سىر تولاعايى الەكساندر زايچيكوۆ بۇگىندە تۋعان جەرىن ارالاپ ءجۇر. ءار اۋدان, اۋىلعا بارعان سايىن حالىق زور قۇرمەتپەن قارسى الىپ, ۇلكەن قوشەمەتپەن شىعارىپ سالۋدا. جەتى اۋداندى تولىق ارالاپ شىقتى. ەلدىڭ ىقىلاسى ەرەكشە.
سوڭىندا ول قىزىلوردا وبلىسىنىڭ تاريحي-ولكەتانۋ مۋزەيىنە ارنايى باردى. ريو وليمپياداسىنىڭ قولا جۇلدەگەرى الەكساندر زايچيكوۆ جۇرتشىلىقپەن كەزدەسۋ وتكىزىپ, سىندارلى سۇحبات قۇردى. كەزدەسۋ بارىسىندا اۋىر اتلەت وليمپيادادان العان اسەرىن ورتاعا سالدى. سونىمەن قاتار, ريو تورىندە جەڭىس تۇعىرىنا كوتەرىلىپ, ماراپات العان ساتىندە كيگەن سپورتتىق كيىمىن مۋزەي قورىنا تارتۋ ەتتى.
وسى شاراعا قاتىسقان ستۋدەنتتەر, مۋزەي قىزمەتكەرلەرى سپورتشىعا وزدەرىن قىزىقتىرعان سۇراقتار قويىپ, تۇشىمدى جاۋاپتار الدى. سونداي-اق, وليمپيادا جۇلدەگەرى مۋزەيدىڭ قۇرمەت كىتابىنا ءوز قولتاڭباسىن قالدىرىپ, قىزىلوردا وبلىسى الەۋمەتتىك سالاسىنىڭ دامۋى زالىمەن تانىستى.
ەرجان بايتىلەس,
«ەگەمەن قازاقستان»
قىزىلوردا