ريو وليمپياداسىندا 63 كيلوعا دەيىنگى سالماقتا قولا مەدال العان اۋىر اتلەت كارينا گوريچەۆاعا ءوزى وقىعان قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ۇجىمى قۇرمەت كورسەتتى. وليمپيادا جۇلدەگەرىن ەل مەرەيىن تاسىتقان ءتۇلەكتى ۋنيۆەرسيتەت رەكتورى دينار نوكەتاەۆا باستاعان وقىتۋشىلار مەن ستۋدەنتتەر توبى قۇشاق جايا قارسى الدى.
كارينا اۋىر اتلەتيكامەن 15 جاسىنان بەرى اينالىسىپ كەلەدى. مىقتى سپورتشى جاستار اراسىنداعى الەم چەمپيوناتتارىنىڭ كۇمىس جانە قولا, قازاندا ءوتكەن بۇكىلالەمدىك ۋنيۆەرسيادانىڭ كۇمىس, جاسوسپىرىمدەر اراسىنداعى ازيا چەمپيوناتىنىڭ قولا مەدالدارىن العان.
قىزدار ۋنيۆەرسيتەتى سپورتتىڭ قاي تۇرىندە بولماسىن بەلسەندى. ۋنيۆەرسيتەت كومانداسى «ايەلدەر دەنساۋلىعى» قالالىق وليمپياداسىنىڭ ەكى دۇركىن چەمپيونى. ستۋدەنتتىك جاتاقحانالاردا فيتنەس-زالدار جۇمىس ىستەيدى. وتكەن جىلى ءۇلكەن «اققۋ» ءجۇزۋ باسسەينى پايدالانۋعا بەرىلدى.
سونىمەن, سوڭى كونتسەرتكە ۇلاسقان كەزدەسۋدە وليمپيادا جۇلدەگەرى ستۋدەنتتەرگە ءوز قولتاڭباسىن بەرىپ, ەستەلىك سۋرەتكە ءتۇستى.
ارۋلار ورداسىنىڭ جازعى الاڭىندا ءسان-سالتاناتپەن وتكەن وقيعادا سپورتشى قىزعا تەگىن وقىتۋ سەرتيفيكاتى – رەكتور گرانتى تاپسىرىلدى. ك.گوريچەۆا ەندى پسيحولوگيا ماماندىعى بويىنشا دا ءبىلىم الاتىن بولادى.
ايناش ەسالي,
«ەگەمەن قازاقستان»
الماتى