ەحرو-2017 حالىقارالىق مامانداندىرىلعان كورمەسى وتەتىن كەزدە ىشكى ىستەر ورگاندارىنىڭ قىزمەتكەرلەرى, ءىىم وقۋ ورىندارىنىڭ كۋرسانتتارى, قورعانىس مينيسترلىگىنىڭ اسكەري قىزمەتكەرلەرى جانە مەملەكەتتىك ەمەس كۇزەت قۇرىلىمدارىنىڭ قىزمەتكەرلەرى - بارلىعى 9 مىڭعا جۋىق ادام قوعامدىق ءتارتىپتى قاداعالاۋعا جانە قاۋىپسىزدىكتى ساقتاۋعا جۇمىلدىرىلادى, - دەپ حابارلايدى استانا اكىمدىگىنىڭ ءباسپاسوز قىزمەتى.
قازىرگى ۋاقىتتا كورمە كەشەنىنىڭ اۋماعىندا نىسانداردىڭ قۇرىلىسى جانە پايدالانۋعا تاپسىرۋ كەزەڭىندە ەلوردالىق ءىىد 100-دەن اسا قىزمەتكەرى, ۇلتتىق ۇلاننىڭ جاۋىنگەرلەرى قاۋىپسىزدىكتى تاۋلىك بويعى رەجىمدە قامتاماسىز ەتۋدە. ولارعا باقىلاۋ-وتكىزۋ رەجيمىن ۇيىمداستىرۋ جانە جاياۋ پاترۋلدەۋ قىزمەتتەرى جۇكتەلگەن.
كورمە قالاشىعىندا ۋچاسكەلىك پوليتسيا بەكەتى جۇمىس ىستەيتىن بولادى. وندا 6 ۋچاسكەلىك پوليتسيا ينسپەكتورى قىزمەت اتقارادى.
سونىمەن قاتار, كورمەنىڭ لوگيستيكالىق ورتالىعى دا قولدانىسقا ەنگىزىلەدى. وندا اۆتوكولىكتەردى تەكسەرۋ ەكى ءموبيلدى ينسپەكتسيا-تەكسەرۋ كەشەنىمەن جۇرگىزىلەدى. 16 پوليتسيا قىزمەتكەرى كىرەتىن كەشەندەردىڭ پەرسونالى ارنايى وقىتىلدى. سونىڭ ىشىندە رادياتسيالىق قاۋىپسىزدىكتى قامتاماسىز ەتۋ بويىنشا دا دايىندىقتان ءوتتى.
سونىمەن بىرگە, ەحرو-2017 حالىقارالىق كورمەسى قارساڭىندا قالا ماڭىن قوسا العاندا تاعى دا ەكى مىڭنان اسا بەينەكامەرا ورناتۋ جوسپارلانىپ وتىر.
بۇگىنگى كۇنى ەلوردادا 800-گە جۋىق بەينەباقىلاۋ كامەراسى بار. بۇل ءتارتىپ ساقشىلارىنىڭ قىلمىستاردىڭ الدىن الۋ جانە ولاردى اشۋ بويىنشا جۇمىسىن ەداۋىر جەڭىلدەتەدى.
سونىمەن بىرگە, 80 كوشە قيىلىسىندا, 50 جەلىلىك ۋچاسكەدە فوتو جانە بەينەتىركەۋ كەشەندەرىن ورناتۋ كوزدەلگەن.