استاناداعى 19132 اسكەري ءبولىمىنىڭ بازاسىندا 2012 جىلعى 22 تامىزدا ارنايى تاپسىرمانى ورىنداۋ كەزىندە اپاتقا ۇشىراعان مي-17 تىكۇشاعىنىڭ ەكيپاجىن ەسكە الۋ قۇرمەتىنە وراي سپورتتىق جارىستار ءوتتى.
«بۇل كۇن 19132 ءبولىمىنىڭ اسكەري قىزمەتشىلەرى ءۇشىن ەرەكشە كۇن. مىنەكي, قىمباتتى قارۋلاستارىمىز بەن ارىپتەستەرىمىزدىڭ وپات بولعان كۇنىنەن بەرى ءتورت جىل ءوتىپتى. ولار وزدەرىنىڭ ومىرلەرىن قيىپ, جۇكتەلگەن جاۋىنگەرلىك تاپسىرمانى ورىندادى. بۇگىندە بۇل تۋرالى ەسكە الۋ وتە اۋىر, ارينە. ءبىز ولاردى ءاردايىم ەسىمىزدە ساقتاپ, ولاردىڭ ەرلىگىن ماقتان ەتىپ, داڭقتى ءداستۇرىمىزدى اۋە قورعانىسى كۇشتەرىنىڭ وسكەلەڭ جاۋىنگەرلەرىنە بەرەتىن بولامىز», – دەدى 19132 ءا/ب كومانديرى پولكوۆنيك مارال كارىموۆ.
قازا تاپقان ۇشقىشتاردى ەسكە الۋ قۇرمەتىنە وراي جىل سايىن سايىستار وتكىزىلىپ تۇرادى. ءتۋرنيردىڭ قورىتىندىسى بويىنشا 19132 ءا/ب-ءنىڭ كومانداسى جالپىكوماندالىق ءبىرىنشى ورىندى, اسكەري-اۋە كۇشتەرى قولباسشىسىنىڭ باسقارماسى ەكىنشى ورىندى جانە 2177 ءا/ب قر ۇقك شەكارا قىزمەتىنىڭ كومانداسى ءۇشىنشى ورىندى ەنشىلەدى. ءتۋرنيردىڭ بارلىق قاتىسۋشىلارى اتاۋلى گراموتالارمەن, مەدالدارمەن, قۇندى سىيلىقتار جانە اۋىسپالى ەستەلىك كۋبوكپەن ماراپاتتالدى.
2012 جىلعى 22 تامىزدا استانا قالاسىنىڭ اۋەايلاعى اۋدانىندا ارنايى تاپسىرمانى ورىنداۋ كەزىندە مي-17 تىكۇشاعى اۆياتسيالىق اپاتقا ۇشىراعانىن ەستەرىڭىزگە سالا كەتەيىك. ەكيپاجدىڭ ءۇش مۇشەسى قازا بولدى. اتاپ ايتقاندا, ەكيپاج كومانديرى كاپيتان تالعات دوسانوۆ, ۇشقىش-شتۋرمان, اعا لەيتەنانت ەركىن ماحامبەتنيازوۆ, بورتتىق اۆياتسيالىق تەحنيك, اعا لەيتەنانت جانبوتا قاسىموۆ, سونداي-اق, مەملەكەتتىك كۇزەت قىزمەتىنىڭ قىزمەتكەرى, اعا لەيتەنانت اقىلبەك مۋسين.
«ەگەمەن-اقپارات»