27 قازان كۇنى تاۋەلسىزدىك سارايىندا بالاما ەنەرگەتيكا مەن «جاسىل ەكونوميكا» سالاسىنا قاتىستى ەڭ ۇزدىك 100 ستارتاپ جۇرتشىلىق نازارىنا ۇسىنىلماق. وسى حالىقارالىق ستارتاپتار سايىسىندا 100 جوبانىڭ ىشىنەن سۋىرىلىپ شىققان 30 جوبا ەكسپو-2017 كورمەسىندە پاۆيلوندارعا قويىلادى. بۇل تۋرالى كەشە ورتالىق كوممۋنيكاتسيالار قىزمەتىندە وتكەن بريفينگتە ايتىلدى.
ەنەرگەتيكا مينيسترلىگىنىڭ قولداۋىمەن «مۇناي جانە گاز اقپاراتتىق قولداۋ ورتالىعى» اق جۇزەگە اسىرىپ جاتقان NEWENERGY global startap fest حالىقارالىق بايقاۋىنا اقش, قىتاي, ۇلىبريتانيا, گەرمانيا, فرانتسيا, اۆستريا, نيدەرلاند, يتاليا, تۇركيا, ءۇندىستان سىندى الەمنىڭ 36 ەلىنەن 800-گە جۋىق ستارتاپ ۇسىنىلعان. كرەمني القابىنىڭ, تەل-اۆيۆ ۋنيۆەرسيتەتىنىڭ, BR ەنەرگەتيكالىق كومپانياسىنىڭ وكىلدەرىنەن, سونداي-اق, قازاقستاندىق ەنەرگەتيك مامانداردان, عالىمداردان جاساقتالعان حالىقارالىق قازىلار وسى 800 جوبانىڭ ىشىنەن ۇزدىك ءجۇزدىكتى ىرىكتەپ الىپتى. ەندى تاۋەلسىزدىك سارايىندا وتەتىن اقتىق سايىستا وسى جۇزدىكتىڭ ىشىنەن وتىزى ىرىكتەلەدى.
«مۇناي جانە گاز اقپاراتتىق تالداۋ ورتالىعى» اق باس ديرەكتورىنىڭ مىندەتىن اتقارۋشى اسقار مۇنارانىڭ ايتۋىنشا, شارانىڭ باستى ماقساتى – جاڭعىرتىلمالى ەنەرگيا كوزدەرىن تابۋ, «جاسىل ەكونوميكا» تەحنولوگيالارىنىڭ جەتىلۋىنە ات سالىسۋ.
– بىرىنشىدەن, بۇل بايقاۋ ارقىلى ەلىمىزدىڭ ەنەرگەتيكا سالاسىنا ۇلەس قوسۋعا تىرىستىق. ەكىنشى ماقساتىمىز – كەلەر جىلى ەلوردادا وتەتىن ەكسپو-2017 حالىقارالىق كورمەسىن حالىقارالىق ارەنادا ناسيحاتتاۋ, تانىمالدىعىن ارتتىرۋ. سونداي-اق, وسى ارقىلى ەلىمىزدە يننوۆاتسيانىڭ جانە ستارتاپ مادەنيەتتىڭ دامۋىنا ىقپال ەتەمىز دەگەن ءۇمىتىمىز بار. مۇنداي شارا قازاقستاندا عانا ەمەس, ەۋرازيا كولەمىندە ءبىرىنشى رەت ءوتىپ جاتىر. ستارتاپ بايقاۋلار كوپ, ارينە. بىراق تەك قانا ەنەرگەتيكا سالاسىندا 800 جاڭا جوبانى ءبىر جەرگە شوعىرلاندىرۋ بۇرىن-سوڭدى بولماعان, – دەيدى ول.
اسقار مۇنارا ايتىپ وتكەندەي, شيكىزات باعاسى تۇسكەن سايىن, بالاما ەنەرگيا كوزدەرىنە دەگەن سۇرانىس تا ارتا بەرەدى. ءتىپتى, كومىرسۋتەگى باعاسىنىڭ قۇلدىراۋىنا اسەر ەتىپ جاتقان فاكتورلاردىڭ ءبىرى وسى جاڭعىرمالى ەنەرگيا الۋ تەحنولوگياسىنىڭ جەتىلۋى دەۋگە دە بولادى. دەمەك, قازاقستان الداعى ۋاقىتتا ءوزىنىڭ ەنەرگەتيكالىق قاۋىپسىزدىگىن, ەكولوگياسىن ساقتاۋ ءۇشىن جاڭعىرمالى ەنەرگيا كوزدەرىنە يەك ارتۋدى ۇيرەنۋگە ءتيىس.
بايقاۋعا ۇسىنىلعان ستارتاپ جوبالارعا توقتالار بولساق, ولاردىڭ باسىم كوپشىلىگى جاڭعىرمالى جانە بالاما قۋات كوزدەرى سالاسىنداعى جوبالاردى جۇزەگە اسىراتىن كومپانيالاردان كەلىپتى. سونداي-اق, «اقىلدى قالا» جانە تۇراقتى ينفراقۇرىلىم قالىپتاستىرۋ, ەنەرگيا جانە ەكولوگيا, جاڭا ەنەرگيا كوزدەرى, زياندى رەسۋرستاردى ءتيىمدى تۇتىنۋ سىندى كاتەگوريالار بويىنشا ۇسىنىلعان جوبالار كوپ ەكەن.
جاسىراتىنى جوق, قوعامدا ستارتاپتاردىڭ پايداسىنا قاتىستى كۇماندى ويلارعا جەتەلەيتىن پىكىرلەردىڭ ايتىلىپ ءجۇرگەنى دە راس. ماسەلەن, جۇزدەگەن ستارتاپ جوبالاردىڭ اراسىنان ءبىردى-ەكىلىسى عانا ءىس جۇزىنە اسىپ, قالعانى شىعىنعا ۇشىراتۋى مۇمكىن. بۇل دامىعان ەلدەردە, ستارتاپ جوبالار سۇرانىسقا يە مەملەكەتتەردىڭ وزىندە ءجيى كەزدەسەتىن قۇبىلىس. الايدا, NEWENERGY global startap fest فەستيۆالىنىڭ ءجونى باسقا. ءبىرىنشىدەن, الەمنىڭ ونداعان ەلىنىڭ ونەرتاپقىشتارىن تارتۋ ارقىلى جوبا ءوز ميسسياسىنىڭ ءبىر بولىگىن ورىندادى دەۋگە بولادى. ەكىنشىدەن, جوباعا مەملەكەتتىك بيۋدجەتتەن قاراجات جۇمسالمايدى. ستارتاپ جوبالاردىڭ بايقاۋىن تولىقتاي «ERG S.A.R.L» جانە «Jupiter Energy» كومپانياسى قارجىلاندىرادى.
ارنۇر اسقار,
«ەگەمەن قازاقستان»