«استانا ەكسپو-2017» حالىقارالىق مامانداندىرىلعان كورمەسىنىڭ كوميسسارى ءراپىل جوشىباەۆ برازيليانىڭ پارانا شتاتىنداعى فوس-دۋ-يگۋاسۋل قالاسىندا برازيليا سەكتسياسىنىڭ كوميسسارى زولچير چياپەچيمەن كەزدەسىپ, بۇل مەملەكەتتىڭ ەكسپو-2017 كورمەسىنە قاتىساتىندىعى تۋرالى شارتقا قول قويدى.
برازيليانىڭ ەنەرگەتيكا جانە تاۋ-كەن ونەركاسىبى مينيسترلىگىنىڭ ۇسىنىسىمەن ەكسپو-2017 حالىقارالىق مامانداندىرىلعان كورمەسىنە تازا جانە جاڭعىرمالى ەنەرگيا وندىرۋدە الەمدەگى كوشباسشىلاردىڭ ءبىرى «يتايپۋ بيناسيونال» كومپانياسى قاتىساتىن بولدى. 1973 جىلى قۇرىلعان بۇل كومپانيانى برازيليا جانە پاراگۆاي مەملەكەتتەرى بىرلەسىپ باسقارادى. اتالمىش كومپانيا ەكى مەملەكەتتىڭ شەكاراسىمەن وتەتىن پارانا وزەنىندە سالىنعان دۇنيە ءجۇزىندەگى ەڭ ءىرى «يتايپۋ» گيدروەلەكترستانساسىنىڭ جۇمىسىن جۇرگىزەدى. «يتايپۋ» گەس-ءى ەكى ەلدىڭ ەكونوميكاسى مەن ەنەرگەتيكاسىندا وراسان زور ءرول اتقارادى.
برازيليا مەملەكەتى ەلەكتر ەنەرگياسىنا دەگەن سۇرانىسىنىڭ 20 پايىزىن وسى سۋ ەلەكتر ستانساسى وندىرەتىن قۋاتتان الاتىن بولسا, پاراگۆاي مەملەكەتىنىڭ ەلەكتر قۋاتىنا دەگەن سۇرانىسىنىڭ 80 پايىزىن «يتايپۋ» گەس-ءى جاۋىپ وتىر. مامانداردىڭ زەرتتەۋى بويىنشا, بۇل الەمدەگى تازا ەلەكتر قۋاتىن وندىرەتىن ەڭ ءىرى ستانسا بولىپ تابىلادى. جۇمىس ءىستەي باستاعاننان بەرگى مەرزىمدە اتالمىش كومپانيا 2,3 ميلليارد مەگاۆاتت ەلەكتر ەنەرگياسىن وندىرگەن. بۇل ەلەكتر ستانساسىنىڭ تاعى ءبىر ەرەكشەلىگى, ەكى مەملەكەتتىڭ ورتاق سۋ كوزىن باسقارۋداعى تاماشا تاجىريبەسىن كورسەتەدى. شەكارالىق وزەندە وراسان زور ەلەكتر قۋاتىن وندىرە وتىرىپ, ەكى مەملەكەت جاڭعىرمالى ەنەرگيالىق قۋات كوزدەرىن كەڭەيتۋ ماقساتىندا ءتيىمدى باعدارلامانى جۇزەگە اسىرىپ كەلەدى.
«استانا ەكسپو-2017» كورمەسىنىڭ اياسىندا «يتايپۋ بيناسيونال» كومپانياسى بيوگاز, بيوەتانول ءوندىرۋ ءجونىندەگى يننوۆاتسيالىق جوبالارىن كورسەتە وتىرىپ, كۇن ەنەرگياسىن پايدالانۋداعى وزىق تەحنولوگيالارىن جاريا ەتپەك. كورمەگە قاتىسۋ تۋرالى شارتقا قول قويۋمەن بىرگە, برازيليا مەملەكەتى ەلورداداعى ەكسپو قالاشىعىنداعى ەڭ ءىرى پاۆيلونداردىڭ ءبىرىن يەلەنبەك.
جىلقىباي جاعىپار ۇلى,
«ەگەمەن قازاقستان»