قازاقستان تەڭىز مۇنايىنىڭ 15% ىشكى نارىققا باعىتتالۋى مۇمكىن, دەپ حابارلادى ەنەرگەتيكا مينيسترلىگىنىڭ ءباسپاسوز قىزمەتى.
«ىشكى نارىققا مۇنايدى جەتكىزۋ ءونىمدى ءبولىسۋ تۋرالى كەلىسىمدە قاراستىرىلعان. وعان سايكەس, مەملەكەت ىشكى تاپشىلىق بولعان جاعدايدا, قاجەتتىلىكتى قاناعاتتاندىرۋ ءۇشىن مەردىگەردەن مۇنايدىڭ 15% دەيىنگى كولەمىن الۋعا قۇقىلى», – دەلىنگەن حابارلامادا.
ايتا كەتەيىك, قازىرگى ۋاقىتتا 27 ميلليون توننا جەڭىل مۇناي ءوندىرىلىپ جاتىر. ال وتكەن جىلى كەن ورنىندا ءۇشىنشى بۋىن زاۋىتىنىڭ قۇرىلىسى باستالعان. ونىڭ قۇرىلىسى اياقتالعان سوڭ, تەڭىزدەگى مۇناي ءوندىرىسى جىلىنا 37 ملن تونناعا جەتەتىن بولادى. وتاندىق مۇناي وڭدەۋ زاۋىتتارىندا شيكىزاتقا دەگەن تاپشىلىقتىڭ بولماۋىنا بايلانىستى, تەڭىزدىڭ بارلىق مۇنايى ەكسپورتقا جىبەرىلەدى.