شىبىق شانشىساڭ شىنار ءوسىپ شىعاتىن بەرەكەلى ءھام مەرەكەلى ءوڭىر – وڭتۇستىك قازاقستان وبلىسى ەل تاۋەلسىزدىگىنىڭ شيرەك عاسىرلىق تويىنىڭ قارساڭىندا باس قالانىڭ تىنىس-تىرشىلىگىن ءبىر سەرپىلتىپ تاستاماق. «قۋاتتى ءوڭىر – قۋاتتى قازاقستان» اكتسياسىنىڭ اياسىندا وبلىستىڭ ەلورداداعى كۇندەرى باستالدى.
كەشە وبلىستىق اكىمدىكتىڭ باسشىلىق وكىلدەرى ورتالىق كوممۋنيكاتسيالار قىزمەتىندە جۋرناليستەرمەن جۇزدەسىپ, ءوڭىردىڭ تولايىم تابىستارىن ايعاقتايتىن دەرەكتەرمەن ءبولىستى, ەلوردادا نەندەي شارالارعا وتكىزىلەتىنى تۋرالى باياندادى.
وبلىس اكىمىنىڭ ورىنباسارى ۇلاسبەك سادىبەكوۆتىڭ ايتۋىنشا, استانا حالقىنا ءوڭىردىڭ تاريحىن, مادەنيەتىن, نەگىزگى جەتىستىكتەرى تانىستىرىلىپ, وتاندىق تاۋار وندىرۋشىلەردىڭ ونىمدەرى ۇسىنىلادى. 300-گە جۋىق ونەر مايتالماندارىنىڭ, شىعارماشىلىق يەلەرىنىڭ اتسالىسۋىمەن ءتۇرلى كونتسەرتتىك باعدارلامالار, فوتوكورمەلەر ۇيىمداستىرىلىپ, بالالارعا بازارلىق رەتىندە وبلىستا تۇسىرىلگەن قىسقا مەتراجدى فيلمدەر كورسەتىلەدى. وبلىس «حان شاتىر» ساۋدا ويىن-ساۋىق ورتالىعىنىڭ الدىنداعى الاڭدا جارمەڭكە وتكىزىپ, ءتۇرلى ازىق-ت ۇلىكتەردىڭ قاتارىندا قىمىز, شۇبات, باۋىرساق, قۇرت, ىرىمشىك سىندى ۇلتتىق تاعامداردى ۇسىنادى.
– قازاقستاندا جاسالعان اكتسياسىنىڭ اياسىندا وبلىستىق وندىرۋشىلەر اكەلگەن 300 توننادان استام اۋىلشارۋاشىلىق ونىمدەرى بازارداعى باعادان 15-20 پايىزعا ارزان باعامەن ساتىلادى, – دەدى ۇ.سادىبەكوۆ.
قالتاي مۇحامەدجانوۆ « ۇلىسىمنىڭ ۇيىتقىسى» دەپ باعا بەرگەن ءوڭىر تاۋەلسىزدىك جىلدارىندا كوپتەگەن سالادا قارقىندى دامىپ كەلە جاتقان وبلىستاردىڭ ءبىرى. وسى ءباسپاسوز ءماسليحاتىندا وڭتۇستىك قازاقستاندا حالىق سانى 25 جىل ىشىندە 1,8 ميلليوننان 2,8 ميلليونعا كوبەيگەنى تۋرالى ايتىلدى. شيرەك عاسىردا وبلىس بويىنشا 1491 مەكتەپكە دەيىنگى مەكەمە, 444 جاڭا مەكتەپ, 347 دەنساۋلىق ساقتاۋ نىسانى بوي كوتەرىپتى. ءسويتىپ, اپاتتىق جاعدايدا تۇرعان مەكتەپتەردىڭ ماسەلەسى شەشىمىن تاپقان. تەك بيىلدىڭ وزىندە 25 مەكتەپ پايدالانۋعا بەرىلگەن ەكەن.
ۇ.سادىبەكوۆتىڭ ايتۋىنشا, حالىق سانى ارتقان سايىن باسپانامەن قامتۋ ءىسى دە قاتار جۇرگىزىلۋدە. سونىڭ ارقاسىندا, ەگەمەندىك جىلدارىندا جالپى كولەمى 8,9 شارشى مەتر تۇرعىن ءۇي پايدالانۋعا بەرىلگەن, 100 مىڭنان استام ادام باسپانالى بولعان.
وبلىستىق اۋىل شارۋاشىلىعى باسقارماسىنىڭ باستىعى سەرىك تۇربەكوۆ بيىلعى جيىن-تەرىم ناۋقانىنىڭ ناتيجەلەرىن ورتاعا سالدى.
– وبلىس بويىنشا 470 مىڭ توننا استىق جينادى, بىلتىر بۇل كورسەتكىش 246 مىڭ توننانى قۇراعان بولاتىن. استىقتىڭ ورتاشا تۇسىمدىلىگى گەكتارىنا 22 تسەنتنەردى قۇرادى. بۇل تاۋەلسىزدىك جىلدارىنداعى ەڭ جوعارى رەكوردتىق كورسەتكىش. جەمىس-جيدەك, كوكونىس ەگىلەتىن جەرلەردىڭ كولەمى دە جىل سايىن ۇلعايىپ, سايكەسىنشە ءونىم ارتىپ كەلە جاتىر, – دەدى س.تۇرعىنبەكوۆ.
ماڭدايىن كۇنگە ءسۇيدىرىپ ءجۇرىپ قىرۋار ءونىم جيعان وڭتۇستىك شارۋالارى وسى ءونىمنىڭ ءبىر بولىگىن استاناعا اۋىز تيگىزۋگە اكەلگەن جايى بار.
جالپى, وڭتۇستىك قازاقستان وبلىسى استاناداعى كۇندەردى ايتپاعاندا, تاۋەلسىزدىكتىڭ مەرەيلى تويىن ايرىقشا ءسان-سالتاناتىمەن اتاپ ءوتۋدى جوسپارلاپ وتىر ەكەن. ايتۋلى مەرەكەنىڭ اياسىندا وبلىستا 5 مىڭعا جۋىق ءىس-شارا وتەدى دەپ جوسپارلانعان.
ارنۇر اسقاروۆ, «ەگەمەن قازاقستان»