العاشقى قار جامبىلدىقتاردى اجەپتەۋىر ابىگەرگە سالدى. توتەنشە جاعداي قىزمەتى وڭىردە كۇن سۋىتىپ, جاڭبىر جاۋىپ, سوڭى قارعا ۇلاساتىنىن ەسكەرتكەن بولاتىن. بىراق ەكى كەشتىڭ ورتاسىندا جاپالاقتاپ قار جاۋىپ, جەر-دۇنيەنىڭ ءبارىن ءاپ-ساتتە ءبىر قارىستاي قار باسىپ قالادى دەپ ەشكىم ويلاماعان ەدى.
كەشەگى بەيسەنبىنىڭ كەشىندە اپپاق قار ءوندىرىپ جاۋىپ تاستادى. اۋىل-ايماقتى بىلاي قويعاندا كوشەسىنەن كولىك قۇرعامايتىن تاراز قالاسىنىڭ وزىندە ارى-بەرى قاتىناۋ قيىن بوپ قالدى. ال, كەشە تاڭەرتەڭ وبلىس ورتالىعىنىڭ كوشەلەرى ادام تانىماستاي بوپ وزگەردى. كوشە بويىندا ۇزىنىنان سۇلاپ جاتقان تال-تەرەك كوپ. ەرىپ جاۋعان قاردى كوتەرە الماي تامىرىمەن قوپارىلىپ قۇلاپ جاتقان اعاشتار, سىنىپ تۇسكەن بۇتاقتار تروتۋار تۇگىلى ۇلكەن كوشەلەردىڭ ءوزىن بوگەپ, كولىك قوعالىسىنا قيىندىق تۋدىرۋدا. جول بويى ءۇزىلىپ جاتقان جەلىلەر دە كوپ.
تاراز قالالىق اكىمدىگى ءباسپاسوز قىزمەتىنىڭ بىزگە بەرگەن مالىمەتىنە قاراعاندا وسى العاشقى قار جاۋعان ءتۇنى وبلىس ورتالىعىندا 3 مىڭنان اسا تال قۇلاپتى. قازىر قۇلاپ جاتقان تال تەرەكتەردى كەسىپ, جولداردى تازالاۋ ءۇشىن 35 «كاماز», 9 جۇك سالاتىن كولىك جانە اكىمدىكتىڭ بولىمدەرىنەن 12 بريگادا جۇمىلدىرىلىپ, 300-دەن استام ادام شۇعىل ىسكە كىرىستى.
بۇدان بولەك توتەنشە جاعداي قىزمەتى 4 بريگادا, ەلەكتر جۇيەلەرى مەكەمەسى ارقايسىسى 5 ادامنان تۇراتىن 20 بريگادا شىعاردى. ەلەكتر ماماندارى ءۇش كۇننىڭ ىشىندە جارىق بەرۋ ماسەلەسىن تولىق قالپىنا كەلتىرەمىز دەپ وتىر. قار جاۋعان ءتۇنى قالانىڭ كوپ جەرلەرىندە جارىق ءسونىپ قالعان بولاتىن. ويتكەنى قۇلاعان اعاشتار كوپتەگەن ەلەكتر جەلىلەرىن ءۇزىپ كەتتى. قازىر جارىق بار, دەگەنمەندە كەيبىر كوشەلەر ءالى دە جارىقسىز قالۋدا.
وبلىستا جىلۋ 15-قازاننان باستاپ بەرىلۋى ءتيىس ەدى. قازىردىڭ وزىندە «جامبىل جىلۋ», «تەمىرجول جىلۋ» مەكەمەلەرى كەيبىر تۇرعىن ۇيلەرگە جانە الەۋمەتتىك نىساندارعا جىلۋ بەرىپ جاتىر. ايتسە دە تاراز قالاسىنىڭ نەگىزگى كوشەلەرىندە جىلۋ قۇبىرلارىن جاڭالاۋ جۇمىستارى ءالى ءجۇرىپ جاتقانىنا قاراعاندا جىلۋ بەرۋ ماسەلەسى بىرازعا سوزىلاتىن سياقتى.
جالپى العاندا قار جاۋعان ءتۇنى توتەنشە جاعداي قىزمەتىنە «جارىق جوق», «تەرەك قۇلادى» دەگەن سىڭايداعى 124 ءوتىنىش تۇسكەن. سونداي-اق, توتەنشە جاعداي قىزمەت 7 كولىكتى اعاش باسىپ قالعانىن ايتادى. زارداپ شەككەندەر جوق.
بۇگىن اۋا-رايى جىلىنىپ, قار كۇرت ەرىدى. اۋدان-اۋىلدارمەن كولىك قاتىناسى قالىپتى جاعدايعا ءتۇستى.
ورالحان ءداۋىت,
فوتو اقادىل رىسماحان
جامبىل وبلىسى.