شىندىقتىڭ شىرايىن كىرگىزەتىن مىنا ءبىر ءسوزدى ايتقان ءجون. ەلدىڭ اماندىعى مەن تىنىشتىعىن قاشاندا اۋزىنان تاستاماي, بەس ۋاق نامازىنداي كورەتىن كىم؟ انالار. ويتكەنى, پەرزەنتىنىڭ باقىتى ەلدەگى تۇراقتىلىققا بايلانىستى ەكەنىن ولار جان-جۇرەگىمەن تۇسىنەدى. ەلباسىنىڭ «بولاشاقتىڭ ىرگەسىن بىرگە قالايمىز» اتتى بيىلعى جولداۋىن جەتىسۋداعى ەرەن ەڭبەگىمەن تانىلعان ارداقتى انالار قىزۋ قارسى الىپ, قۋاتتاۋى وسىدان.
سولاردىڭ قاتارىندا الماتى وبلىسى مەن پانفيلوۆ اۋدانىنىڭ قۇرمەتتى ازاماتى, ەڭبەك ەرى كۇلاش ايتجانوۆا پرەزيدەنت ن.ءا.نازارباەۆتىڭ قازاقستان حالقىنا جولداۋى جايلى پىكىرىن بىلايشا تارقاتتى:
– مەن – قاراپايىم ەڭبەك ادامىمىن. كەزىندە ەڭبەگىمدى ەل باعالادى. دەسە دە ەرتەڭگى ءومىرىمىز, ۇرپاق كەلەشەگى وزگە دە ايەل قاۋىمى ءتارىزدى مەنى دە ويلاندىرادى. بيىلعى جولداۋ حالىقتىڭ ءال-اۋقاتىن ارتتىرۋعا باعىتتالىپ, ەلىمىزدىڭ 2020 جىلعا دەيىنگى الداعى ۇستانىمى مەن مىندەتتەرى ناقتى ايقىندالعانىمەن قۇندى. پرەزيدەنت جاستاردىڭ جايىن بۇل جولى دا ۇمىتپاي, كەشەندى باعدارلاما ۇسىنىپ وتىر.
بۇگىنگى تاڭدا ەلىمىز حالىقارالىق قوعامداستىقتىڭ بەلسەندى ءمۇشەسى, ءارى ورتالىق ازيادا اسا بەدەلدى مەملەكەت رەتىندە تانىلعان. ۇلت كوشباسشىسىنىڭ سىندارلى ساياساتىنىڭ, تاباندىلىعى مەن ەرىك-جىگەرىنىڭ ارقاسىندا قىسقا مەرزىمدە وراسان زور تابىستارعا قول جەتكىزىلدى. حالقىمىزدىڭ ارمان-ماقساتى بىرتە-بىرتە ورىندالۋدا. كوپتەگەن ساۋالداردىڭ ءتۇپكى نەگىزىن ەلباسىنىڭ وسى جولعى قۇجاتى سارالاپ, جۇيەلەدى.
اۋىلداعى قاراپايىم حالىق مەملەكەت باسشىسىنىڭ جولداۋىن زور ىنتامەن تىڭداپ, كوڭىلدە ءجۇرگەن كوپتەگەن ساۋالدارىنا ناقتى جاۋاپ تاپقانىن كۇندەلىكتى تىرشىلىگىمىزدە كورىپ, ونىڭ يگىلىگىنە ءبولەنىپ ءجۇرمىز. تاۋەلسىز مەملەكەتىمىزدىڭ بۇدان ءارى دامۋىنا يگى ىقپالىن تيگىزەتىن ماڭىزدى قۇجات تا جاس ۇرپاق تاربيەسى, انا ءتىلىمىزدىڭ دامۋىنا بايلانىستى ناقتى تۇجىرىم جاسالدى.
انا رەتىندەگى اق تىلەگىم – ەلىمىزدە ساياسي تۇراقتىلىق پەن قوعامدىق كەلىسىم سالتانات قۇرىپ, ىنتىماق پەن بىرلىكتىڭ تۋى بيىكتە جەلبىرەسىن! قوي ۇستىنە بوزتورعاي جۇمىرتقالاعان جاقسى ءومىر ۇزاعىنان ءسۇيىندىرسىن. وسى رەتتە جەتىسۋلىقتار ءاردايىم ەلباسىمەن بىرگە ەكەنىن ايتقىم كەلەدى.
ىلە اۋدانىنداعى «قاراش» شارۋا قوجالىعىنىڭ جەتەكشىسى عاليا قۇرمانقوجاەۆا نۇرسۇلتان ءابىش ۇلىنا انالىق العىسىن ارناپ, ماڭىزدى قۇجات ءومىرگە اكەلەتىن ساياسي-ەكونوميكالىق, الەۋمەتتىك تۇرعىداعى وزگەرىستەر مەن جاڭالىقتاردىڭ باعدارشامى ەكەنىنە نازار اۋداردى. جولداۋ بولاشاققا سەنىم بەرىپ, جىگەر جانيتىنىن ورتاعا سالدى:
– جىل سايىنعى جولداۋدا الداعى جىلعى مىندەتتەر مەن تاپسىرمالار, الەۋمەتتىك جانە ەكونوميكالىق قولداۋدىڭ ناقتى ىسكە اسۋىن ناقتىلادى. ال ونى كوزبەن كورىپ, جەمىسىن تاتىپ جاتىرمىز دەپ نىق سەنىممەن ايتا الامىز. بيىلعى باعدارلامالار مەن جاسالاتىن جەڭىلدىكتەر سالماقتى. ءارى كوڭىلگە قونىمدى. تاۋەلسىزدىگىمىزدىڭ 20 جىلدىعىن اتاپ ءوتۋ, سونىمەن قاتار, ەڭبەك جانە سوعىس ارداگەرلەرىنىڭ ءال-اۋقاتىن كوتەرۋدەگى ناقتى شارالاردىڭ ايقىندالۋى دا جاقسى جاڭالىق.
جولداۋداعى اۋىل شارۋاشىلىعىن دامىتۋ, سىبايلاس جەمقورلىققا باقىلاۋدى كۇشەيتۋ ءجونىندەگى تاپسىرمالار ءار باسشىعا, قازاقستاننىڭ ءار تۇرعىنىنا ۇلكەن مىندەت جۇكتەيدى. جامان ادەتتەن جيرەنۋگە شاقىرادى.
ءوزىم جاسىم جەتپىسكە كەلسە دە جەردىڭ تامىرىن تارتىپ, بالالارىمدى ەڭبەككە تاربيەلەۋدەمىن. بيىلعى جولداۋدىڭ ەرەكشەلىگى – الەۋمەتتىك سالانى جاڭاشىلدىقپەن دامىتۋ, جاستارعا قولداۋ كورسەتۋ, وزىق داستۇرلەردى ناسيحاتتاۋ بولىپ وتىر. ونىڭ ءار تاراۋىنان ەلباسىنىڭ كورەگەندىگىن, تالاپ-ءجىگەرىن, حالقىنا دەگەن شەكسىز ءسۇيىسپەنشىلىگىن كورىپ, تامساندىم. جاس, تاۋەلسىز مەملەكەتىمىزدى اسقاقتاتىپ, وسكەلەڭ ۇرپاقتىڭ بولاشاققا سەنىممەن قاراۋىنا ءمۇمكىندىك بەرگەن ەلباسىنا سوعىس جانە ەڭبەك ارداگەرلەرىنىڭ, اق جاۋلىقتى انالاردىڭ اتىنان مىڭ دا ءبىر العىس ايتامىن.
بەيبىتشىلىكتى, ىنتىماق پەن ءبىرلىكتى تۋ ەتىپ, ەل-جۇرتىن مۇراتىنا جەتكىزۋگە كۇش-جىگەرىن, ءبىلىمىن ارناعان ەلباسى – ۇلت كوشباسشىسى – الەمدىك دەڭگەيدەگى مەملەكەت قايراتكەرى. ىلە اۋدانىنىڭ حالقى ءبىر شاڭىراقتىڭ استىنداعى وتباسىنداي ءوز پرەزيدەنتىن قولدايدى. قازاق ەلىنىڭ كوشى كولىكتى, ءومىرى كورىكتى بولسىن.
كوپ جىلدار اتاعى ەلىمىزگە جايىلعان قارعالى شۇعا كومبيناتىندا توقىماشى بولعان ەڭبەك ەرى كۇلداريا توقسەيىتوۆا ءوز پىكىرىن بىلايشا جۇپتادى:
– ءار جىلدىڭ باسىندا ەلىمىزدىڭ قول جەتكەن تابىستارىمەن تانىسىپ, الداعى دامۋ كوكجيەگىنە كوز جۇگىرتۋ قازاقستاندىقتاردىڭ ءداستۇرلى ىسىنە اينالعان. ەلباسى نۇرسۇلتان نازارباەۆتىڭ حالىققا كەزەكتى ماڭىزدى جولداۋىن جاريالاۋى, ولاردىڭ ءاردايىم جۇزەگە اسىرىلىپ كەلە جاتقانى عانيبەت.
مەن دە كوپپەن بىرگە جولداۋدى اسىعا كۇتتىم. قازاقستاننىڭ ەكونوميكاسى دامىپ, الەۋمەتتىك ءمۇمكىندىگى ارتىپ, عالامدىق كەڭىستىكتە ابىروي-بەدەلىنىڭ وسۋىنە كۋا بولعان بىزدەر ءۇشىن بولاشاقتا اتقارىلاتىن جۇمىستاردىڭ جوباسىن ءبىلۋ ماڭىزدى. ەڭ باستىسى, جىلما-جىلعى جولداۋ حالىقتىڭ كوكەيىندەگىسىن ءدوپ باسىپ كەلەدى.
ۇزاق جىلدار بويى توقىما ونەركاسىبىندە ەڭبەك ەتىپ, كەز كەلگەن جەتىستىكتىڭ ماڭداي تەرمەن كەلەتىنىن بىلەمىن. پرەزيدەنتتىڭ جولداۋلارى بىزگە باعدارشام ىسپەتتى. جانە ەلباسىنىڭ ءسوزى مەن ءىسىنىڭ قابىسىپ جاتاتىنى قۋانتادى. اتاپ ايتقاندا, زەينەتكەرلەر مەن بيۋدجەتتىك سالا قىزمەتكەرلەرىنىڭ جالاقىسى الەمدىك ەكونوميكالىق داعدارىسقا قاراماستان كوبەيۋ ۇستىندە.
ازۋىن ايعا بىلەگەن مىقتى مەملەكەتتەردىڭ وزىندە زەينەتاقى مەن جالاقى قىسقارتىلىپ جاتقاندا, بۇل ەكونوميكامىزدىڭ تۇراقتىلىعىن كورسەتسە كەرەك. ەلباسى جولداۋىندا جەڭىل ونەركاسىپتى قالپىنا كەلتىرۋ ماسەلەسىنە لايىقتى كوڭىل ءبولدى. بۇل شىنىندا دا ەكونوميكامىزدى شيكىزاتقا تاۋەلدىلىكتەن قۇتقارىپ, حالىقتىڭ 30 پايىزعا جۋىعىن ەڭبەكپەن قامتۋعا مۇمكىندىك بەرەتىن اسا اۋقىمدى سالا. سونىمەن بىرگە, جولداۋدا مال شارۋاشىلىعىن دامىتۋعا ءۇلكەن ماڭىز بەرىلگەن. ءبىلىم بەرۋ, مەديتسينا, الەۋمەتتىك سالا دا جولداۋدا جان-جاقتى قامتىلعان. وسىعان دەيىنگى بەلگىلەنگەن باعدارلامالاردىڭ بارلىعىن جۇزەگە اسىرعان حالقىمىز بۇل جولى دا ماقسات بيىگىنە شىعىپ, الداعى 10 جىلدىڭ ىشىندە تاۋەلسىز قازاقستاننىڭ الەمدەگى ەڭ دامىعان ەلدەردىڭ قاتارىنان كورىنەتىنى ءسوزسىز.
جازىپ العان كۇمىسجان بايجان.
الماتى وبلىسى.