قازاقستان مەن تۇركيا اراسىنداعى ءبىلىم بەرۋ سالاسىنداعى ەكىجاقتى ىنتىماقتاستىقتى دامىتۋ ماقساتىندا ەكى ەل پرەزيدەنتتەرىنىڭ تىكەلەي قولداۋىمەن قۇرىلعان «KATEV» حالىقارالىق قوعامدىق قورى قازاق-تۇرىك ليتسەيلەرىنىڭ اتاۋىن «ءبىلىم-يننوۆاتسيا ليتسەيى» دەپ اتاۋ تۋرالى ۇسىنىس جاسادى. بۇل جونىندە قوردىڭ ءباسپاسوز قىزمەتى حابارلادى.
«قور باسشىلىعىنىڭ (قوردىڭ قۇرىلتايشىلار كەڭەسى مەن قوردىڭ عىلىمي-ادىستەمەلىك كەڭەسى), قتل ءبىلىم الۋشىلارىنىڭ اتا-انالار قاۋىمداستىعى, ليتسەي ديرەكتورلارىنىڭ شەشىمىمەن قتل اتاۋىنا «رەبرەندينگ» جاساۋ, ياعني ءبىلىم بەرۋ ۇيىمىنىڭ قوعامداعى ورنى مەن مارتەبەسىن جايلى جايعاستىرۋ ماقساتىندا اتىن اۋىستىرۋدى, جانە دە ونى قازاقستان رەسپۋبليكاسى تاۋەلسىزدىگىنىڭ 25 جىلدىق مەرەيتويىنا ورايلاستىرىپ, اتاۋىن «ءبىلىم يننوۆاتسيا ليتسەيى» دەپ وزگەرتۋ تۋرالى باستاما كوتەرىپ وتىر»,-دەپ حابارلانعان قوردىڭ ءباسپاسوز قىزمەتى تاراتقان اقپاراتتا.