21-23 قازان ارالىعىندا بالۋان شولاق اتىنداعى سپورت سارايىندا شورت-ترەكتەن قازاقستان رەسپۋبليكاسى كۋبوگىنىڭ ەكىنشى كەزەڭى ءوتتى. اتالمىش سايىس 28-ءشى بۇكىلالەمدىك قىسقى ۋنيۆەرسيادا قارساڭىنداعى تەستىلەۋ شاراسى رەتىندە ۇيىمداستىرىلدى.
جارىسقا ەلىمىزدىڭ 8 ايماعىنان كەلگەن 100-دەن اسا كونكيشى باقتارىن سىنادى. سايىستى وتكىزۋدەگى ماقسات – قازاقستانداعى ۇزدىك شورت-ترەكشىلەردى انىقتاۋ جانە قىسقى ۋنيۆەرسيادا جارىستارى وتەتىن سپورت نىساندارىنىڭ دايىندىعىن, سونداي-اق ۇسىنىلاتىن قىزمەتتەردىڭ ازىرلىگىن تەكسەرۋ.
سايىس قورىتىندىسى بويىنشا ايەلدەر اراسىندا سىنعا تۇسكەن اتىراۋلىق كيم يونگ ا ەسىمدى كونكي شەبەرى 1500, 1000, 500 مەتر قاشىقتىقتارىندا جەڭىمپاز اتانسا, قوستانايلىق اناستاسيا كرەستوۆا اتالعان جارىس تۇرلەرىندە تيىسىنشە ەكىنشى ورىندى ەنشىلەدى. 1500 مەترگە كونكيمەن جۇگىرۋدە اتىراۋلىق سپورتشى ولگا تيحونوۆا, 1000 مەترلىكتە استانالىق مادينا جانبوسىنوۆا, 500 مەتر قاشىقتىقتا باتىس قازاقستان وبلىسىنىڭ كونكيشىسى انيتا ناگاي قولا جۇلدەنى قاناعات تۇتتى.
ەرلەر اراسىنداعى سايىستا قوستانايدىڭ تۋماسى ەركەبۇلان شامۇحانوۆ 1500 جانە 1000 مەترلىك جارىستا ۇزدىك اتاندى. تۋرنيرگە اتىراۋدىڭ اتىنان تۇسكەن مەرسايد جاقسىباەۆ الدىمەن 1500 مەترگە كونكيمەن جۇگىرۋدە ەكىنشى بولىپ كەلىپ, 500 مەترلىك سىندا ۇزدىك ناتيجە كورسەتتى. قوستانايلىق سپورتشى قۋاندىق سۇلەيمەنوۆ تا قوس جۇلدەنى ارقالاپ قايتتى. ول جارىستىڭ ءبىرىنشى كۇنى 1500 مەتردە جۇلدەلى ۇشتىككە كىرسە, كەيىن 1000 مەترلىكتە كۇمىستەن القا تاعىندى. باتىس قازاقستان وبلىسى ۇكىلەپ قوسقان ءادىل عالياحمەتوۆ تا جەرلەستەرىن ەكى بىردەي جۇلدەمەن قۋانتتى. ءادىل 500 مەترگە جارىسۋدا ەكىنشى ساتىدان تابىلسا, 1000 مەترلىك سىندا قولاعا قول سوزدى. ەرلەر اراسىنداعى جارىستىڭ 500 مەترلىك جارىسىندا اتىراۋلىق ەۆگەني رەبيك ءۇشىنشى ورىنعا تابان تىرەدى.
جارىستىڭ سوڭعى كۇنىندە ايەلدەر اراسىندا 3000 مەترگە جانە ەرلەر اراسىندا 5000 مەترگە ەستافەتالىق جارىستىڭ فينالى ءوتتى. ايەلدەر اراسىنداعى ەستافەتادا قوستاناي كونكيشىلەر جۇيرىك اتاندى. باتىس قازاقستان سپورتشىلارى ەكىنشى ورىندى السا, استانالىق كونكيشىلەر ءۇشىنشى ورىنمەن شەكتەلدى.
ەرلەر اراسىنداعى 5000 مەتر قاشىقتىققا ۇيىمداستىرىلعان ەستافەتادا التىن مەدالدى باتىس قازاقستان وبلىسىنىڭ سپورتشىلارى يەمدەندى. قوستاناي كونكيشىلەرى كۇمىسكە يە بولسا, ەلوردالىق شورت-ترەك شەبەرلەرى ءۇشىنشى ورىندى قاناعات تۇتتى.
مەلىس سەيداحمەتوۆ,
جۋرناليست
الماتى