قازاقستان ەلشىلىگىنىڭ ماسكەۋ ۇكىمەتىمەن قول جەتكىزگەن ۋاعدالاستىعى اياسىندا سوڭعى جىلدارى رەسەي استاناسىنىڭ قازاقستان ءوڭىرلەرىمەن ساۋدا-ەكونوميكالىق ءجانە مادەني-گۋمانيتارلىق باعىتتاعى ىنتىماقتاستىعى قالىپتى دامىپ كەلەدى.
سونىڭ ءبىرى – بيوكونتەينەرلەردە ەكولوگيالىق جاعىنان تازا جەمىس-كوكونىس ونىمدەرىن ءوسىرۋ جونىندەگى وڭتۇستىك قازاقستان وبلىسى مەن ماسكەۋدىڭ بىرلەسكەن جوباسى. وتكەن جىلى وڭتۇستىك ءوڭىرىندە وسى تەحنولوگيا بويىنشا ءوسىرىلىپ, جينالعان ءونىم بيوكونتەينەرلەردى پايدالانۋدىڭ تيىمدىلىگى جوعارى ەكەنىن كورسەتتى. الداعى ۋاقىتتا بۇل جۇمىستىڭ اۋقىمىن كەڭەيتىپ, ماسكەۋ ءدۇكەندەرى مەن بازارلارىنا وڭتۇستىكتىڭ وسىنداي ءوتىمدى ونىمدەرىن كوپتەپ جەتكىزۋ جوبالانۋدا. بۇل ءۇشىن ءبۇكىلرەسەيلىك كورمە ورتالىعىنداعى بۇرىنعى «قازاقستان» پاۆيلونىنىڭ مۇمكىندىكتەرى دە ىسكە قوسىلاتىن بولادى. قازىر جالپى اۋدانى 4800 شارشى مەتر بولاتىن «قازاقستان» پاۆيلونىن قالپىنا كەلتىرىپ, جاڭعىرتۋ ءجونىندەگى ماسەلەلەر ۇكىمەتارالىق دەڭگەيدە قاراستىرىلۋدا.
جالپى, كەدەن وداعى مەن قالىپتاسىپ جاتقان ءبىرتۇتاس ەكونوميكالىق كەڭىستىك جاعدايىندا ماسكەۋ ۇكىمەتى قازاقستاندىق كاسىپكەرلەردىڭ ازىق-ت ۇلىكتەردى مەملەكەتتىك ساتىپ الۋ جانە قىزمەتتەر كورسەتۋ جونىندەگى تەندەرلەرگە قاتىسۋىنا مۇددەلى. بۇل تۋرالى قازاقستان ەلشىسى زاۋىتبەك تۇرىسبەكوۆتىڭ ماسكەۋ ۇكىمەتىنىڭ سىرتقى ەكونوميكالىق جانە حالىقارالىق بايلانىستار دەپارتامەنتىنىڭ باسشىسى سەرگەي چەرەمينمەن كەزدەسۋى كەزىندە اتاپ كورسەتىلدى.
ماسەلەن, سوڭعى ۋاقىتتا ءدايەكتىلىكپەن ىلگەرىلەتىلە باستاعان ءماسكەۋ مەتروپوليتەنىنىڭ ءبىر ستانساسىنا «قازاقستان» اتىن بەرۋ, لەنينگراد تاسجولى بويىنداعى دوستىق پاركىنە «استانا» ءمۇسىندىك كومپوزيتسياسىن ورناتۋ, «نۇر وتان» جانە «ەدينايا روسسيا» پارتيالارىنىڭ باسشىلىعىمەن رجەۆ-ۆيازەمسك شايقاسىنىڭ مۇراجايىن قۇرۋ ماسەلەلەرى ءوزارا ىنتىماقتاستىقتىڭ ءورىسىن كەڭەيتىپ, بۇل جوبالارعا ەكى ەل كاسىپكەرلەرىنىڭ كەڭىنەن قاتىسۋىنا جول اشادى.
سەرىكقالي بايمەنشە, «ەگەمەن قازاقستان» - ماسكەۋدەن.