2019 جىلعا دەيىن قازاقستاندا تەمەكى جانە الكوگول اكتسيزدەرىنىڭ باعاسى بىرتىندەپ ۇلعايتىلادى. بۇل تۋرالى بۇگىن قر پارلامەنتى ءماجىلىسىنىڭ وتىرىسىندا قر ۇلتتىق ەكونوميكا ءمينيسترى قۋاندىق بيشىمباەۆ ءمالىم ەتتى.
مينيسترلىكتىڭ مالىمەتىنە قاراعاندا, بۇل ماسەلە 2017-2019 جىلدارعا الكوگولدىك ونىمگە, سىرا, تەمەكىگە اكتسيزدەر مولشەرلەمەسىن بەكىتۋدە ەسكەرىلگەن.
«الكوگول جانە تەمەكى ونىمدەرىنە اكتسيزدەردىڭ فيسكالدىق فۋنكتسياسىن كۇشەيتۋ ءۇشىن ونىڭ مولشەرلەمەسىن ساتىلاپ ۇلعايتۋ ۇسىنىلادى. قازىرگى قولدانىستاعى سالىق كودەكسىندە اكتسيزدىك سالىق مولشەرلەمەلەرىنىڭ ولشەمى 2014-2016 جىلدارعا عانا بەلگiلەنگەن, ال 2017-2019 جىلدارعا بەلگiلەنبەگەن. الكوگولدىك ءونىمنىڭ 1 ءليترى ءۇشىن: 2017 جىلى - 2000 تەڭگە, 2019 جىلى - 2 550 تەڭگەگە دەيىنگى اكتسيزدىك مولشەرلەمەنى بەلگىلەۋ ۇسىنىلىپ وتىر. 2016 جىلمەن سالىستىرعاندا, ءوسىم - 85 پايىزدى قۇرايدى. ال, سىرا جانە سىرا سۋسىندارىنىڭ 1 ءليترى ءۇشىن 2017 جىلى 39 تەڭگە, 2019 جىلى 57 تەڭگەگە دەيىن ءوسىرۋ ۇسىنىلادى. 2016 جىلمەن سالىستىرعاندا ءوسىم 219 پايىزدى قۇرايدى», - دەدى ق. بيشىمباەۆ.
وسىلايشا, تەمەكى ونىمدەرىنىڭ 1000 داناسى ءۇشىن اكتسيز 2017 جىلى 6200 تەڭگە بولسا, 2019 جىلى 8700 تەڭگەگە دەيىن وسەتىن بولادى.
«سونىمەن قاتار الكوگول ونىمدەرىن ەكسپورتتاۋ كەزىندە قوسارلانعان سالىق سالۋدى بولدىرماۋ جانە وتاندىق وندىرۋشىلەردىڭ باسەكەگە قابىلەتتىلىگىن ارتتىرۋ ءۇشىن ەتيل ءسپيرتى اكتسيزىنىڭ نولدىك مولشەرلەمەسىن بەلگىلەۋ ۇسىنىلادى», - دەدى مينيستر.