وڭىرلەر اراسىندا كاسىبي بىلىكتىلىك پەن تاجىريبە الماسۋ ءۇشىن جامبىل وبلىسىنىڭ اكىمى كارىم كوكىرەكباەۆ باستاعان ارنايى دەلەگاتسيا قىزىلوردا وبلىسىنا بارىپ قايتتى. جىر الىبى جامبىل جاكەمنىڭ جۇرتىنان بارعان دەلەگاتسيا سىر ەلىندە اۋىلشارۋاشىلىق, ونەركاسىپ, مادەنيەت سالالارىنا بايلانىستى بىرنەشە مەموراندۋمعا قول قويىپ, ەكىجاقتى بارىس-كەلىستى, الىس-بەرىستى نىعايتتى.
وسى ساپار بارىسىندا الەۋمەتتىك ماڭىزدى تاۋارلار باعاسىنىڭ نەگىزسىز وسۋىنە جول بەرمەۋ ءۇشىن جامبىل مەن قىزىلوردا وبلىستارىنداعى تۇراقتاندىرۋ قورلارى بىرلەسە جۇمىس اتقارماققا كەلىستى. ءسويتىپ, جامبىلدىقتار 100 مىڭ توننا كۇرىش ساتىپ الۋ تۋرالى كەلىسىمشارتقا قول قويدى.
– بىزدە كۇرىش ونىمدەرىنە دەگەن سۇرانىس جوعارى. سونداي-اق, تاراز قالاسىندا تۇراقتاندىرۋ قورىنىڭ ارنايى دۇكەندەرى جۇمىس ىستەيدى. وندا الەۋمەتتىك ماڭىزدى ازىق-ت ۇلىك تومەن باعامەن ساتىلادى. ءبىز ساتىپ العان ونىمدەرىمىزدى جارمەڭكەلەردە ساۋدالايمىز. بۇل ەكى تاراپقا دا ءتيىمدى بولادى, – دەيدى «تاراز الەۋمەتتىك كاسىپكەرلىك ۇلتتىق كورپوراتسياسى» اق ديرەكتورى شامسات يسابەكوۆ.
ال قىزىلوردا وبلىسىنىڭ اۋليەاتا وڭىرىنەن قانت ساتىپ الۋعا مۇمكىندىگى بار. ءويتكەنى, ايماقتا 2 بىردەي قانت زاۋىتى جۇمىس ىستەيدى. كاسىپورىنداردى شيكىزاتپەن قامتاماسىز ەتۋ ءۇشىن شارۋالار بيىل كوكتەمدە 6 مىڭ گەكتار جەرگە قىزىلشا ەككەن بولاتىن. وسى قازان ايىنان باستاپ وڭىردە قانت قىزىلشاسىن جيناۋ ناۋقانى باستالىپ تا كەتتى.
ورالحان ءداۋىت,
«ەگەمەن قازاقستان»
جامبىل وبلىسى