جالپى, قورقىتىپ-ۇركىتۋ دەگەن ادام بالاسىنا ءتان قاسيەت قوي. قوقان-لوقى كورسەتۋىڭىز دە سولاي. الايدا, قولعا قارۋ الىپ, تۇتاس مەملەكەتتى دۇرلىكتىرۋ دەگەنىڭىز ۇلكەن قىلمىس ەمەس پە؟! سوڭعى كەزدە حالىقتى قالقان رەتىندە العا سالىپ, ءوز ماقساتىن جۇزەگە اسىرۋعا ۇمتىلۋ, جانكەشتىلەردى جۇمساۋ ارقىلى مەملەكەتتى تەررورلىق ارەكەتىمەن تۇساۋلاعىسى كەلەتىندەر شوعىرى پايدا بولدى. جەكەلەگەن مەملەكەتتەردى عانا ەمەس, بۇكىل الەمدى ابىگەرگە سالاتىن تەرروريستىك توپتاردى ازىرگە اۋىزدىقتاۋ مۇمكىن بولماي تۇر. جاقىندا عانا ۇكىمەتتەن پارلامەنت ءماجىلىسىنىڭ قورجىنىنا كەلىپ تۇسكەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزمگە جانە تەرروريزمگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى دا قازاقستان حالقىنىڭ قاۋىپسىزدىگىن نىعايتۋدان تۋىنداپ وتىر.
حالىقتىڭ قاۋىپسىزدىگى دەمەكشى, مەملەكەت باسشىسى نۇرسۇلتان نازارباەۆ التىنشى شاقىرىلىمداعى پارلامەنتتىڭ ەكىنشى سەسسياسىنىڭ اشىلۋىندا سويلەگەن سوزىندە دە دەپۋتاتتاردىڭ الدىندا تۇرعان وزەكتى پروبلەمانىڭ ىشىندە ەڭ الدىمەن وسى ماسەلەگە توقتالدى.
«ءبىرىنشى. ەل قاۋىپسىزدىگىنىڭ زاڭنامالىق نەگىزىن نىعايتۋ. الەمنىڭ وزگە ەلدەرى سياقتى قازاقستان دا تىكەلەي تەررورلىق قاۋىپ-قاتەرگە كەز بولدى. اقتوبە مەن الماتىداعى تەررورلىق اكتىلەردىڭ سالدارىنان ۇلتتىق ۇلان ساربازدارى, پوليتسيا قىزمەتكەرلەرى جانە ەشبىر جازىعى جوق ازاماتتار قازاعا ۇشىرادى. وسىنداي جاعدايدا مەملەكەت ۇلتتىق قاۋىپسىزدىكتى نىعايتۋى ءتيىس. مەنىڭ تاپسىرمام بويىنشا ەكسترەميزم مەن تەرروريزمگە قارسى كۇرەس, قارسى بارلاۋ قىزمەتى, داكتيلوسكوپيالىق جانە گەنومدىق تىركەۋ, پروباتسيا, اقپاراتتىق قاۋىپسىزدىك ماسەلەلەرى بويىنشا 7 زاڭ جوباسى جاسالىپ, ءماجىلىس قاراۋىنا ەنگىزىلەدى», دەگەن ەدى ەلباسى.
وسىلايشا وتكەن بەيسەنبى كۇنى ماجىلىستە پرەزيدەنتتىڭ تاپسىرماسى بويىنشا ازىرلەنگەن زاڭ جوباسىنىڭ تانىستىرىلىمى ءوتتى. ارينە, زاڭ جوباسى پارلامەنت قابىرعاسىندا تالقىلاۋ بارىسىندا جان-جاقتى ساراپتالىپ, جۇرتشىلىقتىڭ پىكىرى دە ەسكەرىلىپ, ساپالىق جاعىنان شيراي تۇسەتىنى ءسوزسىز.
ەلدەگى زاڭداردىڭ قاتايتىلۋى ۇلتتىق قاۋىپسىزدىكتى نىعايتۋمەن استاسىپ جاتىر. ايتپەسە, تورىڭدە تەرروريستەر ويران سالاتىن بولسا, مەملەكەتتىڭ مىزعىماستىعى جونىندە, تاۋەلسىزدىكتىڭ تۇعىرلىلىعى تۋرالى قالاي اڭگىمە قوزعاۋعا بولادى؟
ايتپاقشى تەرروريستەردىڭ قانقۇيلى ارەكەتىنىڭ سالدارىنان نيۋ-يوركتەگى بۇكىلالەمدىك ساۋدا ورتالىعى عيماراتىنىڭ, حالىق اۋزىندا «ەگىز مۇنارا» اتانىپ كەتكەن عيماراتتىڭ جەرمەن جەكسەن بولعانىنا دا تۇپ-تۋرا 15 جىلدىڭ ءجۇزى بولىپتى. الايدا, سودان بەرى دە كۇللى دۇنيە جۇرتشىلىعى قاۋىمداسىپ, لاڭكەستىكتى تۇساۋلاي الماي كەلەدى. وسى ۋاقىتتىڭ بەدەرىندە تەرروريزم اتاۋلى مۇحيتتىڭ ارعى بەتىنەن ازيا قۇرلىعىنا اۋىسىپ, ءالى كۇنگە دەيىن سيريا لاڭكەستىك «سىرقاتىنان» ساۋىعا الماي وتىر. كارى قۇرلىقتىڭ قاق ورتاسىندا, پاريج بەن بريۋسسەلدە دە وسى تەرروريزمنىڭ كەسىرىنەن تالاي بەيبىت تۇرعىن قۇربان بولدى. قىسقاسى, تەرروريزم تورتكۇل دۇنيەنى تەڭسەلتىپ تۇر. سول سەبەپتى, ز ۇلىمدىق اتاۋلىنى الەم بولىپ كۇرەسپەي, اۋىزدىقتاۋ قيىن.
«بۇگىندە تەرروريزمنىڭ جاھاندىق ماسەلەگە اينالعانى ەشكىمنىڭ كۇمانىن تۋعىزبايدى جانە ونىمەن بۇكىل الەم بولىپ كۇرەسكەن ءجون. قازاقستان تەرروريزم مەن ەكسترەميزمنىڭ كەز كەلگەن كورىنىسىن تاباندى تۇردە ايىپتايدى جانە بۇكىل ەلدەردىڭ بۇل ز ۇلىم كۇشكە قارسى عالامدىق جۇمىسىنا اتسالىسادى», دەگەن بولاتىن نۇرسۇلتان نازارباەۆ وتكەن جىلى استانادا شەتەل ديپلوماتيالىق كورپۋس وكىلدەرىمەن كەزدەسۋىندە.
تەرروريزمگە قارسى, جالپى الەمدىك قاۋىپسىزدىك تۇرعىسىنداعى قازاق ەلىنىڭ ۇستانىمى وسىنداي. ولاي بولسا, تەرروريزم مەن ەكسترەميزمگە قارسى زاڭنامالىق نەگىزدى مەيلىنشە قاتايتقان ابزال. زاڭنامانى قاتايتۋمەن قاتار, تەرروريزمگە قارسى يدەولوگيالىق كۇرەستى دە پارمەندى تۇردە جۇرگىزىپ, حالىقتىڭ يدەولوگيالىق يممۋنيتەتىن كۇشەيتە ءتۇسۋ قاجەت. ايتپەسە, بۇلدىرگى اعىم ارقىلى ساناسى ۋلانعاندار حالىقتىڭ وتكەن تاريحىن, ءداستۇرىن مانسۇقتاعانى ءوز الدىنا, تەرروريستىك ارەكەت ارقىلى مەملەكەتتىلىككە, ۇلتتىق قاۋىپسىزدىككە قاتەر توندىرەتىنىن كوزىمىز كورىپ وتىر.
عابيت
ىسكەندىر ۇلى,
«ەگەمەن قازاقستان»