايىنداۋعا 100-دەن اسا مەملەكەت پەن 10-نان اسا حالىقارالىق ۇيىم قاتىسادى.