پرەزيدەنتتىككە كانديدات, «تابيعات» ەكولوگيالىق وداعىنىڭ توراعاسى مەلس ەلەۋسىزوۆتى بۇل كۇندەرى ءبىر جەردەن ۇستاۋ قيىن. سوڭعى كۇندەردە عانا ول بىردە ەلىمىزدىڭ قيىر وڭتۇستىگىندە بولسا, كەلەسى كۇنى قيىر شىعىسىندا بولىپ, ودان استانا اسىپ, ءوزىنىڭ تۇراقتى مەكەنى الماتىعا ناۋرىز مەرەكەسى كۇندەرى عانا كەلگەنمەن, مۇندا دا تالاي جۇرت كۇتىپ تۇرعاندىقتان, ۇيىندە ءبىر ءسات كىدىرە المايدى.
ول جولدان كەلگەننەن كەيىن بىردەن مۇگەدەكتەردىڭ ءتۇرلى قوعامدىق بىرلەستىكتەرىنىڭ وكىلدەرىمەن كەزدەستى. ءبارىنىڭ دە ۇسىنىس-پىكىرلەرىن تىڭدادى. ولار الەۋمەتتىك جانە قۇقىقتىق قورعاۋعا مۇقتاج. ولارعا ءوز مۇمكىندىگىنە وراي جۇمىس كەرەك. مەملەكەت تاراپىنان بەرىلەتىن كومەك قاجەتتى وتەي بەرمەيدى. ال سول مۇگەدەكتەردىڭ, مۇمكىندىكتەرى شەكتەۋلى ادامداردىڭ اراسىندا قابىلەتى جوعارى ادامدار كوپ. ءتىپتى, «بولاشاق» باعدارلاماسىن بىتىرگەندەر دە بار ەكەن. تەك ولاردىڭ مۇمكىندىكتەرىن جان-جاقتى ەسكەرە وتىرىپ, جاعداي جاساۋ عانا كەرەك. پرەزيدەنتتىكتەن ۇمىتكەردىڭ پىكىرىنشە, بۇل ءۇشىن ەڭ الدىمەن مۇگەدەكتەردىڭ قۇقىقتارى جان-جاقتى ەسكەرىلگەن زاڭ قابىلداعان ءجون. الداعى ۋاقىتتا بۇل زاڭدى ازىرلەۋ ءوزىنىڭ نازارىندا بولاتىنىن ايتتى.
ەلىمىزدىڭ باس ەكولوگى قاشان دا جۋرناليستەر قاۋىمىنا جاقىن جۇرەدى. رەسەيلىك جۋرناليستەر ونىمەن كەزدەسۋدى قالاعان ەكەن, مەلس حامزا ۇلى ولاردى اتتاپ كەتە الماي, سول كۇنى ارالارىنا باردى.
قازاقستان مەن رەسەيدىڭ اراسىندا ورتاق ماسەلە كوپ. ءتىپتى كەيدە بايلىقتارى دا ورتاق بولىپ جاتادى. جۋرناليستەرمەن اڭگىمەدە كاسپي تەڭىزىنىڭ ەكولوگياسى كەڭىرەك ءسوز بولدى.
ەلەۋسىزوۆتىڭ اتى اتالعاندا, جۇرتتىڭ كوڭىلىندە اعاش ەگۋ جۇرەدى. ءسىرا, قانداي قىزمەت اتقارماسىن, مەلس حامزا ۇلى بۇل قاسيەتتى شارۋانى ۇمىت قالدىرمايدى. ءوزىنىڭ تۋعان كۇنى 20 ناۋرىزدا ول بورالداي قورعاندارى ۇلتتىق پاركىنە ءوزىنىڭ جولداس-تانىستارىمەن بارىپ, 120 ءتۇپ اعاش وتىرعىزدى. بۇل ءىستى ول وسكەمەن جانە استانا قالالارىندا دا جالعاستىردى.
ناۋرىز مەرەكەسىنىڭ العاشقى كۇنى جينالعانداردى «تابيعات» ەكولوگيالىق وداعىنىڭ تىكەلەي اتقاراتىن جۇمىسىمەن تانىستىردى. مۇندا قوعامدىق كونسترۋكتورلىق بيۋرو جۇمىس ىستەيدى ەكەن. وندا نەبىر التىن قولدى ونەرتاپقىشتار باس قوسقان. سونىڭ ءبىرى سەرگەي ستاركوۆ جەر سىلكىنىسى كەزىندە پايدالانىلاتىن قوراپ جاساپ شىعارىپتى. وعان ەكى ۇلكەن ادام جانە ءبىر بالا پانالاي الادى ەكەن. وعان كىرىپ ۇلگەرگەن ادام قيراعان ءۇيدىڭ استىندا قالسا دا, امان قالادى.
كىمگە دە بولسا, تۋعان جەردىڭ ورنى بولەك. مەلس ەلەۋسىزوۆ ناۋرىز مەرەكەسىنىڭ ەكىنشى كۇنى ءوزىنىڭ تۋعان اۋىلى بالقاش اۋدانىنداعى باقاناس كەنتىندە بولدى. پرەزيدەنتتىككە كانديدات جەرلەستەرى اتىنا جىلى-جىلى سوزدەر ايتسا, ولار دا ءوز كەزەگىندە قوشەمەت سوزدەرىن اياعان جوق. مەرەكەگە ارنالعان كيىز ءۇيدىڭ تورىنە وتىرعىزىپ, كوپشىلىكتىڭ نازارىندا جۇرگەن ازاماتقا قۇرمەت كورسەتتى.
اسكەريلەرگە دە مەلس ەلەۋسىزوۆتىڭ ايرىقشا ىقىلاسى بار. كەزىندە ءوزى دە اسكەري قىزمەتتى وتەگەن, ولاردىڭ جاعدايىن جاقسى بىلەدى. اسىرەسە, وفيتسەرلەر قاۋىمىنىڭ پاتەردەن قيىندىق كورىپ جۇرگەنىن ۇنەمى ەستيدى. كەشە سول اسكەريلەردىڭ وكىلدەرىمەن كەزدەسكەندە, ولاردىڭ مۇقتاجىن جۇرەگىمەن سەزىنگەندەي بولدى.
الماتى قالاسىنىڭ اقبۇلاق دەيتىن اۋماعىندا بۇرىن قورعانىس مينيسترلىگىنە قاراعان 4 گەكتارداي جەر بار ەكەن. سول جەردەن ەلىمىزدەگى پاتەرسىز جۇرگەن 7740 وفيتسەرگە ارناپ كوپ قاباتتى ءۇي سالساق دەگەن ۇسىنىسقا قولداۋ كورسەتە وتىرىپ, پرەزيدەنتتىكتەن ۇمىتكەر بۇل ماسەلەنى وڭ شەشۋ جونىندە قازىرگى پرەزيدەنت نۇرسۇلتان نازارباەۆقا قاراتا ءوتىنىش تە ءبىلدىردى.
باس ەكولوگتىڭ بۇل كۇندەرى ۋاقىتى قات.
ماماديار جاقىپ.