ناۋرىز مەيرامى قارساڭىندا قالانىڭ جاڭا اكىمى ايبەك كارىموۆ قالاعا قاراستى ابىرالى وڭىرىندە بولىپ قايتتى. ءوڭىر ءومىرىمەن تانىسقان اكىم ءبىراز ءماسەلەنى اۋىل تۇرعىندارىمەن كەزدەسۋ ۇستىندە جەدەل شەشىپ تاستادى. ايتالىق, جيىن ۇستىندە سەمەيدەگى «سەماز» تراكتور زاۋىتىنىڭ باسشىسى اسەمحان دوسقوجانوۆقا تەلەفون شالىپ, بيۋدجەت ەسەبىنەن قاينار اۋىلىنا «متز-82» تراكتورىن ءبولۋ جونىندە تاپسىرما بەردى. تيەگىشى, بۋلدوزەرى جانە ەكسكاۆاتورى بار بۇل تراكتور قازىرگى ساتتە اۋىلعا اۋاداي قات دۇنيە.
سونداي-اق, اكىم باستاماسىمەن قايناردا مەملەكەتتىك كوممۋنالدىق كاسىپورىن قۇرىلاتىن بولدى. وعان دا قاجەتتى تەحنيكا مەن قۇرال-جابدىقتار بولىنبەك. مۇنىڭ سىرتىندا اۋىل كوشەلەرىن جارىقتاندىرۋ ماسەلەسى دە ءوز شەشىمىن تاۋىپ جاتتى.
جيىن بارىسىندا تۇرعىندار تاراپىنان باسقا دا وتىنىشتەر ايتىلدى. ماسەلەن, ينتەرناتتىڭ جوقتىعىنان ءوڭىردىڭ شالعايدا تۇراتىن ەڭبەككەرلەرىنىڭ بالالارى, مىنە, ۇزاق جىلدان بەرى قينالىپ كەلەدى. ونىڭ ۇستىنە بالالار باقشاسىنىڭ جوقتىعى دا ايقىن سەزىلە باستاعان. ويتكەنى, وڭىردە سوڭعى جىلدارى بالا تۋ جونىنەن كورسەتكىش ءبىرشاما جاقسارا تۇسكەن.
وسىنىڭ ءبارى ەسكەرىلە كەلىپ, اۋىل اكىمدىگى باسقا مەكەنگە كوشىپ, قازىردە وزدەرى وتىرعان ەكى قاباتتى عيماراتتى ينتەرنات پەن بالالار باقشاسىنا بوساتىپ بەرەتىن بولدى. سول ماقساتقا دەپ قالا بيۋدجەتىنەن قارجى قاراستىرىلماق. وسى ورايدا بۇل عيماراتتىڭ كەزىندە ينتەرنات ءۇيى بولعاندىعىن ايتا كەتكەنىمىز ءجون.
جيىن سوڭىندا اكىم جينالعانداردى پوليگون ايماعىنداعى ەلدىڭ مۇڭ-مۇقتاجى ءوزىنىڭ ۇدايى نازارىندا بولاتىندىعىنا سەندىردى.
داۋلەت سەيسەن ۇلى.
سەمەي.