16 اقپاندا ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ اقش-تىڭ قازاقستانداعى ەلشىلىگىنىڭ ۋاقىتشا سەنىمدى وكىلى دجون وردۆەيمەن ونىڭ ءوتىنىشى بويىنشا كەزدەستى. كەزدەسۋدە ورتالىق سايلاۋ كوميسسياسىنىڭ توراعاسى دجون وردۆەيدى الداعى بولاتىن قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا دايىندىق بارىسىمەن تانىستىردى, دەپ حابارلادى وسك-ءنىڭ ءباسپاسوز قىزمەتى.
رەسپۋبليكا پرەزيدەنتىنىڭ كەزەكتەن تىس سايلاۋى ەكى اي مەرزىم ىشىندە وتكىزىلەتىن بولعاندىقتان, كانديداتتار ءۇشىن دە, سايلاۋدى ۇيىمداستىرۋشىلار ءۇشىن دە نەگىزگى سايلاۋالدى شارالاردى ءوتكىزۋ ۋاقىتى ءبىرشاما قىسقارسا دا جەتكىلىكتى بولىپ تابىلادى. دەگەنمەن, ۇمىتكەرلەردىڭ وزدەرىنىڭ سايلاۋالدى شارالارىن ۇيىمداستىرۋعا ۋاقىتىنىڭ كوبىرەك بولۋىن كوزدەي وتىرىپ, ءبىز وسك مەن اۋماقتىق سايلاۋ كوميسسيالارى ءۇشىن كەيبىر راسىمدەردى ءوتكىزۋ مەرزىمىن قىسقارتۋ قاجەت دەپ شەشتىك. سوڭعى جىلدارى وتكىزىلگەن سايلاۋلاردا سايلاۋشىلاردىڭ ەلەكتروندى بيۋللەتەندەرمەن داۋىس بەرۋ ديناميكاسىن ەسكەرە وتىرىپ, الداعى سايلاۋدا «سايلاۋ» ااج قولدانىلمايدى دەگەن توقتامعا كەلدىك, دەدى قۋاندىق تۇرعانقۇلوۆ.
دجون وردۆەي قازاقستان رەسپۋبليكاسىنىڭ قولدانىستاعى سايلاۋ زاڭناماسى كەز كەلگەن سايلاۋدى حالىقارالىق ستاندارتتارعا سايكەس وتكىزۋگە مۇمكىندىك بەرەتىنىنە سەنىمدىلىگىن ءبىلدىردى جانە قر وسك ارقىلى بارلىق سايلاۋدى ۇيىمداستىرۋشىلارعا تابىس تىلەدى. مەن قازاقستاندا بۇدان بۇرىن وتكەن ءۇش سايلاۋ ناۋقانىنىڭ كۋاسى بولدىم. ءبىز بيىلعى ناۋقان بارىسىن دا بايقاپ وتىراتىن بولامىز, دەپ اتاپ ءوتتى دجون وردۆەي.
كەزدەسۋ سوڭىندا تاراپتار قر وسك مەن اقش ەلشىلىگىنىڭ اراسىندا قالىپتاسقان ىنتىماقتاستىق پەن ءوزارا تۇسىنىستىك ءداستۇرلەرىن ودان ءارى جالعاستىرۋعا كەلىستى.