«نۇر وتان» پارتياسىنىڭ ورتالىق اپپاراتىندا پارتيا جانىنداعى قۇقىقتىق كەڭەس «تەرروريزمگە جانە ەكسترەميزمگە قارسى ءىس-قيمىلدىڭ وزەكتى ماسەلەلەرى: زاڭنامالىق باستامالاردى قاراۋ» تاقىرىبىندا كەڭەيتىلگەن وتىرىس ءوتتى.
وعان ءماجىلىس دەپۋتاتتارى, ادام قۇقىقتارى بويىنشا تاۋەلسىز ساراپشىلار, ۇكىمەتتىك ەمەس ۇيىمدار جانە ەقىۇ وكىلدەرى قاتىستى, دەپ حابارلايدى ەگەمەن-اقپارات پارتيانىڭ ءباسپاسوز قىزمەتىنە سىلتەمە جاساپ.
قر پارلامەنتى ءماجىلىسىنىڭ زاڭناما جانە سوت-قۇقىقتىق رەفورما كوميتەتىنىڭ توراعاسى, «نۇر وتان» پارتياسى جانىنداعى قۇقىقتىق كەڭەستىڭ توراعاسى نۇرلان ءابدىروۆ قازىرگى تاڭدا تەرروريزم جانە ەكسترەميزم ادامزات ءۇشىن ايتارلىقتاي قاۋىپ بولىپ تابىلاتىنى تۋرالى ايتىپ ءوتتى.
«بۇرىندارى تەرروريزم ءبىزدىڭ ەلگە جات ۇعىم ەدى. قازىرگى كۇنى جاعداي وزگەرىپ, قازاقستاندىقتار دا ەل بىرلىگىن, تىنىشتىعىن بۇزۋعا باعىتتالعان جات اعىمداردىڭ جەتەگىنە ەرىپ كەتۋدە. ەر مەن ايەل ادامدار, ءتىپتى بالالار دا الەمدەگى تەپە-تەڭدىكتى بۇزۋعا ارنالعان قاۋىپتى شارالار مەن سوعىستارعا قاتىسۋدا. جاقىندارىمىزدىڭ تەرروريزمنىڭ جولىمەن جۇرۋلەرىنە جول بەرمەۋىمىز كەرەك. ادام دۇنيەگە باسقا بىرەۋدىڭ ءومىرىن قيۋ ءۇشىن كەلمەيدى. بۇل ۇعىمدى ءار ادام جاستايىنان ساناسىنا ءسىڭىرۋى قاجەت. قوعامدا, حالىق اراسىندا ادامگەرشىلىك پەن بەيبىتشىلىكتى نىعايتىپ, مەيىرىمگە تولى قارىم-قاتىناستى كۇشەيتۋىمىز كەرەك», - دەيدى نۇرلان ءابدىروۆ.
دەپۋتاتتىڭ ايتۋىنشا, قازاقستاندا ەكسترەميزم مەن تەرروريزمدى جويۋ مەن الدىن-الۋ بويىنشا جۇمىستى كۇشەيتۋ ماسەلەسىندە قۇقىق قورعاۋ ورگاندارى جانە ارنايى قىزمەتتەرمەن قاتار, بارلىق قازاقستاندىق قوعام, ساراپشىلار, عالىمدار, ءدىن قايراتكەرلەرى سونداي-اق, بۇقارالىق اقپارات قۇرالدارى ماڭىزدى ءرول اتقارۋى ءتيىس.
«بۇگىندە «نۇر وتان» پارتياسى قوعامدا ەكسترەميزم مەن تەرروريزمگە توتەپ بەرۋ ماقساتىندا ءتۇرلى دەڭگەيدە سان الۋان جۇمىستار جۇرگىزۋدە», - دەپ اتاپ ءوتتى دەپۋتات.
ەقىۇ-نىڭ استاناداعى باعدارلامالار كەڭسەسىنىڭ باسشىسى دەرد سابو قازاقستاندا ۇكىمەت, پارلامەنت جانە ازاماتتىق قوعام تەرروريزمگە قارسى تۇرۋ ماسەلەسىنە ۇلكەن كوڭىل بولەتىنىن ايتتى.
«تەرروريزم ماسەلەسى بۇگىنگى كۇنى كۇللى الەمدى تولعاندىرىپ وتىر. تەررورلىق اكتىلەردەن قاراپايىم حالىق زارداپ شەگۋدە. قازىرگى كۇنى مەملەكەتتەر بۇل دەرتكە قارسى تۇرۋدىڭ ءتيىمدى جولدارىن ىزدەستىرىپ جاتقانى بەلگىلى. بارلىعى تەررورلىق ارەكەتتەن كەيىن ەمەس, ودان ەرتەرەك بىرلەسە جۇمىس ىستەۋ كەرەكتىگىن ۇعىپ وتىر. الدىن الۋ شارالارى - بىرىگىپ ارەكەت ەتۋدىڭ ەڭ ءتيىمدى جولى. وسى باعىتتا زاڭ دا, ادام قۇقىقتارى دا بۇزىلماۋىن قامتاماسىز ەتۋ قاجەت. بىزگە قوعام دەرتى تەرروريزممەن كۇرەسۋدە وسى ەكى ماسەلەنى تەپە-تەڭدىكتە ۇستايتىن امالداردى قاراستىرۋ كەرەك», - دەيدى دەرد سابو.
سونداي-اق, دەرد سابو ەقىۇ-نىڭ دەموكراتيالىق ينستيتۋتتار مەن ادام قۇقىقتارى بيۋروسى «قازاقستان رەسپۋبليكاسىنداعى ەكسترەميزم جانە تەرروريزمگە قارسى ءىس-قيمىل تۋرالى» زاڭناماسىنا ەنگىزىلگەن تۇزەتۋلەر بويىنشا الدىن الا قورىتىندىمەن تانىسىپ, ءوز ۇسىنىستارىن جاساعانىن جەتكىزدى.
«نۇر وتان» پارتياسىنىڭ حاتشىسى زاۋىتبەك تۇرىسبەكوۆ «تەرروريزم مەن ەكسترەميزمگە قارسى ءىس-قيمىل تۋرالى» زاڭ جوباسىنا تەزىرەك ساپالى وزگەرىس ەنگىزۋ پارلامەنت پەن ۇكىمەتتىڭ كۇن تارتىبىندەگى ماسەلەلەرىنىڭ ءبىرى بولۋ ءتيىس دەپ سانايدى.
پارتيا حاتشىسى «نۇر وتان» پارتياسىنىڭ سايلاۋالدى باعدارلاماسىندا ساياسي ۇيىم جاپپاي قىرىپ-جويۋ قارۋىنىڭ تارالۋىنا, حالىقارالىق تەرروريزم مەن ەكسترەميزمگە, ناركوترافيككە جانە زاڭسىز كوشى-قون ۇدەرىسىنە توسقاۋىل قويۋدا بەلسەندى بولاتىنىن مالىمدەگەنىن ەسكە سالدى.
«نۇر وتان» پارتياسى ەلىمىزدىڭ جەتەكشى ساياسي كۇشى رەتىندە ءوزىنىڭ اينالاسىنداعى ازاماتتىق قوعامنىڭ بارلىق رەسۋرسىن تەرروريزم مەن ەكسترەميزمگە قارسى قويادى جانە پارتيا الاڭدارىن ورتالىقتا دا, جەرگىلىكتى جەرلەردە دە ءتيىمدى پايدالانادى. ءبىزدىڭ الدىمىزدا پارتيا الاڭدارىندا قابىلداناتىن زاڭ جوبالارىن كەڭىنەن تالقىلاۋ جانە وعان ۇكىمەتتىك ەمەس ۇيىمداردىڭ وكىلدەرى مەن قوعام مۇشەلەرىن جۇمىلدىرۋ مىندەتى تۇر», - دەدى پارتيا حاتشىسى.
ز.تۇرىسبەكوۆتىڭ پىكىرىنشە, تەرروريزممەن كۇرەستە الدىن الۋ شارالارىنا باسىمدىق بەرىلۋى قاجەت. سونىمەن قاتار, تەرروريزم تۋدىراتىن سەبەپتەر انىقتالىپ, تەرروريستىك اكتىلەرگە جول بەرمەۋدىڭ امالدارى قاراستىرىلۋى كەرەك.
«بارلىق ارەكەت تەرروريزم كورىنىستەرىن ازايتۋعا جانە جويۋعا باعىتتالۋى ءتيىس. مۇندا تەرروريزم مەن ەكسترەميزمگە قارسى ءىس-قيمىل زاڭى ماڭىزدى ءرول اتقارادى. مەملەكەتتىك ورگاندار زاڭ جوباسىن ازىرلەۋدە ۇلكەن جۇمىس تىڭدىردى. زاڭ جوباسىنىڭ 24 اكتىنە وزگەرىس ەنگىزىلدى», - دەدى پارتيا حاتشىسى.
تانىمال قۇقىق قورعاۋشى ەۆگەني جوۆتيس تەرروريزممەن كۇرەسۋدە ادام قۇقىعىن بۇزبايتىن زاماناۋي تاسىلدەردى قولدانۋ قاجەت دەپ سانايدى. قۇقىقتىق كەڭەس وتىرىسىنىڭ قورىتىندىسى بويىنشا بىرقاتار ۇسىنىس قابىلداندى.