پارلامەنت سەناتىنىڭ دەپۋتاتتارى راشيت اكىموۆ پەن جابال ەرعاليەۆ اقمولا وبلىسىنىڭ قورعالجىن جانە تسەلينوگراد اۋداندارىندا بولدى, دەپ حابارلادى وسى پالاتانىڭ ءباسپاسوز قىزمەتى.
وڭىرلەرگە ساپار بارىسىندا سەنات دەپۋتاتتارى قورعالجىن اۋدانىندا مەملەكەتتىك قىزمەت ىستەرى مينيسترلىگىنىڭ اقمولا وبلىسى بويىنشا ەكونوميكالىق جانە سىبايلاس جەمقورلىق قىلمىسقا قارسى كۇرەس دەپارتامەنتى مەن اقمولا وبلىستىق اكىمدىگى بىرلەسىپ وتكىزىپ جاتقان «ادال جول» سىبايلاس جەمقورلىققا قارسى فورۋمعا قاتىستى. مەملەكەتتىك قىزمەتكەرلەر مەن جاستار, قۇقىق قورعاۋ ورگاندارىنىڭ قىزمەتكەرلەرى قاتىسقان اۋداندىق فورۋمدا قازىرگى ۋاقىتتا ەلىمىزدە سىبايلاس جەمقورلىق سياقتى كەلەڭسىزدىككە قارسى اياۋسىز كۇرەس ءجۇرگىزىلىپ جاتقاندىعى اتاپ كورسەتىلدى. بۇل كەسەلگە قارسى كۇرەسكە بارلىق قوعامدى جۇمىلدىرۋدىڭ ماڭىزدىلىعى كولدەنەڭ تارتىلدى.
قورعالجىن اۋدانىنىڭ ورتالىعىندا جەكە كاسىپكەر ساۋلە بەيىسوۆا باسقارىپ وتىرعان «اقبوتاقان» اتتى جەكەمەنشىك بالالار باقشاسىنىڭ جۇمىسىمەن تانىسقان سەناتورلار قازىرگى كەزدە بۇل ۇيىمدا 100 بالانىڭ ءتاربيەلەنىپ جاتقاندىعىن كوردى. بالاباقشا وسى زامانعا لايىقتالىپ جابدىقتالعان. كاسىپكەرگە مەملەكەتتىك قولداۋ دا جاسالىپ كەلەدى.
«سابىندى» اۋىلىنداعى دارىگەرلىك ەمدەۋ مەكەمەسىندە وسى ەلدى مەكەننىڭ جانە كورشى اۋىلداردىڭ حالقىنا ساپالى دارىگەرلىك قىزمەت كورسەتىلەدى. ەمدەۋ مەكەمەسىنىڭ باس دارىگەرى مارال ارقاباەۆا قازىر مۇندا جوعارى ءبىلىمدى دارىگەرلەر قىزمەت جاساپ جاتقانىن جانە قاجەتتى جابدىقتاردىڭ جەتكىلىكتى ەكەنىن ايتىپ, سەناتورلاردىڭ نازارىن اۋىل دارىگەرلەرىن پاتەرمەن قامتاماسىز ەتۋ ماسەلەسى قيىن بولىپ تۇرعاندىعىنا اۋداردى.
2010 جىلدان بەرى جۇمىس ىستەپ كەلە جاتقان «استانا اگروپرودۋكت» جشس-ءنىڭ ونىمدەرىنە دەگەن سۇرانىس جىل سايىن ارتىپ كەلەدى. نەگىزىنەن, ەت جانە ەت ءونىمدەرىن وڭدەۋمەن اينالىساتىن بۇل كاسىپورىننىڭ ءونىمدەرى «باقارا» اتتى ساۋدا ماركاسىمەن بەلگىلى. قازىر مۇندا شۇجىقتىڭ 40 ءتۇرى مەن 60 ءتۇرلى «حالال» ەت ونىمدەرى شىعارىلادى. كاسىپورىننىڭ ونىمدەرى حالىقارلىق «ەكولوگيالىق تازا ءونىم» اكادەمياسىنىڭ رەەسترىنە تىركەلگەن. بۇلاردىڭ ءوز مال بورداقىلاۋ الاڭدارى, مال سوياتىن, ءونىم وڭدەيتىن تسەحتارى بار. بارلىق تەحنولوگيالىق جۇيە جابدىقتارى گەرمانيادان الىنىپ, ورناتىلعان.
بىلتىر كوكتەمگى قار سۋىنان زارداپ شەككەن تسەلينوگراد اۋدانىنىڭ ورازاق اۋىلىندا بولعان سەناتورلار اۋىل تۇرعىندارىمەن كەزدەستى. ولار زارداپ شەككەن تۇرعىندار ءۇشىن سالىنعان تۇرعىن ۇيلەردى ارالاپ كوردى. اۋىل تۇرعىندارى اسا قيىن كەزەڭدە وزدەرىنە قامقورلىق جاساعان ەلباسىنا شىنايى ريزاشىلىقتارىن ءبىلدىردى. قازىر اۋىلدى كوركەيتۋ جانە كوگالداندىرۋ جۇمىستارى ءجۇرىپ جاتىر.
سەناتورلار قۇس ەتىن ءوندىرىپ جاتقان كاسىپورىندا جانە اۋدان ورتالىعى اقمول اۋىلىندا جاڭادان سالىنىپ جاتقان اۋدان اكىمدىگىنىڭ, مەشىتتىڭ قۇرىلىس الاڭدارىندا, جازعى ستاديوندا بولدى. پارلامەنت دەپۋتاتتارى ءوز ساپارلارى كەزىندە جەرگىلىكتى تۇرعىنداردىڭ ساۋالدارىنا جاۋاپ بەرىپ, سەناتتىڭ زاڭ شىعارۋ قىزمەتىنىڭ بارىسىمەن تانىستىردى.