كەشە, 22 قاراشادا ساۋدا-ەكونوميكالىق, عىلىمي-تەحنيكالىق, مادەني ىنتىماقتاستىق جونىندەگى قازاقستان-بريتان ۇكىمەتارالىق كوميسسياسىنىڭ وتىرىسى اياسىندا قىزىلوردا وبلىسىنىڭ اكىمى قىرىمبەك كوشەرباەۆ پەن ەۋروپا قايتا قۇرۋ جانە دامۋ بانكى(ەقدب) پرەزيدەنتى سۋما چاكرابارتي قىزىلوردانىڭ جىلۋمەن قامتاماسىز ەتۋ جۇيەسىن قايتا جاڭعىرتۋ جانە قۇرىلىسىن قارجىلاندىرۋ, سونداي-اق, وبلىستى ەلەكترمەن قامتاماسىز ەتۋ جۇيەلەرىن قايتا جاڭعىرتۋ ماسەلەلەرى بويىنشا كەلىسسوزدەر جۇرگىزدى.
كەزدەسۋ بارىسىندا قىزىلوردا قالاسىنداعى اۋەجايدىڭ جاڭا جولاۋشىلار تەرمينالىنىڭ قۇرىلىسى, «قىزىلوردا قالاسىنىڭ كوشەلەرىن جارىقتاندىرۋ» جوباسىن جۇزەگە اسىرۋ جانە «قىزىلوردا-جەزقازعان-قاراعاندى» تاس جولىن قايتا جوندەۋدەن وتكىزۋ ماسەلەلەرى تالقىلاندى, دەپ حابارلادى قازاقپارات.
جالپى, ەقدب-مەن ىنتىماقتاستىق اياسىندا قىزىلوردا وبلىسىنداعى جالپى سوماسى 250 ملرد. تەڭگەنى قۇرايتىن 10 جوبا كەلىسىلدى. ونىڭ بەسەۋى – جولاۋشىلار تاسىمالى جۇيەسىن جاڭعىرتۋ, وبلىس ورتالىعىنداعى كوممۋنالدىق ينفراقۇرىلىمدى كەڭەيتۋ جانە اۆتوماتتاندىرۋعا باعىتتالعان جوبالار ىسكە اسىرىلۋدا. ولار كوممۋنالدىق جەلىلەردىڭ توزۋىن جانە جىلۋ, ەلەكتر ەنەرگياسى, سۋدىڭ شىعىنىن ازايتۋعا مۇمكىندىك بەرەدى. اۆتوماتتاندىرىلعان باسقارۋ جۇيەسىنىڭ كومەگىمەن سۋ جانە ەنەرگەتيكالىق رەسۋرستاردىڭ شىعىنى باقىلاۋعا الىنادى.
بۇدان بولەك, وسى جىلدىڭ 31 قازانىندا قىزىلوردا وبلىسىنىڭ اكىمدىگى, قىزىلوردا قالاسى اكىمدىگى, ەۋروپا قايتا قۇرۋ جانە دامۋ بانكى, سونداي-اق «قىزىلوردا تازالىعى» جشس اراسىندا «قىزىلوردا قالاسىنداعى تۇرمىستىق قاتتى قالدىقتاردى وڭدەۋ» جوباسىن ىسكە اسىرۋ جونىندەگى كەلىسىمگە قول قويىلدى. اتالمىش جوبا قالانىڭ سانيتارلىق جاعدايىن جاقسارتۋعا, توپىراق, پارنيكتىك گاز, جەراستى جانە جەرۇستى سۋىنىڭ لاستانۋىن ازايتۋعا مۇمكىندىك بەرەدى. بولاشاقتا بيوگازدان ەكولوگيالىق تازا ەلەكتر جانە جىلۋ ەنەرگياسىن الۋ جوسپارلانۋدا.