رەداكتسيامىزعا «بوبەك» قورىنىڭ پرەزيدەنتى سارا الپىسقىزى نازارباەۆانىڭ اتىنا جازىلعان حات كەلىپ ءتۇستى. ول تاياۋ شەتەلدەن كەلىپتى. انىقتاپ ايتساق, حاتتى وسىدان التى جىل بۇرىن قاسىرەتتى جاعدايعا تاپ بولعان بەسلان بالالارى جازىپتى. ولار سارا الپىسقىزىنا قيىن ساتتە كورسەتكەن كومەگى, جان جىلۋى ءۇشىن راحمەت ايتادى. ءبىز شىنايى ىقىلاسقا تولى بۇل لەبىزدىڭ قالىڭ قاۋىمعا بەرەر تاعىلىمى مول ەكەنىن, ءارى سارا الپىسقىزىنىڭ مەرەيلى شاعىن ەسكەرە وتىرىپ, ونى جۇرتشىلىق نازارىنا ۇسىنعاندى ءجون كوردىك.
سالەمەتسىز بە, قىمباتتى سارا الپىسقىزى! ءسىزدى مەرەيلى تويىڭىزبەن شىن جۇرەكتەن قۇتتىقتايمىز! ءبىزدىڭ, بەسلان قالاسىنىڭ بالالارىنىڭ تاعدىرىندا ءسىز ۇلكەن ءرول اتقاردىڭىز!
سىزگە شىن جۇرەكتەن زور دەنساۋلىق, ءاردايىم اشىق اسپان ءجانە اتقارىپ جاتقان ىستەرىڭىزگە ءورىس تىلەيمىز! ءسىز سياقتى ءوز وتانى مەن حالقىن, بالالارىن ءسۇيەتىن, جانى ىزگى, مەيىرىمدى جان ەڭ ۇلكەن باقىت پەن ماحابباتقا لايىق!
ءبىز ءوزىمىز ءۇشىن ەڭ ءبىر قيىن كەزدەردە, سول ءبىر قورقىنىشتى تۇستەي بولعان زوبالاڭنان سوڭ ومىرگە قايتا كەلۋگە كومەكتەسىپ, قاسىمىزدان تابىلعانىڭىزدى ەشقاشان ۇمىتپايمىز. «ءبوبەكتەگى» كەزدەرىمىزدى, وزىڭىزبەن بولعان كەزدەسۋدى العىسپەن ەسكە الامىز. ءبىز ءۇشىن بۇل ۇلكەن وقيعا ەدى جانە ءسىزدىڭ جۇرەگىڭىزدىڭ جىلۋى, تۋعان انامىزدى ەسكە سالاتىن مەيىرىمدى كۇلكىڭىز ءالى كۇنگە شەيىن ءجۇرەگىمىزگە جىلۋ بەرىپ كەلەدى. بۇل ءۇشىن العىسىمىز شەكسىز! ءسىزدىڭ وسىناۋ قامقورلىعىڭىزدىڭ ارقاسىندا ءبىز قازاقستاندى جەر بەتىندەگى ەڭ جاقسى ەل رەتىندە ەسكە الامىز! بەسلانعا قايتىپ كەلگەننەن كەيىن ءبىزدىڭ توپ قالىپتى ومىرگە بىردەن بوي ۇيرەتىپ كەتتى, سانامىزعا بىلىمگە دەگەن قۇشتارلىق ورنىعىپ, لاڭكەستىك ارەكەتتەن كوز جۇمعان قانداستارىمىزدىڭ رۋحتارىنىڭ ريزاشىلىعى ءۇشىن, كەلەشەكتە ىزگى ىستەرگە مۇرىندىق بولۋ ءۇشىن ءبىز قايتادان وقۋعا باردىق.
ۋاقىت ورنىندا تۇرمايدى, مىنە, التى جىلدان اسىپ بارادى... ءبارىمىز ەسەيىپ تە قالدىق. ءسىزدىڭ سول كەزدە ايتقان – جاقسى وقىپ, ۇزدىك مامان بولىپ, مەيىرىمدى دە ادال ادام بولىڭدار دەگەن انالىق اقىلىڭىز بۇگىنگى كۇنى ودان دا قىمباتتىراق.
زارينا داۋروۆا (ەسىڭىزدە مە, ول بەسلانداعى قايعىلى وقيعا تۋرالى ولەڭ جازىپ ەدى عوي؟) مەن الانا اليكوۆا ەكونوميكالىق ءبىلىم الدى, قازىر بانك سالاسىندا قىزمەت اتقارىپ ءجۇر. الانا قارجىلىق جوعارى وقۋ ورنىن وسى جىلى اياقتايتىن ينگا تۋاەۆامەن بىرگە زاڭگەرلىك ەكىنشى ماماندىق الماق.
زاۋر تسوراەۆ پەن اسلان دزاراسوۆ تا زاڭگەر بولماق. وعان قوسا سپورتپەن دە اينالىسىپ ءجۇر. زاۋردىڭ قارىنداسى الينا تسوراەۆا قارجى اكادەمياسىنىڭ ستۋدەنتى. ال اسلاننىڭ ءىنىسى سوسلان دزاراسوۆ دارىگەر بولامىن دەپ شەشتى, مەديتسينا اكادەمياسىندا وقيدى. نوگاەۆتاردىڭ ۇلكەنى – زالينا ماسكەۋدەگى مەديتسينالىق جوعارعى وقۋ ورنىنا ءتۇستى, ال كىشىلەرى ەللينا مەن اللوچكا ورتا مەكتەپتە وقيدى. زارينا تسيريحوۆا ءماسكەۋ ماڭىنداعى ليتسەيدى بىتىرەدى.
ارامىزداعى جاس ايىرماشىلىعىنا قاراماستان, «بوبەكتەگى» ءبىر اي ءبىزدى جاقىنداستىرىپ جىبەردى, دوستاسىپ كەتتىك, ءالى كۇنگە بايلانىسىمىز ۇزىلگەن جوق. ال كەزدەسە قالساق, مىندەتتى تۇردە «بوبەكتەگى» كۇندەردى ەسكە الامىز. ول كۇندەردى ەسكە الۋدىڭ ءوزى ءبىز ءۇشىن ءبىر مەرەكە. ويتكەنى, سول كەزدە ءبىز ەڭ العاش ناعىز ادامداردىڭ ارقاشان ءبىر-بىرىنە كومەكتەسەتىنىن, جەر بەتىندە جاقسى جانداردىڭ كوپتىگىنە سەنۋ كەرەك ەكەنىن جانە قالىڭ كوپشىلىك جاقسى ءومىر ءسۇرۋى ءۇشىن ءوزىمىز دە كوپ ءنارسە ىستەۋىمىز كەرەك ەكەنىن ءتۇسىندىك. ءسىز بىزگە ءومىر مەن ءوزىن ءوزى تانۋدىڭ كەرەمەت ساباعىن بەردىڭىز!
قازىر ءبىز اياعىمىزدان تىك تۇردىق, ءوز بولاشاعىمىزدى ءوزىمىز جاساۋدامىز – بارلىعى دا ءسىزدىڭ ارقاڭىز, قىمباتتى سارا الپىسقىزى!
قازاقستان جەرىندەگى ءار ءساتىمىز ەسىمىزدە! «بوبەك» ورتالىعىنىڭ قىزمەتكەرلەرى مەن الماتىنىڭ قاراپايىم تۇرعىندارى سونداي ءبىر جىلۋعا بولەگەن ەدى! مۇنداي نارسە ۇمىتىلمايدى, ءبىز مۇنى ءاردايىم ەستە ۇستايمىز جانە بۇگىنگى باقىتىمىز ءۇشىن سىزگە العىس ايتىپ وتەمىز!
سىزگە جانە جاقىندارىڭىزعا دەنساۋلىق پەن باقىت تىلەيمىز!
قۇرمەتپەن, ءسىزدى سۇيەتىن جانە العىس ايتاتىن بەسلان بالالارى.