بالەتتىڭ بابى مەن باعى

ەلورداعا العاش رەت گاسترولدىك ساپارمەن كەلگەن بوريس ەيفمان اتىنداعى اكادەميالىق بالەت تەاترىنىڭ ترۋپپاسى «استانا وپەرا» تەاترىنىڭ ۇلكەن زالىندا ا.س.پۋشكين رومانى جەلىسىمەن پ.ي.چايكوۆسكي مەن ا.سيتكوۆەتسكيدىڭ مۋزىكاسىنا جازىلعان («اۆتوگراف» روك توبى) «ەۆگەني ونەگين» بالەتىن كورەرمەنگە ۇسىندى. مۇندا باستى پارتيالاردى اتى-جوندەرى الەمگە ايگىلى بي­شىلەر ورىندادى. ونەگيندى – رەسەيدىڭ ەڭبەك سىڭىرگەن ءارتىسى, رف پرەزيدەنتى سىيلىعىنىڭ يەگەرى, «التىن بەتپەردە», «التىن سو­فيت» سىيلىقتارىنىڭ لاۋرەاتى ولەگ گابىشەۆ سومداسا, تاتيانانى – حالىقارالىق بايقاۋلاردىڭ جەڭىمپازى, «التىن بەتپەردە», «التىن سوفيت» سىيلىقتارىنىڭ لاۋرەاتى ماريا اباشوۆا, لەن­سكي ءرولىن – رەسەي پرەزيدەنتى سىيلىعىنىڭ, «التىن سوفيت» سىيلىعىنىڭ لاۋرەاتى دميتري فيشەر, ال ولگانى  ناتاليا پوۆوروزنيۋك بەينەلەدى. ساحنا دەكوراتسياسى ادەت­تەگىدەي ز.مارگولين ونەرىمەن ەرەكشە ساندەندى, سونىمەن ءبىر­گە كوستيۋمدەردى دايىنداعان پ.وكۋ­­نەۆ, و.شايشمەلاشۆيلي ءجا­نە ا.ياكۋششەنكو شەبەرلىگى سپەك­تاكلدىڭ شىنايىلىعىن قام­تاماسىز ەتتى دەۋگە تولىق نەگىز بار. بوريس ەيفماننىڭ ەسىمى ۇنەمى قىزىق تا كوركەم تاجىريبەلەرمەن, ياعني كلاسسيكالىق شىعارمالاردى زاماناۋي تىڭ ۇلگىمەن باتىل ۇش­تاستىرۋىمەن ءمالىم دەسەك, حورەوگراف قازىرگى زامانعى بالەت­تىڭ مازمۇندىق سيپاتىنا دا كوپ وزگەرىستەر الىپ كەلۋىمەن ءارىپ­تەستەرىنەن وق بويى وزىق تۇر. – ءوز سپەكتاكلدەرىمدە ءمار­تەبەلى ادەبيەتكە بارىنشا ءجۇ­گىنە وتىرىپ, ءبىزدىڭ الدى­مىز­داعى كەمەڭگەر تۇلعالاردىڭ سەزىمگە تولى تولعانىسىن جانە شىعارماشىلىق كۇشىن حورەوگرافيا ونەرى ارقىلى جەتكىزۋگە تىرىسامىن. ءسوز ونەرى – بۇل ءال­دەنەنىڭ باسىن قۇراۋ مەن جوققا شىعارۋ قۇرالى بولىپ تابىلادى, ول ويدا جۇرگەن كەز كەلگەن ءىستى قالپىنا كەلتىرە وتىرىپ جانە ءبىر مەزگىلدە سونىڭ كوزىن جويىپ تا جىبەرە الادى. ءوز ويىڭدى ايقىن جەتكىزۋدىڭ كونە ءتاسىلى رەتىندە دەنە, قيمىل ءتىلى جالپىعا تۇسىنىكتى ەموتسيالىق جانە رۋحاني قۇندىلىقتاردان تۇرادى. ادەبي تۇپنۇسقانى ەسكەرە وتىرىپ, مەن وزىمە تەك حو­رەو­گرافيانىڭ تىلىمەن عانا جەت­كىزىلەتىن, زامانداستارىمدى الاڭ­داتاتىن دۇنيەنىڭ ماعىناسىن اشىپ كورسەتۋدى ماقسات تۇتتىم, – دەدى رەسەيدىڭ حالىق ءارتىسى بوريس ەيفمان. «ەۆگەني ونەگيننىڭ» كەيىپ­كەرلەرى رۋحاني قۇلدىراعان عاسىر­لاردان, اۋمالى-توكپەلى ءتۇرلى زاماننان وتكەن بۇگىنگى كۇننىڭ ماڭىزدى كەيىپكەرلەرىنە اينالعان. پەتر يليچ چايكوۆسكيدىڭ شى­عارماسى مەن كومپوزيتور الەك­ساندر سيتكوۆەتسكيدىڭ روك مۋزىكاسىنىڭ ساحنادا ءوزارا ۇيلەسىم تابۋى كورەرمەنگە حورەو­گرافتىڭ ويىن تەرەڭ ۇعىنۋىنا مۇمكىندىك بەرگەنى داۋسىز. سانكت-پەتەربۋرگ بالەت مەكتەبى تۋرالى «تايمس» گازەتىنىڭ جەتەكشى بالەت سىنشىسى دەبرا كرەين: – ەيفماننىڭ حورەوگرافياسىنا ءتان كوركەمدىك – ءبىز ودان نە كۇتەمىز, ول سونى بەرەدى, ونداعى بىرەسە بيشىلەر جاپپاي ەكپىن بەرەتىن كورىنىستەر كەرەمەت اسەرگە بولەسە, ال ەندى بىردە اكروباتيكا تىلىمەن ورىندالاتىن ماعىنالى مونولوگتار كەزدەسەدى, جالپى مۇنداعى سەزىمنىڭ ءاربىر تامشىسى قايعىعا بۋلىققان دەنەلەردى سۋرەتتەيدى, – دەپ اتاپ ءوتتى. بوريس ەيفماننىڭ سانكت­پەتەربۋرگتىك اكادەميالىق بالەت تەاترىنىڭ گاسترولى حالىقارالىق III «جىبەك جولى» فەستيۆالى اياسىندا ءوتتى. قاراشاش توقسانباي, «ەگەمەن قازاقستان» سۋرەتتى تۇسىرگەن ەرلان وماروۆ, «ەگەمەن قازاقستان»