تاۋەلسىزدىكتىڭ 25 جىلدىعى مەن جاڭا وقۋ جىلىنىڭ باستالۋىنا وراي «KATEV» حالىقارالىق قوعامدىق قورىنىڭ ۇيىمداستىرۋىمەن «ماڭگىلىك ەل» – جاس ۇرپاقتى قازاق ەلىنىڭ ۇلتتىق يدەياسىنا بىرىكتىرۋشى فاكتور» اتتى تاقىرىپتا قازاق-تۇرىك ليتسەيلەرى اراسىندا رەسپۋبليكالىق كونفەرەنتسيا ءوتتى. ەلىمىزدىڭ تۇكپىر-تۇكپىرىنەن كەلگەن جاڭالىققا جانى قۇمار ۇستازدار ءبىلىم بەرۋدىڭ مازمۇنىن جاڭارتۋ, ول ءۇشىن ءتيىمدى ورتا قالىپتاستىرۋ ماسەلەلەرى جايلى پىكىر الماستى.
كونفەرەنتسيا قوناعى ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم بەرۋ دەپارتامەنتىنىڭ ديرەكتورى ج.جونتاەۆا ءبىلىم بەرۋ مازمۇنىن جاڭارتۋدا وقۋشىلاردىڭ تانىمدىق بەلسەندىلىگى مەن وزىندىك ويلارىن قامتاماسىز ەتەتىن دامىتۋشى, سىندارلى ءبىلىم بەرۋ مودەلىنە كوشۋ قاجەتتىلىگىن اتاپ ءوتتى.
«KATEV» حالىقارالىق قوعامدىق قورىنىڭ ديرەكتورى دارحان وتە جانە ۆيتسە-پرەزيدەنت ابدۋراحمەن سەل ءوز سوزدەرىندە بىلىكتى مامان دايىنداۋ, ولاردى سىناقتان وتكىزۋ, ادىستەمە جۇمىستارىن جۇيەلەۋ, قازاق جانە اعىلشىن ءتىلدەرىندە قوسىمشا وقۋلىقتار مەن وقۋ قۇرالدارىن جاساۋ, ءبىلىم سالاسىندا قوردىڭ جانە قازاق-تۇرىك وقۋ ورىندارىنىڭ قىزمەتىن دامىتۋ مەن جەتىلدىرۋ ماسەلەلەرىنە بايلانىستى اقپارات بەرىپ, دارىندى بالالارعا ءبىلىم بەرۋ جۇيەسىن الەمدىك دەڭگەيگە كوتەرۋ كەرەكتىگىنە باسا نازار اۋداردى.
قوردىڭ بۇل سالادا اتقارعان ءىس-شارالارى دا از ەمەس. تامىز ايىندا اعىلشىن ءتىلى ءپانىنىڭ مۇعالىمدەرى مەن ينفورماتيكا, حيميا, بيولوگيا, فيزيكا پاندەرىن اعىلشىن تىلىندە جۇرگىزەتىن ۇستازدار ءۇشىن ۇيىمداستىرعان وقىتۋ سەمينارىنا 1227 مۇعالىم قاتىسىپ, وقىتىلاتىن پاندەرى بويىنشا داعدى مەن شەبەرلىكتەرىن شىڭدادى. اتالعان ءىس-شارالار ۇلتتىق ءبىلىم بەرۋ جۇيەسىنىڭ حالىقارالىق ءبىلىم بەرۋ ۇلگىلەرىنە كىرىكتىرىلۋىنە جانە جاراتىلىستانۋ-ماتەماتيكا باعىتىنداعى پاندەردى وقۋشىلاردىڭ اعىلشىن تىلىندە وقىپ, ۇيرەنۋىنە تەڭدەي قولجەتىمدىلىكتى قامتاماسىز ەتۋگە قوسقان ۇلەسىمىز بولىپ تابىلادى.
جاس ۇرپاقتى قازاق ەلىنىڭ ۇلتتىق يدەياسى – «ماڭگىلىك ەل» باعىتىندا تاربيەلەۋدىڭ مازمۇنى مەن ماڭىزدىلىعىن ۇعىندىرۋدى ماقسات ەتكەن كونفەرەنتسيا ۇيىمداستىرۋشىلارى ە.سلامبەكوۆ, س.تالدىاحمەتوۆ جانە ە.ءابدىراسىلوۆ بۇل ءۇشىن جاستاردىڭ بويىنا جاڭا قازاقستاندىق پاتريوتيزم رۋحىن سەبۋ كەرەك دەگەن مىندەت جۇكتەدى. سونداي-اق, ءتۇرلى سالادا تابىستى كوشباسشىلىققا تالپىنىستارىن ىنتالاندىراتىن سەبەپتەر مەن قۇندىلىقتار قالىپتاستىرۋ ءۇشىن قاجەتتى اقپاراتتار مەن نۇسقاۋلىقتار بەردى.
قاتىسۋشى مۇعالىمدەر «USTAZ» كاسىبي جەتىلدىرۋ ورتالىعىنا ءبىلىمدى جاڭعىرتۋعا باعىتتالعان سەمينار جۇمىسىن ۇيىمداستىرعانى, وتكىزىلگەن ءىس-شارالاردىڭ مازمۇنى جوعارى بولعانى ءۇشىن ريزاشىلىقتارىن ءبىلدىردى.
باقىت ايتمۋرزينا
استانا