م.تىنىشباەۆ اتىنداعى قازاق كولىك جانە كوممۋنيكاتسيا اكادەمياسىنىڭ قۇرىلعانىنا بيىل 85 جىل تولدى.
وتاندىق كولىك جانە توراپتىق قىزمەت كورسەتۋ سالاسىنىڭ بىلىكتى ماماندارىن دايارلايتىن وقۋ ورنى ەلىمىزدەگى ماڭدايالدى ءبىلىم شاڭىراعى ساناتىندا. سالالىق ءبىلىم بەرەتىن ەلۋدەن استام جوعارى وقۋ ورنىنىڭ اراسىنداعى رەيتينگ بويىنشا توعىزىنشى ورىندى يەلەنەتىن اكادەميا, قازىرگى كەزدە بولون جۇيەسى بويىنشا 3 ساتىلى ءبىلىم بەرۋگە كوشكەن. ايماقتاردا ارناۋلى ماماندىقتار بويىنشا وقىتاتىن 5 كوللەدج جۇمىس جاسايدى.
اكادەميانىڭ قارا شاڭىراعىندا دوڭگەلەك ۇستەل ءوتتى. مەرەيتويلىق باعدارلامالار اياسىندا ۇيىمداستىرىلعان «ەۋرازيالىق ەكونوميكالىق وداق شەڭبەرىندە كولىك سالاسىنداعى ءبىلىم بەرۋ مەن عىلىمنىڭ دامۋ كەلەشەگى» اتتى شاراعا وتاندىق كولىك سالاسىنىڭ بىلگىرلەرى مەن رەسەي, ۇلىبريتانيا, اۆستريا ەلدەرىنەن كەلگەن ماماندار قاتىستى.
دوڭگەلەك ۇستەلدە م.تىنىشباەۆ اتىنداعى قازاق كولىك جانە كوممۋنيكاتسيا اكادەمياسىنىڭ رەكتورى باقىتجان قۋانىشەۆ كولىك سالاسى ماماندارىن دايارلاۋداعى وزىق ادىستەمەلەر مەن ماسەلەلەر تۋرالى ايتىپ, الەم ەلدەرىنىڭ تاجىريبەسىن قولدانۋداعى ەرەكشەلىكتەرگە توقتالدى. ال «قازاقستان تەمىر جولى» ۇلتتىق كومپانياسى تەحنيكالىق ساياسات جانە رەتتەۋ دەپارتامەنتىنىڭ ديرەكتورى تالعات قاناتباەۆ اكادەميا مەن ۇلتتىق كومپانيا اراسىنداعى تىعىز بايلانىستىڭ تەمىر جول ماماندارىن وقىتۋدا ءوز جەمىسىن بەرىپ وتىرعاندىعىن ءسوز ەتىپ, وسى تاجىريبەنى ەاەو ەلدەرىنىڭ ءبىلىم بەرۋ ىسىنە قولدانۋدى ۇسىندى.
كولىك سالاسىنىڭ ماماندارىن دايارلاۋداعى قازاقستاندىق تاجىريبەنىڭ وزىق تۇستارىن ماسكەۋلىك عالىم, يمپەراتور 2-نيكولاي اتىنداعى جول-كولىك ينستيتۋتىنىڭ ءبىرىنشى پرورەكتورى ۆالەنتين ۆينوگرادوۆ تا اتاپ كورسەتتى. 120 جىلدىق تاريحى بار ماسكەۋدەگى ءبىلىم ورداسى قازىر ايماقتاعى عانا ەمەس, الەمدەگى سالا ماماندارىن وقىتىپ, دايارلاۋداعى كوشباسشى ورىندا.
جالپى, كولىك سالاسىنىڭ دامۋى بىلىكتى مامانداردىڭ قولىندا ەكەنى تالاس تۋدىرمايدى. مەملەكەتتەردىڭ ەكونوميكاسى دا نەگىزىنەن كولىكتىك تاسىمالداۋ مەن لوگيستيكاعا ارقا سۇيەپ وتىر. اسىرەسە, تمد ەلدەرى اراسىنداعى ىشكى بايلانىس پەن سىرتقى تاسىمال اينالىمىندا تەمىر جولدىڭ الاتىن ورنى ماڭىزدى. دەمەك, كولىك سالاسىن باسقارۋ مەن دامىتۋعا دا جاڭاشا كوزقاراس, عىلىمعا نەگىزدەلگەن تىڭ قادامدار قاجەت. بۇل – ەاەو ەلدەرى ءۇشىن دە, ەۋروپا ءۇشىن دە كۇن تارتىبىندەگى ماسەلە.
دوڭگەلەك ۇستەلدە ءسوز العان اعىلشىن عالىمى, ۇلىبريتانيا كولىك جانە لوگيستيكا ينستيتۋتى حالىقارالىق بايلانىستار دەپارتامەنتىنىڭ ديرەكتورى دجون حارريس, «قازجول» عىلىمي-زەرتتەۋ ينستيتۋتىنىڭ پرەزيدەنتى باعدات تەلتاەۆ جانە اۆستريالىق «فراۋشەر سەنسورتەحنيك» كومپانياسىنىڭ تمد بويىنشا اتقارۋشى ديرەكتورى ۋۆە گيۋنتەر كولىك سالاسىنداعى ءبىلىم بەرۋ مەن عىلىمنىڭ كوكجيەگىن كەڭەيتۋگە قاتىستى ويلارىمەن ءبولىستى.
قالماحانبەت مۇقامەتقالي,
«ەگەمەن قازاقستان»
الماتى