ۇلت مۇراسىنا ۇقىپتىلىقپەن قاراپ, وتكەنىمىزدى وشىرمەي, سارى التىن ساقتالعان ساندىقتاي بولىپ كەلە جاتقان رۋحاني وشاعىمىزدىڭ ءبىرى – ۇلتتىق مۋزەي بولار. كەشە قازىنالى قارا شاڭىراق ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىمەن بىرلەسىپ, ەل تاۋەلسىزدىگىنىڭ 25 جىلدىعىنا ارنالعان « ۇلى دالا تاريحى» اتتى سۋرەت كورمەسىن اشتى.
كورمەگە اتالمىش ۋنيۆەرسيتەتتىڭ ونەر فاكۋلتەتىنىڭ وقىتۋشىلارى مەن ماگيسترانتتارى جاساعان 40 قىلقالام تۋىندىسى قويىلدى.
تۇركىستاننان جەتكەن كورمە « ۇلى دالانىڭ ۇلى تۇلعالارى» جانە « ۇلى دالانىڭ ۇلى وقيعالارى» دەگەن ەكى بولىمنەن تۇرادى. سۋرەتتەردىڭ تاقىرىپتارى مۇقيات تاڭدالىپ, ۋنيۆەرسيتەتتىڭ تاريحشى-ارحەولوگتارى تاراپىنان كوركەمدىك ساراپتامادان وتكەن ەكەن.
«كورمەنىڭ باستى ماقساتى – ۇلى دالانىڭ تاريحي وقيعالارى مەن ەل تاعدىرىنداعى ورنى ەرەكشە تۇلعالارىن كوركەمدىك تۇرعىدان قايتا كورسەتۋ ارقىلى جاستاردى وتانسۇيگىشتىككە باۋلۋ. ولاردىڭ ەرەن ەرلىكتەرىن ەل ەسىنەن ۇمىت قالماۋى ءۇشىن ەڭبەك ەتۋ. وسى جاز ايلارىندا, دەمالىس ۋاقىتتارىندا شەتەلدەن بولسىن, ءوزىمىزدىڭ قازاقستاندىقتار بولسىن استاناعا دەمالىپ كەلگەندە ۇلتتىق مۋزەيگە سوقپاي وتپەيدى. سول كەزدە ءبىزدىڭ وسى كورمەگە قويعان دۇنيەلەرىمىزدى كورىپ, تاريحىمىزبەن تانىسىپ جاتسا, ءبىزدىڭ ەڭبەگىمىزدىڭ جانعانى», – دەدى ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پرەزيدەنتى ءۋاليحان ابدىبەكوۆ.
كوپشىلىك نازارىنا ۇسىنىلعان كورمەگە «بوتاي ەلدى مەكەنى», «قازاق دالاسىنداعى اڭ اۋلاۋ ونەرىنەن كورىنىس», «ساق باسشىسى – التىن ادامدى جەرلەۋ ءراسىمى», «وتىرار مونشاسى», «تايقازان», «وتىرار كىتاپحاناسى», «قوجا احمەت ياساۋي كەسەنەسىنىڭ قۇرىلىسى» جانە ت.ب. سۋرەتتەردە ءبىزدىڭ زامانىمىزعا دەيىنگى بەس مىڭ جىل بۇرىنعى بوتاي مادەنيەتىنەن باستاپ, بۇگىنگى كۇنگە دەيىنگى ارالىقتاعى ۇلتتىق تاريح پەن مادەنيەتتىڭ ارتەفاكتىسىنە اينالعان مادەني-رۋحاني جانە ماتەريالدىق ەسكەرتكىشتەر بەينەلەنگەن.
تاريحي وقيعالار مەن تۇعىرلى تۇلعالارىمىزدى بەينەلەگەن كورمە 25 قىركۇيەككە دەيىن جالعاسادى.
راۋان قايدار,
«ەگەمەن قازاقستان»